ଥୁଆମୂଳ ରାମପୁର,୨୮ା୯(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ସ୍ଥିତ ମା’ ମାଣିକେଶ୍ୱରୀ ଓ ବାବା ଅଗ୍ନି ଭୈରବ ଦେବଙ୍କ ପୀଠରେ ଦୀର୍ଘ ବର୍ଷର ପାରମ୍ପରିକ ରୀତିନୀତି ଅନୁଯାୟୀ ଆଶ୍ୱିନ କୃଷ୍ଣ ପକ୍ଷ ପ୍ରତିପଦା ତିଥିରେ ସ୍ୱତନ୍ତ୍ର “କଣ୍ଟା ଗାଦିଆ” ବସା ଉତ୍ସବ ଅତ୍ୟନ୍ତ ଆଡ଼ମ୍ବରର ସହ ସମ୍ପନ୍ନ ହୋଇଯାଇଛି । ଏହି ସ୍ୱତନ୍ତ୍ର ପୂଜାରୀତି ଅନୁସାରେ କଞ୍ଚା ହାଣ୍ଡିରେ ବେଲ କଣ୍ଟା ଓ ତଳେ ଧାନ ପୁଞ୍ଜି ଦେଇ ଗାଦିଆ ବସାଯାଇଥିଲା। ଏଥିରେ ମାଣିକେଶ୍ୱରୀ ପୂଜକ ଶରତ ଚନ୍ଦ୍ର ପୂଝାରୀ ଓ ଭୈରବ କାଳିସୀ କଶ୍ୟପ ମୁଣ୍ଡଛିନ୍ନା କାର୍ଯ୍ୟନିର୍ବାହ କରିଥିବା ବେଳେ, ମୁଖ୍ୟ ପୂଜକ ତାପସ ରଞ୍ଜନ ରାଇଗୁରୁ ପୂଜାର୍ଚ୍ଚନା ପରିଚାଳନା କରିଥିଲେ।
ଏହି ଆଧ୍ୟାତ୍ମିକ ପରମ୍ପରାରେ ଏକ ବଡ଼ ସେବାଗତ ନିୟମ ରହିଛି । ପୂର୍ବରୁ ସୋମନାଥ ମୁଣ୍ଡଛିନ୍ନା ୪୫ ବର୍ଷ ଓ ତାଙ୍କ ପୁତ୍ର ଉମାକାନ୍ତ ମୁଣ୍ଡଛିନ୍ନା ୩୦ ବର୍ଷ ଧରି ନିଷ୍ଠାର ସହ କାଳିସୀ ସେବା କରିଥିବା ବେଳେ, ଯୁବକ ଲାଲ ପରିଚ୍ଛା ୧୫ ବର୍ଷ ଧରି ସେବା ଯୋଗାଇ ଆସୁଛନ୍ତି । ଚଳିତ ବର୍ଷଠାରୁ ୧୮ ବର୍ଷୀୟ କଶ୍ୟପ ମୁଣ୍ଡଛିନ୍ନା ଏହି ଗୁରୁଦାୟିତ୍ୱ ଗ୍ରହଣ କରିଛନ୍ତି । ନବମୀ ରାତିରେ ୯ଟି ମାଟି ଚାଙ୍ଗିଡିରେ ଧାନ, ଗହମ, ମୁଗ, ବିରି ଭଳି ବିଭିନ୍ନ ଶସ୍ୟ ଓ ଗଜା ଡାଳ ରୋପଣ କରାଯାଇ ବାଲି ଯାତ୍ରା ନୀତି ପାଳନ କରାଯାଏ ଏବଂ ନବମୀ ଦିନ ଅଗ୍ନିକୁଣ୍ଡ ନିକଟରେ ପାରମ୍ପରିକ ଅଗ୍ନି ପରୀକ୍ଷା ବା ଝାମୁ ଯାତ୍ରା ଅନୁଷ୍ଠିତ ହୋଇଥାଏ।
ଏହି ପ୍ରାଚୀନ ପରମ୍ପରାର ଐତିହାସିକ ଓ ସାଂସ୍କୃତିକ ଗୁରୁତ୍ୱ ହେଉଛି ଯେ କଳାହାଣ୍ଡି (କାରୁଣ୍ଡ ରାଜ୍ୟ)ର ରାଜାମାନଙ୍କ ସମୟରୁ ପ୍ରତ୍ୟେକ ଦେବୀ, ଯଥା ମା’ ମାଣିକେଶ୍ୱରୀ, ଲଙ୍କେଶ୍ୱରୀ ଓ ଭଣ୍ଡାରଘରଣୀଙ୍କ ସହ ଜଣେ ଜଣେ ଭୈରବଙ୍କୁ ପୂଜା କରିବାର ବିଧି ରହିଛି। ତତ୍କାଳୀନ ଥୁଆମୂଳ ରାମପୁର ଗଡ଼ର ରାଜା ରାମଚନ୍ଦ୍ର ଦେବ ଲାଞ୍ଜିଗଡ଼ରୁ ଅଗ୍ନି ଭୈରବଙ୍କୁ ଆଣି ଏଠାରେ ସ୍ଥାପନ କରିଥିଲେ । ସେହିପରି ବିଶ୍ୱନାଥପୁରରେ ବେତାଳ ଭୈରବ ଏବଂ ଲାଞ୍ଜିଗଡ଼ରେ କଣା, ବାଲି ଓ ଅଗ୍ନି ଭୈରବଙ୍କୁ ପୂଜାର୍ଚ୍ଚନା କରାଯାଇଥାଏ । ଏହି କୃଷ୍ଣପକ୍ଷ ଉତ୍ସବଟି କୃଷି ଭିତ୍ତିକ ସଂସ୍କୃତି ସହ ଅନ୍ୟାୟ, କ୍ରୋଧ ଓ ଭୟ ବିରୋଧରେ ସଂଗ୍ରାମର ପ୍ରତୀକ ଅଟେ । ଏହି ସଂଗ୍ରାମ ସମାପ୍ତ ପରେ ମା’ ଦୁର୍ଗା ଧରାପୃଷ୍ଠରେ ଅବତରଣ କରନ୍ତି ଏବଂ ଏହି ପୀଠରେ ମା’ ମାଣିକେଶ୍ୱରୀ ରୂପେ ପୂଜା ପାଆନ୍ତି। ଏହି ପ୍ରସିଦ୍ଧ ଯାତ୍ରା ଓ କଣ୍ଟା ଗାଦିଆ ବସା ଉତ୍ସବ ଦେଖିବା ପାଇଁ ଆଖପାଖ ଅଞ୍ଚଳରୁ ସହ ସହ ଶ୍ରଦ୍ଧାଳୁଙ୍କ ସମାଗମ ହୋଇଥିଲା।
