ସେଞ୍ଚୁରିଅନ୍,୧।୩: ସେଞ୍ଚୁରିଅନର ସୁପରସ୍ପୋର୍ଟ ପାର୍କରେ ଓ୍ବେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟ ମ୍ୟାଚରେ ଓପନର ଏଡେନ ମାରକ୍ରମଙ୍କ ଶତକ। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଘରୋଇ ଦକ୍ଷିଣ ଆଫ୍ରିକା ପ୍ରଥମ ଦିନର ଖେଳ ଶେଷ ସୁଦ୍ଧା ୮ ଉଇକେଟ ହରାଇ ୩୧୪ ରନ୍ ସଂଗ୍ରହ କରିଛି। ଦୁଇ ଓପନର ଡିନ୍ ଏଲଗାର(୭୧) ଓ ମାରକ୍ରମ(୧୧୫) ଦଳକୁ ଏକ ଦୃଢ ଆରମ୍ଭ ପ୍ରଦାନ କରିଥିଲେ। ଉଭୟ ପ୍ରଥମ ଉଇକେଟରେ ୧୩୯ ରନ୍ ଯୋଡିଥିଲେ। ଏଲ୍ଗାର ୧୧୮ ବଲ ଖେଳି ୧୧ ଚୌକା ମାରିଥିଲେ। ପରବର୍ତ୍ତୀ ବ୍ୟାଟର ଟୋନି ଜୋର୍ଜି(୨୮), ଟେମ୍ବା ବାଭୁମା(୦), କିଗାନ ପିଟରସନ(୧୪) ଓ ହେନରିଚ୍ କ୍ଲାସେନ୍ (୨୦) ବଡ ସ୍କୋର କରିବାରେ ବିଫଳ ହୋଇଥିଲେ। ଦଳୀୟ ସ୍କୋର ୨୩୬ ରନରେ ମାରକ୍ରମ ୧୧୫ ରନ୍ କରି ପ୍ୟାଭିଲିୟନ ଫେରିଥିଲେ। ଏହି ଇନିଂସରେ ସେ ୧୭୪ ବଲ୍ ଖେଳି ୧୮ ଚୌକା ମାରିଥିଲେ। ଷ୍ଟମ୍ପ ଅପସାରଣ ବେଳକୁ ମାର୍କୋ ଜାନସେନ୍ ୧୭ ଓ ଜେରାଲ୍ଡ କୋଏଟଜି ୭ ରନରେ ଅପରାଜିତ ଅଛନ୍ତି। ଓ୍ବେଷ୍ଟଇଣ୍ଡିଜ ପକ୍ଷର ଆଲଜାରି ଯୋଶେଫ ସର୍ବାଧିକ ୩ ଉଇକେଟ ନେଇଥିବା ବେଳେ ଜାସନ ହୋଲ୍ଡର, କେମାର ରୋଚ୍, ଶାନନ ଗାବ୍ରିଏଲ ଓ କାଇଲ ମେୟର୍ସ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଦକ୍ଷିଣ ଆଫ୍ରିକା ପ୍ରଥମ ଇନିଂସ- ୮୨ ଓଭରରେ ୩୧୪/୮ ( ଏଡେନ ମାରକ୍ରମ-୧୧୫, ଡିନ୍ ଏଲଗାର-୭୧, ଟୋନି ଜୋର୍ଜି-୨୮, ଆଲଜାରି ଯୋଶେଫ୍-୩/୬୦, ଶାନନ ଗାବ୍ରିଏଲ-୧/୪୯, କାଇଲ ମେୟର୍ସ-୧/୨୩)।
