ଦାରିଙ୍ଗବାଡି, ୧।୫ (ଅରୁଣ ସାହୁ )-ଏବେ ବିଦ୍ୟାଳୟରେ ନାମ ଲେଖା ପ୍ରକ୍ରିୟା ଚାଲୁ ରହିଥିବା ବେଳେ ଛାତ୍ରୀଛାତ୍ରମାନଙ୍କ ଛାତ୍ରବାସରେ ରହଣି ପାଇଁ ଶିକଲ୍ସେଲ୍ର ପରୀକ୍ଷା ରିପୋର୍ଟ ଆବଶ୍ୟକ ପଡୁଛି। କିନ୍ତୁ ଗତ ଏକ ମାସ ହେଲା ଏହି ରୋଗର ନିଦାନ ହେଉ ନ ଥିବା ଅଭିଯୋଗ ହୋଇଛି। ଏଭଳି ଘଟଣା କନ୍ଧମାଳ ଜିଲା ଦାରିଙ୍ଗବାଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦେଖିବାକୁ ମିଳିଛି।
ପ୍ରକାଶ ଯେ ଦାରିଙ୍ଗବାଡି ଅଞ୍ଚଳର ସମସ୍ତ ରୋଗୀଙ୍କ ପାଇଁ ନିଃଶୁଳ୍କ ରୋଗ ନିରୂପଣ ସେବା ପାଇଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପରୀକ୍ଷାଗାର ରହିଛି। ସେଠାରେ ପ୍ରାୟ ସମସ୍ତ ପ୍ରକାର ରୋଗର ନିଦାନ ପାଇଁ ମାଗଣା ପରୀକ୍ଷା କରାଯାଉଛି । ବିଶେଷ କରି ରକ୍ତ ନମୁନା ସହ ମଳ, ମୂତ୍ର ଆଦି ପରୀକ୍ଷା କରାଯାଉଛି। ହେଲେ ଉକ୍ତ ବ୍ଲକ ଅଞ୍ଚଳରେ ଶିକଲସେଲ ରୋଗୀ ସଂଖ୍ୟା ଅଧିକା ରହୁଥିବା ବେଳେ ପ୍ରାୟ ଗୋଟିଏ ମାସ ହେଲା ପରୀକ୍ଷାକୁ ବନ୍ଦ କରିିଦିଆଯାଇଛି। କାରଣ ପଚାରିବାରୁ ଗୋଟିଏ ମାସ ହେଲା ଏହି ରୋଗର ପରୀକ୍ଷା ପାଇଁ ଆବଶ୍ୟକ କିଟ୍ ସରିଯାଇଛି। ଜିଲା ହେଡକ୍ୱାଟରକୁ ବାରମ୍ବାର ଚିଠି ଦ୍ୱାରା ଜଣାଇଦିଆଯାଇଥିଲେ ସୁଦ୍ଧା ଜିଲା ମୁଖ୍ୟ ଚିକିତ୍ସାଳୟ ପକ୍ଷରୁ କିଟ ପଠାଯାଉନାହିଁ। ଫଳରେ ଏହି ଚିକିତ୍ସାରୁ ଶହ ଶହ ରୋଗୀ ବଞ୍ଚିତ ହେଉଛନ୍ତି ବୋଲି ପରୀକ୍ଷାଗରର ଟେକନିସିଆନ ଅଧିକାରୀ ଦୁର୍ଗାପ୍ରସାଦ ଦାସ କହିଛନ୍ତି। ଗୁରୁବାର ଜଣେ ସପ୍ତମ ଶ୍ରେଣୀର ଛାତ୍ରୀ ଶାଳିନୀ ପ୍ରଧାନ ହଷ୍ଟେଲରେ ନାମ ଲେଖାଇବା ପାଇଁ ଆବଶ୍ୟକ ଶିକଲସେଲର ଟେଷ୍ଟିଂ ପାଇଁ ଆସି ନିରାଶ ହୋଇଛନ୍ତି। ତାଙ୍କୁ ବାଲିଗୁଡା କିମ୍ବା ଫୁଲବାଣୀ ଯାଇ ଟେଷ୍ଟିଂ କରାଇବାକୁ ପରୀକ୍ଷାଗରର କର୍ମଚାରୀମାନେ ପରାମର୍ଶ ଦେଇଥିଲେ।
ସୂଚନା ଯୋଗ୍ୟ, ଜିଲାର ଦାରିଙ୍ଗବାଡି ହେଉଛି ଦୁର୍ଗମ ବ୍ଲକ ଏବଂ ବିରାଟ ବ୍ଲକ ଭାବେ ପରିଚିତ। ସେମିତିରେ ଏହି ବ୍ଲକ ହେଡକ୍ୱାଟରକୁ ରୋଗୀଙ୍କୁ ଖର୍ଚ୍ଚ କରି ଆସିଥାନ୍ତି। ହେଲେ ଏବେ ଦାରିଙ୍ଗବାଡିଠାରୁ ବାଲିଗୁଡା ୫୦ କିମି ଓ ଫୁଲବାଣୀ ୧୧୦କିମି ଦୂରତା ଯାଇ ରକ୍ତ ପରୀକ୍ଷା କରାଇବାକୁ ପଡୁଥିବାରୁ ରୋଗୀମାନେ ଖର୍ଚ୍ଚାନ୍ତ ହେବା ସହ ହଇରାଣ ଭୋଗୁଛନ୍ତି। ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବିଭାଗ ପକ୍ଷରୁ ତୁରନ୍ତ ଘଟଣାକୁ ସଜ୍ଞାନକୁ ନେଇ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଉ ବୋଲି ଅନେକେ ଦାବି କରିଛନ୍ତି।
