ଭୋପାଳ,୯।୮: ମଧ୍ୟପ୍ରଦେଶରେ ପ୍ରବଳ ବର୍ଷା ଲାଗି ରହିଛି। ଏପରିସ୍ଥଳେ ସିନ୍ଦ୍ ନଦୀ କୂଳରେ ଥିବା ଅଶୋକ ନଗର ଅଞ୍ଚଳର ପଞ୍ଚାବଳୀ ଗାଁର ଲୋକଙ୍କ ମଧ୍ୟରେ ଏକ ପ୍ରକାର ପ୍ରତିଯୋଗିତା ଲାଗିଯାଇଥିଲା। ନଦୀରୁ ରୁପା କଏନ୍ ମିଳୁଥିବା ପ୍ରଚାର ହେବା ପରେ ଲୋକଙ୍କ ଭିଡ଼ ଜମା ହେବାରେ ଲାଗିଥିଲା। ରବିବାର କେତେକ ଗ୍ରାମବାସୀଙ୍କୁ ନଦୀରୁ ରୁପା କଏନ୍ ମିଳିଥିଲା। ଏହା ଗାଁରେ ପ୍ରଘଟ ହୋଇଥିଲା। ଲୋକେ ବର୍ଷାକୁ ଖାତିର ନ କରି କଏନ୍ ନେବାକୁ ନଦୀକୂଳରେ ପହଞ୍ଚି ଯାଇଥିଲେ। ଏହା ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଏସମ୍ପର୍କରେ ସ୍ଥାନୀୟ ଥାନା ଅଧିକାରୀଙ୍କୁ ପଚାରିବାରୁ ସେ ଏନେଇ ଖବର ଶୁଣିଥିବା ପ୍ରକାଶ କରିଛନ୍ତି। ତେବେ ରୁପା କଏନ୍ କେଉଁଠୁ ଆସିଲା ସେ ନେଇ ଲୋକଙ୍କ ମଧ୍ୟରେ ନାନା କଳ୍ପନା ଜଳ୍ପନା ପ୍ରକାଶ ପାଇଛି। କେହି ଏହାକୁ ଘରେ ରଖିଥିଲେ। ବନ୍ୟାପାଣିରେ ଘର ଭାସିଯିବାରୁ ଏସବୁ ଭାସି ଆସିଥିବା ଲୋକେ କହୁଛନ୍ତି। ଅପରପକ୍ଷରେ କେହି କେହି କହୁଛନ୍ତି ଯେ, ବହୁ ଲୋକ ଆସ୍ଥା ଓ ବିଶ୍ୱାସ ନେଇ ନଦୀରେ ମୁଦ୍ରା ବିସର୍ଜନ କରିଥାନ୍ତି। ଏସବୁ ମୁଦ୍ରା ନଦୀ କୂଳରେ ଥିବା କୌଣସି ଧାର୍ମିକ ସ୍ଥଳ ଅଞ୍ଚଳରେ ବିସର୍ଜନ କରାଯାଇଥିବା ଅନୁମାନ ମଧ୍ୟ କରାଯାଉଛି। ବନ୍ୟା ଜଳର ପ୍ରବଳ ବେଗରେ ଏସବୁ ଭାସି ଆସିଛି। କଏନ୍ ପାଇବା ପାଇଁ ଲୋକେ ନଦୀକୁ ଲମ୍ଫ ଦେଉଥିବାର ଦୃଶ୍ୟ ଏଠାରେ ଦେଖିବାକୁ ମିଳୁଛି।
