ଲକ୍ଷ୍ନୌ,୧୦।୧: ଉତ୍ତରପ୍ରଦେଶର ଗାଜିଆବାଦରେ ଅନନ୍ୟ ବିବାହର ଏକ ଘଟଣା ସାମ୍ନାକୁ ଆସିଛି। ଯେଉଁଠାରେ ମଧ୍ୟସ୍ଥି ସାନ ଭାଇକୁ ଦେଖାଇ ଜଣେ କନ୍ୟାଙ୍କର ବଡ଼ଙ୍କ ସହ ବିବାହ କରାଇଥିଲେ। ଶାଶୁଘରେ ପହଞ୍ଚିବା ପରେ ଶାଶୁ ତାଙ୍କୁ ୪ ପୁଅଙ୍କ ସହ ସମ୍ପର୍କ ରଖିବାକୁ ଚାପ ପକାଉଥିଲେ। ଏପରିକି ନବ ବିବାହତାଙ୍କୁ ମାଡ଼ ମଧ୍ୟ ଦିଆଯାଉଥିଲା। ଏଥିରେ ବିରକ୍ତ ହୋଇ ନବବଧୂ ଜଣଙ୍କ ଦୁଇମାସ ପରେ ଶାଶୁଙ୍କ ଘରୁ ତାଙ୍କ ବାପଘରକୁ ଚାଲିଆସିଥିବା ପୀଡ଼ିତା ଜଣକ ଅଭିଯୋଗ କରିଛନ୍ତି। ଏହା ପରେ ପୋଲିସ ତାଙ୍କ ସ୍ବାମୀଙ୍କ ସମେତ ୬ ଜଣଙ୍କ ବିରୋଧରେ ଏକ ମାମଲା ରୁଜୁ କରି ତଦନ୍ତ ଚଳାଇଛି।
ସିହାନି ଗେଟ୍ ଅଞ୍ଚଳରେ ରହୁଥିବା (୧୯) ବର୍ଷୀୟା ପୀଡ଼ିତା କହିଛନ୍ତି ଯେ, ତାଙ୍କ ମା’ଙ୍କ ନିର୍ଦ୍ଦେଶରେ ବିବାହ ପାଇଁ ମୁରାଦନଗରର ଜଣେ ଯୁବକଙ୍କୁ ଦେଖିଥିଲେ। ପସନ୍ଦ ହେବା ପରେ ବିବାହ ସ୍ଥିର ହୋଇଥିଲା । ୨୧ ଫେବୃଆରୀ ୨୦୨୦ରେ ଯେତେବେଳେ ବିବାହ ପାଇଁ ବରପକ୍ଷ ତାଙ୍କ ଘରକୁ ଆସିଲେ ସେତେବେଳେ ବର ହୋଇ ବରଙ୍କ ବଡ଼ ଭାଇ ଆସିଥିଲେ। ଯାହାକୁ ଦେଖି କନ୍ୟା ଜଣକ ଏହାକୁ ବିରୋଧ କରିଥିଲେ। ମଧ୍ୟସ୍ଥି କହିଥିଲେ ଯେ, ଏ ହେଉଛି ପୁଅର ବଡ଼ ଭାଇ। ବର ଫେରିବା ଭଲ ନୁହେଁ।
ତେବେ କନ୍ୟାଙ୍କ ମାତାପିତା ରାଜି ହେବା ପରେ ପଡ଼ିତା ମଧ୍ୟ ରାଜି ହୋଇ ପୁଅର ବଡ଼ ଭାଇଙ୍କୁ ବିବାହ କରିଥିଲେ। କିନ୍ତୁ ଘରେ ପହଞ୍ଚିବା ପରେ ସେ ନିଶା ସେବନ କରିଥିଲେ ବୋଲି ଜାଣିବାକୁ ପାଇଥିଲେ। ପ୍ରଥମ ଦିନରେ ସେ ଡ୍ରଗ ଇଞ୍ଜେକ୍ସନ ଦେଇ ଶୋଇପଡ଼ିଥିଲେ। ପୀଡ଼ିତାଙ୍କ ଅନୁଯାୟୀ, ସ୍ବାମୀଙ୍କ ଦୁଇ ବଡ଼ ଭାଇ ଏବଂ ଗୋଟିଏ ସାନ ଭାଇ ଅଛନ୍ତି। ବଡ଼ ଭାଇମାନେ ବିବାହିତ। ଅଭିଯୋଗ ହୋଇଛି ଯେ, ବିବାହର ଦ୍ୱିତୀୟ ଦିନରୁ ଶାଶୁ ଅନ୍ୟ ୩ ପୁଅଙ୍କ ସହ ସମ୍ପର୍କ ରଖିବାକୁ ଚାପ ପକାଉଥିଲେ। ଏପରିକି ଟ୍ରକ କିଣିବା ପାଇଁ ବାପଘରୁ ୩ ଲକ୍ଷ ଆଣିବା ପାଇଁ କହୁଥିଲେ।
ଦିନେ ଶାଶୁ, ସ୍ବାମୀ ଏବଂ ବଡ଼ ଯାଆ ତାଙ୍କୁ ମାଡ଼ ମାରିଥିଲେ। ସେହିଦିନଠାରୁ ସେ ଶାଶୁଘର ଛାଡ଼ି ଆସି ବାପଘରେ ରହୁଥିଲେ। ଏନେଇ ସେ ସିହାନୀ ଗେଟ୍ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଏସ୍ଏଚ୍ଓ କୃଷ୍ଣ ଗୋପାଳ ଶର୍ମା କହିଛନ୍ତି ଯେ, ସେ ଏକ କେସ୍ କରିଛନ୍ତି। ପ୍ରମାଣ ଆଧାରରେ ଅଧିକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
