ଢେଙ୍କାନାଳ ଅଫିସ୍, ୧୪।୧: ଢେଙ୍କାନାଳର ବଜରଙ୍ଗ କ୍ଲବର ୨୫ବର୍ଷ ପୂର୍ତ୍ତି ଉପଲକ୍ଷେ ସ୍ଥାନୀୟ ମିନି ଷ୍ଟାଡିୟମ୍ରେ ଶୁକ୍ରବାର ସନ୍ଧ୍ୟାରେ ଉଦ୍ଘାଟିତ ହୋଇଛି ରୌପ୍ୟଜୟନ୍ତୀ ସମାରୋହ ଆଗ୍ନେୟ-୨୦୨୩। ସ୍ବୟମ୍ ପାଢ଼ୀ, ଅସୀମା ପଣ୍ଡାଙ୍କ ମନଛୁଅଁା ଗୀତ, ପପୁ ପମ୍ପମ୍ଙ୍କ ହାସ୍ୟାଭିନୟ ସାଙ୍ଗକୁ ଆଖି ଝଲସାଇବା ଭଳି ରଙ୍ଗାରଙ୍ଗ କାର୍ଯ୍ୟକ୍ରମ ଦର୍ଶକଙ୍କୁ ବିଭୋର କରିଥିଲା।
ଉଦ୍ଘାଟନୀ ସନ୍ଧ୍ୟାକୁ ଜିଲାପାଳ ସରୋଜ କୁମାର ସେଠୀ ଉଦ୍ଘାଟନ କରି କହିଲେ, ଯୁବଗୋଷ୍ଠୀ ସେବାକାର୍ଯ୍ୟର ଉଦାହରଣ ହେଉଛି ବଜରଙ୍ଗ କ୍ଲବ। ଯୁବପିଢ଼ି ଉତ୍ସାହିତ ହେଲେ ଜିଲାର ଚିତ୍ର ବଦଳିବ। ମୁଖ୍ୟ ଅତିଥି ଭାବେ ଯୋଗଦେଇ ଓଲିଉଡ୍ ଅଭିନେତା ଆକାଶଦାସ ନାୟକ କହିଲେ, ସମସ୍ତଙ୍କ ମନରେ ତ୍ୟାଗ ଓ ସେବାର ଭାବନା ବଞ୍ଚତ୍ ରହିବା ଉଚିତ। ନିଜ ମାଟି ପାଇଁ ବଡ଼ ସ୍ବପ୍ନ ଦେଖିଲେ ସମସ୍ତେ ଆଗକୁ ବଢ଼ିପାରିବା। ବିଶିଷ୍ଟ ବାୟୋଟେକ୍ନୋଲୋଜି ଗବେଷକ ପଦ୍ମଶ୍ରୀ ପ୍ରଫେସର ଏ.ପି. ଦାସ, ଚଳଚ୍ଚିତ୍ର ଅଭିନେତା ଆକାଶଦାସ ନାୟକ, ସାମାଜିକ କର୍ମୀ ଅଭିମନ୍ୟୁ ଦାସ, ଜିଲାପାଳ ସେଠୀଙ୍କୁ ‘ବଜରଙ୍ଗ ସମ୍ମାନ’ରେ ସମ୍ମାନିତ କରାଯାଇଥିଲା। କାର୍ଯ୍ୟକାରୀ ସମ୍ପାଦକ ସନ୍ଦୀପ ଷଡ଼ଙ୍ଗୀ ମଞ୍ଚାସୀନ ଥିଲେ। ଏହି ଅବସରରେ କଣ୍ଠଶିଳ୍ପୀ ସ୍ବୟମ୍ ପାଢ଼ୀଙ୍କ କଣ୍ଠରେ ତୁ ମୋ ନୂଆ ସାୟରି… ଭରପୂର କରତାଳି ସାଉଁଟିଥିଲା। କୋଲକାତାର ଅବ୍ନବ ସାଂସ୍କୃତିକ ଅନୁଷ୍ଠାନର କଳାକାରଙ୍କ ଗଣେଶ ବନ୍ଦନା ନୃତ୍ୟ ଦର୍ଶକଙ୍କୁ ବିଭୋର କରିଥିଲା। ଉପସ୍ଥାପିକା ଲୁରିଆ କାର୍ଯ୍ୟକ୍ରମକୁ ସଂଯୋଜନା କରିଥିଲେ। ଶନିବାର ଏହାର ଉଦ୍ଯାପନୀ ଦିବସ ରହିଛି।
