ଆଳି,୧୫ା୩(ଡି.ଏନ.ଏ.):କେନ୍ଦ୍ରାପଡ଼ା ଜିଲା ଆଳି ତହସିଲ ଅଧୀନରେ ଥିବା ସରକାରୀ ସ୍ଥାନ ଉପରେ ମାଟି ମାଫିଆଙ୍କ ଲୋଲୁପ ଦୃଷ୍ଟି ପଡିଛି। ସେମାନଙ୍କ ସହ ସାଲିସ କରିଛନ୍ତି ସରକାରୀ ବାବୁ। ଆଳି ତହସିଲ ଅଧୀନରେ ଥିବା ସରକାରୀ ଜମିରୁ ମାଟି ଉଠାଇ ରାସ୍ତା ନିର୍ମାଣ କାର୍ଯ୍ୟ କରୁଥିବା କଣ୍ଟ୍ରାକ୍ଟରମାନଙ୍କୁ ବିକ୍ରି କରାଯାଉଛି। ଆଉ ଏଭଳି କାର୍ଯ୍ୟ ଆଳି ତହସିଲଦାରଙ୍କ ଜ୍ଞାତ ସାରରେ ହେଉଛି ବୋଲି ଆଳିର ପୂର୍ବତନ ବିଧାୟକ ଦେବେନ୍ଦ୍ର ଶର୍ମା ରବିବାର ଅଭିଯୋଗ କରିଛନ୍ତି। ପୂର୍ବତନ ବିଧାୟକ ଶର୍ମା ଅଭିଯୋଗ ଦର୍ଶାଇଛନ୍ତି, ଆଳି ତହସିଲଦାର ମାଫିଆମାନଙ୍କ ନିକଟରୁ ଲକ୍ଷାଧିକ ଟଙ୍କା ମୁନଫା ନେଇ ନଦୀ କିସମ ଜମିରୁ ମାଟି ବିକ୍ରି କରିବାକୁ ପ୍ରୋତ୍ସାହନ ଦେଉଛନ୍ତି। ଏ ନେଇ ତହସିଲଦାରଙ୍କୁ ଅଭିଯୋଗ କଲେ ମାଫିଆମାନେ ଅଭିଯୋଗକାରୀଙ୍କୁ ଧମକ ଚମକ ଦେଉଛନ୍ତି। ଯାହାର ଉଦାହରଣ ଦେଇ ପୂର୍ବତନ ବିଧାୟକ ଶର୍ମା କହିଛନ୍ତି, ତହସିଲ ଅନ୍ତର୍ଗତ କୁସୁମି ଏବଂ ମଦନଗିରି ମୌଜାରେ ଥିବା କାଣୀ ନଦୀର ପ୍ରାୟ ୮ ଏକରରୁ ଊର୍ଦ୍ଧ୍ୱ ନଦୀ କିସମ ଜମି ଜଳସେଚନ ବିଭାଗ ଅଧୀନରେ ରହିଛି। ନଦୀ ଖୋଳା ହେବା ପରେ ଯେଉଁ ମାଟି ରହିଛି ତାହାକୁ ତହସିଲଦାର ରାସ୍ତା ନିର୍ମାଣ କରୁଥିବା କଣ୍ଟ୍ରାକ୍ଟରମାନଙ୍କୁ ବିକ୍ରି କରିବାରେ ଲାଗିଛନ୍ତି। ଏପରିକି ନଦୀ କୂଳରୁ ମଧ୍ୟ ମାଟି ମାଫିଆମାନେ ଶତାଧିକ ଟ୍ରିପ ମାଟି ଲୁଟି ନେଉଥିବା ଦେଖିବାକୁ ମିଳିଛି। ଏହି ମାଟି ଚୋରା ଚାଲାଣ ତହସିଲ ଅଧୀନରେ ଥିବା ସରକାରୀ ଜମିରୁ ଚାଲିଛି। ଏହାକୁ ସେ ରୋକିବା ନିମନ୍ତେ ସେ କେନ୍ଦ୍ରାପଡ଼ା ଜିଲାପାଳଙ୍କ ନିକଟରେ ଦାବି କରିଛନ୍ତି। ଜିଲାପାଳ ଯଦି କୌଣସି କାର୍ଯ୍ୟାନୁଷ୍ଠାନ ନ ନିଅନ୍ତି ତେବେ କଂଗ୍ରେସ ଦଳ ଆଗାମୀଦିନରେ ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛନ୍ତି। ଏ ସମ୍ପର୍କରେ ତହସିଲଦାର ତପନ ସେନାପତିଙ୍କୁ ପଚାରିବାରୁ ଗ୍ରାମବାସୀଙ୍କ ନିକଟରୁ ଅଭିଯୋଗ ପାଇବା ପରେ ସେ ସେଠାକୁ ଯାଇଥିଲେ। ସେଠାରେ ମାଟି ଖୋଳୁଥିବା ଜେସିବି ମାଲିକଙ୍କଠାରୁ ୧୦ ହଜାର ଟଙ୍କାର ଜରିମାନା ଆଦାୟ କରାଯାଇଛି। ମାଟି ବୋହୁଥିବା ଟ୍ରାକ୍ଟରଗୁଡିକ ସେଠାରୁ ପଳାଇ ଯାଇଥିଲା। ଆଗାମୀଦିନରେ ଚଢ଼ାଉ ଜାରି ରହିବ ବୋଲି ସେ କହିଛନ୍ତି।
