ନୂଆଦିଲ୍ଲୀ,୧।୫: ‘ଅପରେଶନ କାବେରୀ’ ଅଧୀନରେ ଭାରତୀୟମାନଙ୍କୁ ଘରକୁ ଫେରାଇ ଆଣିବା ପାଇଁ ସ୍ପାଇସଜେଟ ଏହାର ସ୍ବତନ୍ତ୍ର ବିମାନ ଚଳାଇବ। ସୋମବାର କମ୍ପାନୀ ପକ୍ଷରୁ ଏହି ଘୋଷଣା କରାଯାଇଛି। ଏୟାରଲାଇନ ‘ଅପରେଶନ କାବେରୀ’ ଅଧୀନରେ ଏପ୍ରିଲ ୩୦ରେ ଜେଡ୍ଡାରୁ କୋଚି ପର୍ଯ୍ୟନ୍ତ ଏକ ବିମାନ ଚଳାଚଳ କରି ୧୮୪ ଜଣ ଭାରତୀୟଙ୍କୁ ଫେରାଇ ଆଣିଥିଲା।
ଜାରି ଏକ ବିବୃତ୍ତିରେ ସ୍ପାଇସଜେଟ କହିଛି , ଅଧିକ ଭାରତୀୟଙ୍କୁ ଫେରାଇ ଆଣିବା ପ୍ରୟାସକୁ ସମନ୍ବିତ କରିବା ପାଇଁ ବୈଦେଶିକ ବ୍ୟାପାର ମନ୍ତ୍ରଣାଳୟ ଏବଂ ସାଉଦି ଆରବରେ ଥିବା ଭାରତୀୟ ଦୂତାବାସ ସହିତ ନିୟମିତ ଯୋଗାଯୋଗରେ ଅଛି। ସାଉଦି ଆରବରୁ ଲୋକଙ୍କୁ ଭାରତର ବିଭିନ୍ନ ସହରକୁ ଆଣିବା ପାଇଁ ଅଧିକ ବିମାନ ଚଳାଚଳ କରିବା ପାଇଁ ଯୋଜନା କରାଯାଉଛି। ଏୟାରଲାଇନ ଜେଡ୍ଡାରୁ କାଲିକଟ, ଦିଲ୍ଲୀ ଏବଂ ମୁମ୍ବାଇକୁ ନିୟମିତ ଉଡାଣ ଭରୁଛି। ଏଥିସହ ରିୟାଦରୁ ଦିଲ୍ଲୀ ପର୍ଯ୍ୟନ୍ତ ଏହାର ନିୟମିତ ବିମାନ ସେବା ମଧ୍ୟ ରହିଛି। ସରକାରୀ ଆକଳନ ଅନୁଯାୟୀ, ‘ଅପରେଶନ କାବେରୀ’ ଅଧୀନରେ ସମୁଦାୟ ୨,୧୪୦ ଭାରତୀୟଙ୍କୁ ସୁଦାନରୁ ଅଣାଯାଇଛି।
