ଓ୍ବାଶିଂଟନ,୫।୧୨ : ଫେବୃଆରୀରୁ ରୁଷିଆ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଚାଲିଛି। ତେବେ ଏବେ ଏକ ଗଣମାଧ୍ୟମ ରିପୋର୍ଟରେ କୁହାଯାଇଛି ଯେ ଏକ ନୂଆ ଯୁଦ୍ଧ ମଧ୍ୟ ହେବାର ଆଶଙ୍କା ରହିଛି। ଇରାନ ଏବଂ ଇସ୍ରାଏଲ ମଧ୍ୟରେ ଯୁଦ୍ଧର ଆଶଙ୍କା ଘନେଇବାରେ ଲାଗିଛି। ଇରାନ ବିରୋଧରେ ଆମେରିକା ଇସ୍ରାଏଲକୁ ସମର୍ଥନ ଘୋଷଣା କରି ସାରିଛି।
ଫଳରେ ଦୁଇ ଦେଶ ମଧ୍ୟରେ ଏବେ ମୁହାଁମୁହିଁ ସ୍ଥିତି ସୃଷ୍ଟି ହୋଇଛି। ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ କହିଛନ୍ତି ଯେ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହ ମତଭେଦ ଥିଲେ ମଧ୍ୟ ଆମେରିକା ଇସ୍ରାଏଲକୁ ସମର୍ଥନ କରିବାରେ ପଛକୁ ହଟିବ ନାହିଁ। ବାମପନ୍ଥୀ ଗୋଷ୍ଠୀ ସହ କଥା ହୋଇଥିବା ବ୍ଲିଙ୍କେନ କହିଛନ୍ତି ଯେ କେତେକ ଦକ୍ଷିଣପନ୍ଥୀ ତାଙ୍କୁ ପାଲେଷ୍ଟାଇନ ଏବଂ ଇରାନ ପ୍ରତି ଅତ୍ୟଧିକ ସହାନୁଭୂତିଶୀଳଥିବା ଅଭିଯୋଗ କରିଛନ୍ତି।
ସେ କହିଛନ୍ତି, “ଆମେରିକା ଇସ୍ରାଏଲର ଜଣେ ବନ୍ଧୁ ହୋଇ ରହିବ। ଯେପରିକି ଆମେ ନେତାନ୍ୟାହୁ ବିରୋଧ କରିଥିବା ସମସ୍ୟାର ସମାଧାନ କରିବାକୁ ଚେଷ୍ଟା କରୁଛୁ ଯେପରିକି ଇସ୍ରାଏଲ-ପାଲେଷ୍ଟାଇନ ବିବାଦର ସମାଧାନ ଏବଂ ୨୦୧୫ ଇରାନ ଆଣବିକ ଚୁକ୍ତିନାମାକୁ ପୁନଃସ୍ଥାପିତ କରିବା ଲାଗି ପ୍ରୟାସ କରୁଛୁ।”
ସେ କହିଛନ୍ତି, ଆମେରିକା-ଇସ୍ରାଏଲ ସହଭାଗୀତା ଏବଂ ଆମ ଦେଶ ତଥା ବିଶ୍ୱର ବିଭିନ୍ନ ଦେଶ ନେଇଥିବା ପ୍ରତ୍ୟେକ ପଦକ୍ଷେପ ମାଧ୍ୟମରେ ଆମେରିକା ସର୍ବଦା ଇସ୍ରାଏଲର ସୁରକ୍ଷା ପ୍ରତି ପ୍ରତିବଦ୍ଧ ରହିଛି। ବ୍ଲିଙ୍କେନ କହିଛନ୍ତି ଯେ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ପ୍ରଶାସନ ନେତାନ୍ୟାହୁଙ୍କ ସରକାରଙ୍କ ସହ ବ୍ୟକ୍ତିଗତ ଆଧାରରେ ନୁହେଁ ବରଂ ତାଙ୍କ ନୀତି ଆଧାରରେ ଆଲୋଚନା କରିବ।
ଆରମ୍ଭରୁ ଆମେରିକା ଇସ୍ରାଏଲକୁ ସମର୍ଥନ କରିଆସୁଛି। ବାସ୍ତବରେ ଇରାନ ଏବଂ ଇସ୍ରାଏଲ ହେଉଛି ଶତ୍ରୁ। ଆମେରିକା ଏବଂ ଇରାନ ମଧ୍ୟରେ ଶତ୍ରୁତା ମଧ୍ୟ ରହିଛି। ଏଭଳି ପରିସ୍ଥିତିରେ ଆମେରିକା ଇସ୍ରାଏଲକୁ ପ୍ରତ୍ୟେକ କ୍ଷେତ୍ରରେ ସମର୍ଥନ କରେ।
ରୁଷ ଏବଂ ୟୁକ୍ରେନ ମଧ୍ୟରେ ହୋଇଥିବା ଯୁଦ୍ଧରେ ଗୋଟିଏ ପଟେ ଇରାନ ରୁଷିଆକୁ ସାହାଯ୍ୟ କରୁଛି ଏବଂ ମାରାତ୍ମକ ଡ୍ରୋନ ଯୋଗାଉଛି। ତେଣୁ ଅନ୍ୟ ପଟେ ଇସ୍ରାଏଲ ଏହି ଡ୍ରୋନଗୁଡିକର ମୁକାବିଲା ପାଇଁ ୟୁକ୍ରେନକୁ ସାମରିକ ଯନ୍ତ୍ରପାତି ଯୋଗାଉଛି। ଇରାନର ଅସ୍ତ୍ରଶସ୍ତ୍ରକୁ କିପରି ମୁକାବିଲା କରାଯିବ ତାହା ଇସ୍ରାଏଲ କହିଛି।
ଏହି ବିବାଦର ତିନୋଟି ମୁଖ୍ୟ କାରଣ ରହିଛି। ପ୍ରଥମଟି ହେଉଛି ପରମାଣୁ ଚୁକ୍ତିରେ ବିଫଳତା। ଅନ୍ୟ ଏକ କାରଣ ହେଉଛି ରୁଷିଆର ସେନାକୁ ଇରାନ ଡ୍ରୋନ ଯୋଗାଣ। ଏହାକୁ ବ୍ୟବହାର କରି ରୁଷିଆ କ୍ରମାଗତ ଭାବରେ ୟୁକ୍ରେନ ଉପରେ ଆକ୍ରମଣ କରୁଛି। ତୃତୀୟ କାରଣ ହେଉଛି ହିଜାବକୁ ନେଇ ଇରାନ ସରକାରଙ୍କ ବିରୋଧରେ ବିରୋଧ ସ୍ବର। ଏହି ଆନ୍ଦୋଳନରେ ଶହ ଶହ ଲୋକ ପ୍ରାଣ ହରାଇଛନ୍ତି। ଏଥି ସହିତ ଇରାନ ମଧ୍ୟ ଏହି ଆନ୍ଦୋଳନ ପାଇଁ ଆମେରିକାକୁ ଦାୟୀ କରୁଛି।
