ଓ୍ବାଶିଂଟନ୍, ୪ା୭: ଆସନ୍ତା ୧୧ ତାରିଖରେ ଭର୍ଜିନ ଗାଲେକ୍ଟିକ୍ର ସ୍ପେସ୍ ଯାନରେ ଅରବପତି ରିଚାର୍ଡ ବ୍ରାନସନ୍ଙ୍କ ସହ ଭାରତୀୟ-ଆମେରିକୀୟ ସିରିଶା ବାନ୍ଦଲା ମହାକାଶ ଯିବେ। ଆନ୍ଧ୍ରପ୍ରଦେଶର ଗୁଣ୍ଟୁରରେ ଜନ୍ମିତ ୩୪ ବର୍ଷୀୟା ସିରିଶା ରିଚାର୍ଡଙ୍କ ସହ ଯାତ୍ରା କରୁଥିବା ୫ ମହାକାଶଯାତ୍ରୀଙ୍କ ମଧ୍ୟରୁ ଜଣେ। ଏରୋନଟିକାଲ ଇଞ୍ଜିନିୟରିଂ ଏବଂ ଏମ୍ବିଏ ଡିଗ୍ରୀଧାରୀ ସିରିଶା ଏବେ ଏହି କମ୍ପାନୀର ଗର୍ଭନମେଣ୍ଟ ଆଫାୟର୍ସ ଆଣ୍ଡ ରିସର୍ଚ୍ଚ ଅପରେଶନର ଉପାଧ୍ୟକ୍ଷ ଅଛନ୍ତି। ପୂର୍ବରୁ ଟେକ୍ସାସରେ ସେ ଏରୋ ସ୍ପେସ୍ ଇଞ୍ଜିନିୟର ଭାବେ କାର୍ଯ୍ୟ କରିଛନ୍ତି। ସିରିଶା ମହାକାଶ ଯିବା ଖବର ଆସିବା ପରେ ଆନ୍ଧ୍ରପ୍ରଦେଶ ସମେତ ସମଗ୍ର ଭାରତରୁ ତାଙ୍କ ନିକଟକୁ ଅଭିନନ୍ଦନର ସୁଅ ଛୁଟିଛି। ଆନ୍ଧ୍ରପ୍ରଦେଶ ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଟୁଇଟ୍ କରି ତାଙ୍କୁ ଶୁଭେଚ୍ଛା ଜଣାଇଛନ୍ତି। କଳ୍ପନା ଚାଓ୍ବଲା ଏବଂ ସୁନିତା ଓ୍ବିଲିୟମ୍ସଙ୍କ ପରେ ମହାକାଶ ଯାତ୍ରା କରିବାରେ ସିରିଶା ତୃତୀୟ ଭାରତୀୟ ବଂଶୋଭବ ହେବେ।
୨୦୧୫ରେ ସିରିଶା ଭର୍ଜିନ ଗାଲାକ୍ଟିକ୍ରେ ଗଭର୍ନମେଣ୍ଟ ଆଫାୟର୍ସରେ ମ୍ୟାନେଜର ଭାବେ ଯୋଗ ଦେଇଥିଲେ। ଏହାପରଠାରୁ ତାଙ୍କ ପଦୋନ୍ନତି ହୋଇଆସିଛି। ନିକଟରେ ୭୪୭ ପ୍ଲେନ ଦ୍ୱାରା ମହାକାଶକୁ କୃତ୍ରିମ ଉପଗ୍ରହ ପ୍ରେରଣ କରିଥିବା ଭର୍ଜିନ ଅରବିଟ୍ର ଓ୍ବାଶିଂଟନ୍ ଅପରେଶନର ଦାୟିତ୍ୱ ମଧ୍ୟ ସେ ତୁଲାଉଛନ୍ତି। ପର୍ଡୁଏ ୟୁନିଭର୍ସିଟିରୁ ସ୍ନାତକ ଡିଗ୍ରୀ ହାସଲ ପରେ ସିରିଶା ଜର୍ଜଟାଉନ ୟୁନିଭର୍ସିଟିରେ ଏମ୍ବିଏ କରିଥିଲେ। ବ୍ରାନସନ୍ ମହାକାଶ ଯିବା ସମ୍ପର୍କରେ ଗୁରୁବାର ତାଙ୍କ କମ୍ପାନୀ ଭର୍ଜିନ ଗାଲାକ୍ଟିକ୍ ପକ୍ଷରୁ ସୂଚନା ଦିଆଯାଇଥିଲା। ଏହା ପୂର୍ବରୁ ବ୍ଲୁ ଅରିଜିନ୍ ତଥା ଆମାଜନ ପ୍ରତିଷ୍ଠାତା ଜେଫ୍ ବେଜୋସ୍ ଜୁଲାଇ ୨୦ରେ ମହକାଶ ଯାତ୍ରା କରିବାକୁ ଘୋଷଣା କରିଛନ୍ତି। ଆମାଜନ୍, ଭର୍ଜିନ ଏବଂ ସ୍ପେସ୍ ଏକ୍ସ ବର୍ତ୍ତମାନ ବ୍ୟବସାୟିକ ମହାକାଶ ଭ୍ରମଣ ନିମନ୍ତେ ଏକ ପ୍ରକାର ପ୍ରତିଯୋଗିତାରେ ଲାଗିଛନ୍ତି।
