ନୂଆଦିଲ୍ଲୀ,୧।୫: ମନି ଲଣ୍ଡରିଂ ମାମଲାରେ ଏନସିପି ନେତା ନଓ୍ବାବ ମଲିକଙ୍କ ଜାମିନ ଆବେଦନର ଶୁଣାଣି କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି। ମଙ୍ଗଳବାର ବମ୍ବେ ହାଇକୋର୍ଟ ଏହି ମାମଲାର ଶୁଣାଣି କରିବେ ବୋଲି କୋର୍ଟ କହିଛନ୍ତି। ଯଦି ହାଇକୋର୍ଟ ଶୁଣାଣି ନ କରିବେ, ତେବେ ଆବେଦନକାରୀ ପୁନର୍ବାର ସର୍ବୋଚ୍ଚ ନ୍ୟାୟାଳୟକୁ ଆସିପାରିବେ, କିନ୍ତୁ ବର୍ତ୍ତମାନ ପର୍ଯ୍ୟନ୍ତ ହାଇକୋର୍ଟ ଜାମିନ ଉପରେ ନିଷ୍ପତ୍ତି ନେବାକୁ ଦିଅନ୍ତୁ।
ନଓ୍ବାବ ମଲିକଙ୍କ ତରଫରୁ ବରିଷ୍ଠ ଓକିଲ କପିଲ ସିବଲ ସୁପ୍ରିମକୋର୍ଟଙ୍କୁ କହିଛନ୍ତି, ଜାମିନ ଆବେଦନ ଶୁଣାଣି ପାଇଁ ଟ୍ରାଏଲ କୋର୍ଟ ୬ ମାସ ସମୟ ନେଇଥିଲେ। ହାଇକୋର୍ଟ ପାଞ୍ଚ ମାସ ସମୟ ନେଇଛନ୍ତି। ବର୍ତ୍ତମାନ ହାଇକୋର୍ଟ ଏହି ମାମଲାକୁ ମେ’ ୨ ଯାଏ ବିଚାରାଧୀନ ରଖିଛନ୍ତି। ସେ ଗତ ଦେଢ ବର୍ଷ ଧରି ଜେଲରେ ଅଛନ୍ତି। ତାଙ୍କର ଗୋଟିଏ କିଡନୀ ଖରାପ ହୋଇସାରିଛି।
ଏନସିପି ନେତା ତଥା ପୂର୍ବତନ ମନ୍ତ୍ରୀ ନଓ୍ବାବ ମଲିକଙ୍କ ଦ୍ୱାରା ଦାଖଲ ହୋଇଥିବା ଆବେଦନ ଉପରେ ସୁପ୍ରିମକୋର୍ଟ ଶୁଣାଣି କରିଛନ୍ତି। ସ୍ବାସ୍ଥ୍ୟ ଦୃଷ୍ଟିରୁ ନଓ୍ବାବ ମଲିକ ମଧ୍ୟବର୍ତ୍ତୀକାଳୀନ ଜାମିନ ମାଗିଛନ୍ତି। ମଲିକ ଏହି ଆବେଦନରେ କହିଛନ୍ତି, ତାଙ୍କର ଗୋଟିଏ କିଡ଼ନୀ ବିଫଳତା ଏବଂ ଅନ୍ୟ କିଡ଼ନୀ ମଧ୍ୟ କମ କାମ କରୁଛି। ପ୍ରତ୍ୟେକ ପରୀକ୍ଷା ପାଇଁ କୋର୍ଟଙ୍କ ଅନୁମତି ନେବାକୁ ଦୁଇ ତିନି ସପ୍ତାହ ସମୟ ଲାଗିଥାଏ। ନବାବ ମଲିକଙ୍କୁ ଗତ ବର୍ଷ ଟଙ୍କା ହେରଫେର ମାମଲାରେ ଗିରଫ କରାଯାଇଥିଲା।
