ବଲାଙ୍ଗୀର, ୧୦।୯ (ବୀରେନ୍ଦ୍ର କୁମାର ଝାଙ୍କର): ଟିଟିଲାଗଡ଼ ଗସ୍ତରେ ଥିବା ତିନିଜଣ ମନ୍ତ୍ରୀଙ୍କୁ ଶନିବାର ଯୁବ କଂଗ୍ରେସ କର୍ମୀମାନେ କଳାପତାକା ଦେଖାଇ ବିରୋଧ କରିଥିଲେ। ମନ୍ତ୍ରୀଙ୍କ ପଟୁଆର ଯାଉଥିବାବେଳେ ସେମାନେ କଳାପତାକା ଦେଖାଇ ନାରାବାଜି କରିଥିଲେ। ଟିଟିଲାଗଡ ନିର୍ବାଚନ ମଣ୍ଡଳୀ ଅନ୍ତର୍ଗତ ଇଚ୍ଗଁାଠାରେ ବିଭିନ୍ନ ପ୍ରକଳ୍ପର ଶିଳାନ୍ୟାସ କାର୍ଯ୍ୟକ୍ରମରେ ଯୋଗଦେବା ପାଇଁ ଶ୍ରମମନ୍ତ୍ରୀ ସାରଦା ପ୍ରସାଦ ନାୟକ, ଗ୍ରାମ୍ୟ ଉନ୍ନୟନ ମନ୍ତ୍ରୀ ପ୍ରୀତିରଞ୍ଜନ ଘଡେଇ ଏବଂ ପରିବହନ ମନ୍ତ୍ରୀ ଟୁକୁନି ସାହୁଙ୍କ ସହ ଭଟଲି ବିଧାୟକ ସୁଶାନ୍ତ ସିଂ ଯାଉଥିଲେ। ଟିଟିଲାଗଡ଼ ବ୍ଲକ ଡିଆଁଟନ ଗଁାରେ ଯୁବ କଂଗ୍ରେସର କେତେଜଣ କର୍ମୀ କଳା ପତାକା ଦେଖାଇଥିଲେ। କୁରସୁଡ୍ଠାରେ ଉନ୍ଦେର ନଦୀରେ ମଞ୍ଜୁର ବ୍ୟାରେଜ୍କୁ ଅନ୍ୟତ୍ର ସ୍ଥାନାନ୍ତରଣର ପ୍ରତିବାଦ ସହ ପ୍ରଧାନମନ୍ତ୍ରୀ ଫସଲ ବୀମା ଯୋଗାଇବାରେ ପାତରଅନ୍ତର ନୀତି ଅବଲମ୍ବନ, ନୂତନ ବସ୍ଷ୍ଟାଣ୍ଡ ନିର୍ମାଣ ଏବଂ ଟିଟିଲାଗଡ ସ୍ବତନ୍ତ୍ର ଜିଲା ଗଠନ ପ୍ରସଙ୍ଗକୁ ନେଇ ନାରାବାଜି କରାଯାଇଥିଲା। ଟିଟିଲାଗଡ ଜିଲା ଗଠନ କେବେ ବୋଲି କଂଗ୍ରେସ କର୍ମୀମାନେ ପ୍ରଶ୍ନ କରିଥିଲେ।
