ଢେଙ୍କାନାଳ,୧୪ା୭(ରତନ ନାୟାର): ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍କଓ୍ବୋଇ)ର ଲାଭ ନେଇଥିବା ଦର୍ଶାଇ ବ୍ୟାନରରେ ଛାପିଲେ ଯୁବକଙ୍କ ନାମ। ସ୍ତ୍ରୀଙ୍କ ଫଟୋ ମଧ୍ୟ ବ୍ୟବହାର କଲେ। ହେଲେ ସମ୍ପୃକ୍ତ ଯୁବକ ଯେ ରାଜ୍ୟ ସରକାରଙ୍କ ଏଭଳି ବହୁମୁଖୀ ସ୍ବାସ୍ଥ୍ୟ ଯୋଜନାର ହିତାଧିକାରୀ ନୁହନ୍ତି, ତାହା ସ୍ପଷ୍ଟ ହୋଇଛି। ‘୫-ଟି’ ସଚିବଙ୍କ ପରିଦର୍ଶନ ବେଳେ ନିଜର ପାରିବାପଣିଆ ଜାହିର କରିବା ଏବଂ ସଚିବଙ୍କୁ ଭୁତାଇବାକୁ ଯାଇ ଢେଙ୍କାନାଳ ସ୍ବାସ୍ଥ୍ୟ ବିଭାଗ ଏଭଳି ତ୍ରୁଟିପୂର୍ଣ୍ଣ ତଥ୍ୟ ପ୍ରଦର୍ଶନ କରାଯାଇଥିବା ଚର୍ଚ୍ଚାର ବିଷୟ ହୋଇଛି। ଏହା ଧରାପଡ଼ିବା ପରେ ଜିଲା ସ୍ବାସ୍ଥ୍ୟ ବିଭାଗ ମୁଖିଆ ନିଜ ମୁଣ୍ଡରୁ ଦୋଷ ଝାଡ଼ିବାକୁ ଆପ୍ରାଣ ଉଦ୍ୟମ ଜାରି ରଖିଛନ୍ତି। ବିଭାଗୀୟ ଅପାରଗତା ଲୁଚାଇବାକୁ ସେ ବ୍ୟାନର ଛାପିଥିବା ଦୋକାନୀଙ୍କ ଉପରକୁ ଦୋଷ ଠେଲିଛନ୍ତି, ଯାହା ଏବେ ଆଲୋଚନାର କେନ୍ଦ୍ରବିନ୍ଦୁ ପାଲଟିଛି।
ଘଟଣାରୁ ଜଣାପଡ଼ିଛି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଗତ ୧୧ ତାରିଖରୁ ଦୁଇଦିନିଆ ଜିଲା ଗସ୍ତରେ ଆସିଥିଲେ ୫-ଟି ସଚିବ ଭି.କେ. ପାଣ୍ଡିଆନ୍। ଗତ ବୁଧବାର ପୂର୍ବାହ୍ନ ୮ଟା ୪୫ରେ ସେ ଜିଲା ମୁଖ୍ୟ ଚିକିତ୍ସାଳୟ ପରିଦର୍ଶନ କରିଥିଲେ। ସଚିବଙ୍କ ଗସ୍ତ ପୂର୍ବରୁ ବାହାବା ନେବାକୁ ଚିକିତ୍ସାଳୟ କର୍ତ୍ତୃପକ୍ଷ ଓ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରିଥିଲା। ତେବେ ବିଏସ୍କଓ୍ବୋଇ ହେଲ୍ପ ଡେସ୍କରେ ଲାଗିଥିବା ଏକ ବ୍ୟାନର ପାଇଁ ଏବେ ବିଭାଗର ମୁଣ୍ଡବ୍ୟଥା ବଢ଼ିଯାଇଛି। ଉକ୍ତ ବ୍ୟାନରରେ ବିଏସ୍କଓ୍ବୋଇରେ ସାମିଲ ହୋଇ ନ ଥିବା କଙ୍କଡ଼ାହାଡ଼ ବ୍ଲକ ଅଞ୍ଚଳର ଜଣେ ଯୁବକଙ୍କ ନାମ ଲେଖାଯାଇଥିଲା। ଯୁବକଙ୍କ ବଦଳରେ ତାଙ୍କ ସ୍ତ୍ରୀଙ୍କ ଫଟୋ ମଧ୍ୟ ଏଥିରେ ଛପାଯାଇଥିଲା। ହେଲେ ବିଏସ୍କଓ୍ବୋଇରେ ଚିକିତ୍ସା ସେବାର ଲାଭ ଉଠାଇବା ତ ଦୂରର କଥା, ସେ କେବେ ଅସ୍ତ୍ରୋପଚାର ହୋଇ ନ ଥିବା କହିଛନ୍ତି। କେବଳ ଏତିକି ନୁହେଁ, ଯେଉଁ ବେସରକାରୀ କ୍ଲିନିକ୍ରେ ସେ ଅସ୍ତ୍ରୋପଚାର ହୋଇଛନ୍ତି ବୋଲି ରେକର୍ଡଭୁକ୍ତ କରାଯାଇଥିଲା, ତାହା ମଧ୍ୟ ମିଥ୍ୟା ବୋଲି ଜଣାପଡ଼ିଛି। ଏହାକୁ ସମ୍ପୃକ୍ତ କ୍ଲିନିକ୍ କର୍ତ୍ତୃପକ୍ଷ ମଧ୍ୟ ସ୍ବୀକାର କରିଛନ୍ତି।
