ଶୀତଦିନେ ତ୍ୱଚା ଅତ୍ୟଧିକ ଶୁଷ୍କ ହୋଇ ଫାଟିବା ଭଳି ସମସ୍ୟା ଦେଖାଯାଏ।
ତେଣୁ ଏହାର ଉପଯୁକ୍ତ ଯତ୍ନ ନ ନେଲେ ତ୍ୱଚା ଫାଟି ବେଳେବେଳେ ରକ୍ତ ବୋହିବା
ଭଳି ସମସ୍ୟା ବି ଦେଖିବାକୁ ମିଳିଥାଏ। ଶୀତଦିନେ ଶୁଷ୍କ ତ୍ୱଚାର କିଭଳି ଯତ୍ନ
ନେବେ ସେ ସମ୍ପର୍କରେ ଜାଣି ରଖନ୍ତୁ.. ଶୀତଦିନେ ତ୍ୱଚା ଅଧିକ ଶୁଷ୍କ ହୋଇଯାଉଥିଲେ ପ୍ରଚୁର ପାଣି ପିଅନ୍ତୁ। ଫଳରେ ତ୍ୱଚା ହାଇଡ୍ରେଟ୍ ରହିଥାଏ ଏବଂ ରୁକ୍ଷପଣ ଦୂର ହୋଇଥାଏ।
ଖାଦ୍ୟପେୟରେ ସନ୍ତୁଳନ ରକ୍ଷା କରନ୍ତୁ। ତ୍ୱଚାର ଶୁଷ୍କପଣ ଦୂର କରିବା ପାଇଁ ବିଭିନ୍ନ ପ୍ରକାରର ଫଳ ଓ ପନିପରିବା ଅଧିକ ଖାଆନ୍ତୁ। ବିଶେଷକରି ଋତୁକାଳୀନ ଫଳ ଓ ପନିପରିବାକୁ ଅଧିକ ଖାଆନ୍ତୁ। ଏହା ବ୍ୟତୀତ ସୁପ୍, ସାଲାଡ, ଜୁସ୍ ଏବଂ କ୍ଷୀର ମଧ୍ୟ ନିଜ ଡାଏଟରେ ସାମିଲ କରନ୍ତୁ।
ଶୀତଦିନେ ପିଇବା ପାଇଁ ହେଉ ବା ସ୍ନାନ କରିବା ପାଇଁ ହେଉ ଉଷୁମ ପାଣିର ବ୍ୟବହାର କରନ୍ତୁ। କିନ୍ତୁ ସାବଧାନ ଅଧିକ ଗରମ ପାଣି ବ୍ୟବହାର କରନ୍ତୁ ନାହିଁ। କାରଣ ଅଧିକ ଗରମ ପାଣି ସ୍ନାନ କିମ୍ବା ପିଇବା ପାଇଁ ବ୍ୟବହାର କଲେ ତାହା ତ୍ୱଚାର ତୈଳୀୟ ଅଂଶକୁ ନଷ୍ଟ କରି ଅଧିକ ଶୁଷ୍କ କରି ଦେଇଥାଏ।
ସ୍ନାନ କରିବା ପରେ ପରେ ତ୍ୱଚାରେ ମଶ୍ଚରାଇଜର ନିଶ୍ଚୟ ଲଗାନ୍ତୁ।
ଶୀତଦିନେ ସ୍ନାନ କରିବା ସମୟରେ ଯେକୌଣସି ପ୍ରକାରର ତେଲ ମାଲିସ କରନ୍ତୁ, ତ୍ୱଚାର ଶୁଷ୍କପଣ ଦୂର କରିବ।
ନିୟମିତ ବ୍ୟବଧାନରେ ଫେସିଆଲ ମଧ୍ୟ କରାଇ ନିଅନ୍ତୁ। ଏହାଫଳରେ ତ୍ୱଚାରେ ଥିବା ମୃତ ତ୍ୱଚା ବାହାରିଯାଇ ତ୍ୱଚା ନରମ ଓ କୋମଳ ରହିଥାଏ।
ଶୀତଦିନେ ଗରମ ପାଣିରେ ବେଳେବେଳେ ଅଧିକ ସମୟ ସ୍ନାନ କରିବା ପାଇଁ ଇଚ୍ଛା ହୁଏ। କିନ୍ତୁ ଅଧିକ ସମୟ ସ୍ନାନ କରିବା ଫଳରେ ତ୍ୱଚାର ତୈଳୀୟ ଅଂଶ କମ୍ ହୋଇଯାଏ। ତେଣୁ ଉଷୁମ ପାଣିରେ ୫ ରୁ ୧୦ ମିନିଟ୍ ହିଁ ସ୍ନାନ କରନ୍ତୁ।
