ନୂଆଦିଲ୍ଲୀ, ୪।୧୦: ଉତ୍ତରପ୍ରଦେଶର ଲଖିମପୁର ଖେରି ହିଂସାରେ ୪ କୃଷକଙ୍କ ସମେତ ୮ ଜଣଙ୍କ ମୃତ୍ୟୁ ଘଟିଛି। ଏହାର ପ୍ରତିବାଦରେ ପଞ୍ଜାବ କଂଗ୍ରେସ ନେତା ନବଜ୍ୟୋତ୍ ସିଂ ସିଦ୍ଧୁ ସୋମବାର ରାଜଭବନ ଅଭିମୁଖେ ବିକ୍ଷୋଭ ଶୋଭାଯାତ୍ରାରେ ବାହାରିଥିବା ବେଳେ ତାଙ୍କୁ ଅଟକ ରଖାଯାଇଛି। ସେହିପରି ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନିଙ୍କୁ ଉତ୍ତରପ୍ରଦେଶ ସରକାର ଲଖିମ୍ପୁର ଖେରି ଯିବାକୁ ଅନୁମତି ଦେଇନାହାନ୍ତି। ଚନ୍ନିଙ୍କ ହେଲିକପ୍ଟରକୁ ହିଂସାକାଣ୍ଡ ଘଟିଥିବା ଜିଲାରେ ଅବତରଣ ପାଇଁ ପଞ୍ଜାବ ସରକାର ଅନୁମତି ମାଗିଥିଲେ। ସେହିପରି ପଞ୍ଜାବ ଉପମୁଖ୍ୟମନ୍ତ୍ରୀ ସୁଖଜିନ୍ଦର ସିଂ ରାନ୍ଧଓ୍ବାଙ୍କୁ ମଧ୍ୟରେ ଲକ୍ଷ୍ନୌରେ ଅବତରଣ ଲାଗି ଅନୁମତି ମିଳି ନ ଥିଲା। ଚଣ୍ଡିଗଡ଼ସ୍ଥିତ ପଞ୍ଜାବ ରାଜ୍ୟପାଳଙ୍କ କାର୍ଯ୍ୟାଳୟ ବାହାରେ କଂଗ୍ରେସ କର୍ମୀମାନେ ସିଦ୍ଧୁଙ୍କ ନେତୃତ୍ୱରେ ବିକ୍ଷୋଭ ପ୍ରଦର୍ଶନ କରିଥିଲେ। କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅଙ୍କୁ ତୁରନ୍ତ ଗିରଫ କରାଯିବାକୁ ସିଦ୍ଧୁ ଦାବି କରିଥିଲେ। ଚଣ୍ଡିଗଡ଼ ପୋଲିସ ସିଦ୍ଧୁଙ୍କ ସମେତ ଦଳୀୟ କର୍ମୀମାନଙ୍କୁ ଅଟକ ରଖିଛି। ଦଳର ରାଜ୍ୟ ସଭାପତି ପଦରୁ ଇସ୍ତଫା ଦେବାର ସପ୍ତାହେ ପରେ ସିଦ୍ଧୁ ଆନ୍ଦୋଳନରେ ଭାଗ ନେଇଛନ୍ତି। ଚନ୍ନିଙ୍କ ସହ ବୁଝାମଣା ପରେ ସେ ପୁଣିଥରେ ଦଳକୁ ଫେରିଥିଲେ।