ଏହି ଖବର ପ୍ରଘଟ ହେବା ପରେ ଜିଲା ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷ ଓ ଜିଲା ସ୍ବାସ୍ଥ୍ୟ ବିଭାଗରେ ଅଡୁଆ ବଢ଼ିଛି। ଉକ୍ତଦିନ ୫-ଟି ସଚିବଙ୍କ ଆଗରେ ଏଭଳି ଆହୁରି ଅନେକ ତ୍ରୁଟିପୂର୍ଣ୍ଣ ତଥ୍ୟ ପ୍ରଦର୍ଶନ କରାଯାଇଥିବା ଆଶଙ୍କାକୁ ଏଡ଼ାଇ ଦିଆଯାଇପାରୁନାହିଁ। ପ୍ରଦର୍ଶିତ ବ୍ୟାନରଗୁଡ଼ିକୁ ଯାଞ୍ଚ କଲେ ଏହା ସ୍ପଷ୍ଟ ହେବ ବୋଲି ସାଧାରଣରେ ମତ ପ୍ରକାଶ ପାଇଛି। ଅନ୍ୟପଟେ ଘଟଣା ଜଣାପଡ଼ିବା ପରେ ତରବରିଆ ଭାବେ ବ୍ୟାନର ବାହାର କରି ଦିଆଯାଇଛି। ଏପରି କି ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ କେତେଜଣ ମୁଷ୍ଟିମେୟ କର୍ମଚାରୀ ଏହାକୁ ଚପାଇ ଦେବାକୁ ଉଦ୍ୟମ କରିଥିବା ଜଣାପଡ଼ିଛି।
ଘଟଣା ସମ୍ପର୍କରେ ଜିଲା ମୁଖ୍ୟ ଚିକିତ୍ସାଳୟ ଦାୟିତ୍ୱରେ ଥିବା ଅତିରିକ୍ତ ଜିଲା ଚିକିତ୍ସାଧିକାରୀ ଡା. ଜୟକୃଷ୍ଣ ନାୟକଙ୍କ ପ୍ରତିକ୍ରିୟା ଲୋଡ଼ାଯାଇଥିବା ବେଳେ ସେ ଏ ବିଷୟରେ କିଛି ଜାଣି ନ ଥିବା କହିଥିଲେ। ପ୍ରିଣ୍ଟିଂ କରିଥିବା ଦୋକାନୀ ଭୁଲ୍ କରିଛି କହି ଫୋନ୍ କାଟି ଦେଇଥିଲେ। ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ କହିଲେ, ଏଭଳି ଭୁଲ୍ ହେବା କଥା ନୁହେଁ। ଘଟଣା ସମ୍ପର୍କରେ ଶୁଣିବା ପରେ ବିଭିନ୍ନ ଲୋକଙ୍କୁ ସେ ପଚାରିଥିଲେ। ପ୍ରିଣ୍ଟିଂ ସମୟରେ ଭୁଲ୍ ହୋଇଥିବା ସେ ଶୁଣିଛନ୍ତି। ଘଟଣାର ତଦନ୍ତ କରିବା ପାଇଁ ଅତିରିକ୍ତ ଜିଲା ମୁଖ୍ୟ ଚିକିତ୍ସାଧିକାରୀ (ମେଡିକାଲ)ଙ୍କୁ ଜଣାଇବେ ବୋଲି ସେ କହିଛନ୍ତି। ‘୫-ଟି’ ସଚିବଙ୍କ ଜିଲା ଚିକିତ୍ସାଳୟ ପରିଦର୍ଶନ ବେଳେ ବିଏସ୍କଓ୍ବୋଇ ସମ୍ପର୍କିତ ମିଥ୍ୟା ତଥ୍ୟ ପ୍ରଦର୍ଶନ କରାଯିବା ସାଧାରଣରେ ଆଲୋଚନାର ବିଷୟ ହୋଇଛି। ଏହାକୁ ବିଭାଗୀୟ ଅଧିକାରୀ ଏବଂ ଠିକା କର୍ମଚାରୀ ହାଲୁକା ଭାବେ ନେବା ଏହି ଯୋଜନାର ତ୍ରୁଟିଶୂନ୍ୟ କାର୍ଯ୍ୟକାରିତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
