ଯାଜପୁର ଅଫିସ,୧୮।୮: ଯାଜପୁର ଜିଲା ଟମକା ଥାନା ଏସ୍ଆଇ ମହମ୍ମଦ ସିରାଜଙ୍କ ଅର୍ଥ ଆଦାୟ ଭିଡିଓ ଭାଇରାଲ ମାମଲାରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ଧରିତ୍ରୀରେ ଖବର ପ୍ରକାଶନ ଏବଂ ମାନବାଧିକାର ସୁରକ୍ଷା କର୍ମୀ ବ୍ରଜମନ ବିଶ୍ୱାଳଙ୍କ ଟୁଇଟ୍ ଆଧାରରେ ଡିଜିପି ଅଭୟଙ୍କ ନିର୍ଦ୍ଦେଶକ୍ରମେ ଯାଜପୁର ଏସ୍ପି ଚରଣସିଂ ମୀନା ଏସ୍ଆଇ ସିରାଜଙ୍କୁ ଟମକା ଥାନାରୁ ହଟାଇନେଇ ଜିଲା ପୋଲିସ ମୁଖ୍ୟାଳୟରେ ଅବସ୍ଥାପିତ କରିଛନ୍ତି। କଳିଙ୍ଗନଗର ଅତିରିକ୍ତ ଏସ୍ପି ଜୟରାମ ଶତପଥୀଙ୍କୁ ଅଭିଯୋଗର ତଦନ୍ତ ପାଇଁ ଦାୟିତ୍ୱ ଦିଆଯାଇଛି। ସୂଚନାଯୋଗ୍ୟ ଯେ, ଏସ୍ଆଇ ସିରାଜ ହାଫ୍ ପ୍ୟାଣ୍ଟ ଓ ଟି-ଶାର୍ଟରେ ପୋଲିସ ଗାଡ଼ିରେ ରହି ସୁକିନ୍ଦା ଅଞ୍ଚଳର ଜଣେ ଯୁବକଙ୍କୁ ୨ ହଜାର ଟଙ୍କା ବାହାର କର ନ ହେଲେ ୧୦ ହଜାର ଟଙ୍କା ଫାଇନ କରିବି ବୋଲି ଧମକ ଦେଉଥିବା ଉକ୍ତ ଭିଡିଓ କ୍ଲିପ୍ରେ ଦେଖିବାକୁ ମିଳୁଛି। ଯୁବକ ଜଣକ ମା’ ମରିଯାଇଥିବା କଥା କହି କାକୁତିମିନତି ହେଉଥିଲେ ହେଁ ଏସ୍ଆଇ ସିରାଜ ହାତରେ ଏକ ମେଶିନ ଧରି ଟଙ୍କା ମାଗୁଥିବା ଦେଖିବାକୁ ମିଳିଛି। ଏହାସହ କାହିଁକି ବାଇକରେ ମାଡିକି ଆସିଲୁ ବୋଲି ପ୍ରଶ୍ନ କରିବା ସହ ତୋ ମା’ ମରିଗଲେ ମୁଁ କ’ଣ କରିବି ବୋଲି ସେ କହିଥିବା ଭିଡିଓରୁ ଜଣାପଡ଼ିଛି। ଉକ୍ତ ଭିଡିଓଙ୍କୁ ଢେଙ୍କାନାଳ ଜିଲାର ମାନବାଧିକାର ସୁରକ୍ଷା କର୍ମୀ ବିଶ୍ୱାଳ ଟୁଇଟ୍ ଯୋଗେ ମୁଖ୍ୟମନ୍ତ୍ରୀ, ଡିଜିପିଙ୍କ ଦୃଷ୍ଟି ଆକର୍ଷଣ କରିଥିଲେ।
