ଭୁବନେଶ୍ୱର,୭।୧୦: ଓଡ଼ିଶା ପୋଲିସ ସବ-ଇନ୍ସ୍ପେକ୍ଟର (ଏସ୍ଆଇ) ନିଯୁକ୍ତି ଜାଲିଆତିରେ ଛାନବିନ୍ ଯେତେ ଗଭୀର ହେଉଛି ସେତେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ମଙ୍ଗଳବାର କ୍ରାଇମ୍ ବ୍ରାଞ୍ଚ୍ ଏବେ ଏହି ମାମଲାରେ ଷଷ୍ଠ ମଧ୍ୟସ୍ଥ ଭାବେ ଗିରଫ ଚନ୍ଦନ ମଲ୍ଲିକଙ୍କର ରାଜନୈତିକ ସମ୍ପର୍କ ଉନ୍ମୋଚନ କରିଛି, ଯାହା ନୂଆ ରାଜନୈତିକ ଆଳୋଡ଼ନ ସୃଷ୍ଟି କରିଛି।
ସୋମବାର ସୋରୋରେ ଗିରଫ ହୋଇଥିବା ଚନ୍ଦନଙ୍କୁ କ୍ରାଇମ୍ ବ୍ରାଞ୍ଚ୍ ଏବେ ମାରାଥନ୍ ଜେରା କରି ପ୍ରମାଣ ସଂଗ୍ରହରେ ଲାଗିଛି। ବାଲେଶ୍ୱର ସଦର ବ୍ଲକର ଚାନ୍ଦିପୁର ଥାନା ଅଧୀନ ରଣସାହି ପଞ୍ଚାୟତର ତପସ୍ୱିନୀ ଗ୍ରାମରେ ଅବସ୍ଥିତ ଚନ୍ଦନଙ୍କ ଘରୁ କ୍ରାଇମ୍ ବ୍ରାଞ୍ଚ୍ ଟିମ୍ ତାଙ୍କୁ ଧରିଛି। ସୂଚନା ଅନୁଯାୟୀ, ପଞ୍ଚମ ମଧ୍ୟସ୍ଥ ଅରବିନ୍ଦ ଦାସଙ୍କୁ ରବିବାର ସିଂଲା ଥାନା ଅଧୀନ ନାବରା ଗ୍ରାମରୁ ଗିରଫ କରିବା ସମୟରେ ଚନ୍ଦନଙ୍କ ସହ ତାଙ୍କର ଲିଙ୍କ୍ ମିଳିଥିଲା।
ଜାଲିଆତିର ମୁଖ୍ୟ ଯୋଜନାକାରୀ କୁହାଯାଉଥିବା ପଞ୍ଚସଫ୍ଟ୍ ପ୍ରାଇଭେଟ୍ ଲିମିଟେଡ୍ର ମାଲିକ ଶଙ୍କର ପୃଷ୍ଟିଙ୍କର ଘନିଷ୍ଠ ସହଯୋଗୀ ଥିବା ଚନ୍ଦନ ଏକ ରାଜନୈତିକ ଦଳର ସ୍ଥାନୀୟ ନେତା ଓ ଯୁବ ନେତା ଭାବେ ପରିଚିତ। ସେ ନିଜକୁ ସମାଜସେବୀ ବୋଲି ମଧ୍ୟ ପରିଚୟ ଦିଅନ୍ତି। ବାଲେଶ୍ୱରର ରେମୁଣା ବିଧାନସଭା ନିର୍ବାଚନ ମଣ୍ଡଳୀରେ ତାଙ୍କର ରାଜନୈତିକ ପତିଆରା ରହିଛି। ବିଜୁ ଜନତା ଦଳ୍ (ବିଜେଡି)ର ସ୍ଥାନୀୟ ନେତା ଭାବେ ଚନ୍ଦନଙ୍କ ଫଟୋଗୁଡ଼ିକ ପୂର୍ବତନ ବାଲେଶ୍ୱର ସାଂସଦ ରବିନ୍ଦ୍ର ଜେନା ଓ ବିଜେଡି ଉପାଧ୍ୟକ୍ଷ ବବି ଦାସ୍ (ପ୍ରଣବ ପ୍ରକାଶ ଦାସ୍) ଆଦି ଉଚ୍ଚପଦସ୍ଥ ନେତାମାନଙ୍କ ସହ ଭାଇରାଲ ହେବାରେ ଲାଗିଛି, ଯାହା ତାଙ୍କର ରାଜନୈତିକ ସମ୍ପର୍କର ଗଭୀରତା ଉପରେ ଗମ୍ଭୀର ପ୍ରଶ୍ନ ଉଠାଇଛି।
ଏହାପରେ ବିଜେଡି ନେତାମାନେ ଏହି ସମ୍ପର୍କ ଜବାବ ଦେବାକୁ ବାଧ୍ୟ ହୋଇଛନ୍ତି। କ୍ରାଇମ୍ ବ୍ରାଞ୍ଚ୍ ଏବେ ଚନ୍ଦନଙ୍କୁ ପଚରାଉଚରା ବେଳେ ଘଟଣା ସହ ରାଜନୈତିକ ଲିଙ୍କ୍ର ସୁରାକ କରୁଛି। ଏହି ମାମଲାରେ ବଡ଼ ଅଧିକାରୀ, ନେତା ଓ ପ୍ରଭାବଶାଳୀଙ୍କର ସମ୍ପୃକ୍ତତାର ଅଭିଯୋଗ ଉଠୁଥିବାରୁ ଛାନବିନ ପାଇଁ ଏହା ବଡ଼ ଚ୍ୟାଲେଞ୍ଜ ସୃଷ୍ଟି କରିଛି।
ଅନ୍ୟପଟେ ଶଙ୍କର ପୃଷ୍ଟି ଓ ତାଙ୍କ ସହଯୋଗୀ କଟକର ବାଙ୍କୀରୁ ମୁନା ମହାନ୍ତି ଫେରାର ଅବସ୍ଥାରେ ଅଛନ୍ତି। କ୍ରାଇମ୍ ବ୍ରାଞ୍ଚ୍ ଏବେ ପର୍ଯ୍ୟନ୍ତ ସେମାନଙ୍କର ପତ୍ତା ପାଇପାରିନାହିଁ। ରବିବାର ଭୁବନେଶ୍ୱରର ନନ୍ଦନକାନନ ଥାନା ଅଧୀନ ରଘୁନାଥପୁରର ପ୍ଲଟ୍ ନଂ.୩୨୦/୩୫୯୦ରେ ଅବସ୍ଥିତ ଅନଲାଇନ୍ ପରୀକ୍ଷା କେନ୍ଦ୍ର ‘ଶ୍ରୀ ଲିଙ୍ଗରାଜ୍ ଇନ୍ଫୋସୋଲ୍’ରେ କ୍ରାଇମ୍ ବ୍ରାଞ୍ଚ୍ ଚଢ଼ାଉ କରିଥିଲା। ଆଗାମୀ ଦିନରେ ଅନ୍ୟ ଅନଲାଇନ୍ ପରୀକ୍ଷା କେନ୍ଦ୍ରଗୁଡ଼ିକରେ ମଧ୍ୟ ଛାନବିନ ହେବାରେ ଲାଗିଛି।
ଏହି ଜାଲିଆତିରେ ୧୧୪ ଜଣ ପରୀକ୍ଷାର୍ଥୀ ଓ ୫ ଜଣ ମଧ୍ୟସ୍ଥଙ୍କ ସମେତ ମୋଟ ୧୧୯ ଜଣ ଗିରଫ ହୋଇ ଜେଲ୍ରେ ରହିଛନ୍ତି। କ୍ରାଇମ୍ ବ୍ରାଞ୍ଚ୍ ଏହି ସଂଗଠିତ ଅପରାଧୀ ସିଣ୍ଡିକେଟ୍ର ପୂର୍ଣ୍ଣ ଖୁଲାସା ପାଇଁ ଚେଷ୍ଟା ଚଳାଇଛି।
