କଟକ ଅଫିସ,୨୦ା୮: କଟକରେ ଡେଙ୍ଗୁ ମୃତ୍ୟୁକୁ ନେଇ ସ୍ବାସ୍ଥ୍ୟ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି। ସମ୍ପୃକ୍ତ ଯୁବକଙ୍କର ଡେଙ୍ଗୁ ଚିହ୍ନଟ ହେବା ପରେ ସେ ଚିକିତ୍ସିତ ହେଉଥିବା ଘରୋଇ ଚିକିତ୍ସାଳୟକୁ ଶୁକ୍ରବାର କାରଣ ଦର୍ଶାଅ ନୋଟିସ ଜାରି କରାଯାଇଛି। ମିଳିଥିବା ସୂଚନା ଅନୁଯାୟୀ, କଟକ ମହାନଗର ନିଗମ(ସିଏମ୍ସି) ୨୬ନଂ. ଓ୍ବାର୍ଡ ଅଧୀନ ଭଗତପୁର ଅଞ୍ଚଳର ଦୀପକ ମୁଦୁଲି(୩୬) ଡେଙ୍ଗୁ ଆକ୍ରାନ୍ତ ହୋଇଥିବା ନେଇ ଗତ ୧୫ ତାରିଖରେ ରକ୍ତ ନମୁନା ପରୀକ୍ଷାରୁ ଜଣାପଡ଼ିଥିଲା। ଏସ୍ସିବି ମେଡିକାଲରେ ଡେଙ୍ଗୁ ୱାର୍ଡ ରହିଥିଲେ ମଧ୍ୟ ଯୁବକ ଜଣଙ୍କ ସେଠାରେ ଚିକିତ୍ସିତ ନ ହୋଇ ସ୍ଥାନୀୟ ଏକ ଘରୋଇ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ଡେଙ୍ଗୁ ଆକ୍ରାନ୍ତଙ୍କ ପାଇଁ ପ୍ରଥମ ୪୮ ଘଣ୍ଟା ଗୁରୁତ୍ୱପୂର୍ଣ୍ଣ ହୋଇଥିବାରୁ ଘରୋଇ ଚିକିତ୍ସାଳୟ ଡେଙ୍ଗୁରୋଗୀଙ୍କୁ ତୁରନ୍ତ ଏସ୍ସିବି ମେଡିକାଲ ପଠାଇବା ପାଇଁ ସରକାରୀ ନିର୍ଦ୍ଦେଶାନାମା ରହିଛି। ହେଲେ ଏଠାରେ ସରକାରୀ ନିର୍ଦ୍ଦେଶାନାମାକୁ ବେଖାତିର କରି ଉକ୍ତ ଘରୋଇ ଚିକିତ୍ସାଳୟ ପକ୍ଷରୁ ଡେଙ୍ଗୁ ଆକ୍ରାନ୍ତ ଯୁବକଙ୍କ ଚିକିତ୍ସା କରାଯାଇଥିଲା। ମାତ୍ର ଅବସ୍ଥା ଗୁରୁତର ହେବାରୁ ଦୀପକଙ୍କୁ ପରିବାର ଲୋକେ ସେଠାରୁ ଏସ୍ସିବି ମେଡିକାଲ ନେଇଥିଲେ। ସେଠାରେ ପହଞ୍ଚତ୍ବାର କିଛି ଘଣ୍ଟା ମଧ୍ୟରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଦୀପକ ପ୍ରାଥମିକ ଅବସ୍ଥାରେ ଏସ୍ସିବି ମେଡିକାଲ ଯାଇଥିଲେ ମଧ୍ୟ ସେଠାରେ ଭିଡ଼ ଦେଖି ଘରୋଇ ଚିକିତ୍ସାଳୟକୁ ପଳାଇ ଆସିଥିଲେ। ତେବେ ସେ ରାୟଗଡ଼ାରୁ କଟକ ଫେରିବା ପରେ ତାଙ୍କୁ ଜ୍ୱର ହୋଇଥିଲା। ତେଣୁ ରାୟଗଡ଼ାରୁ ଡେଙ୍ଗୁ ସଂକ୍ରମିତ ହୋଇ କଟକ ଆସିଛନ୍ତି ବୋଲି ସିଏମ୍ସି ସ୍ବାସ୍ଥ୍ୟ ଅଧିକାରୀ ସତ୍ୟବ୍ରତ ମହାପାତ୍ର ସୂଚନା ଦେଇଛନ୍ତି। ଏହି ଘଟଣାର ତଦନ୍ତ କରି ରିପୋର୍ଟ ପ୍ରଦାନ ନିମନ୍ତେ ସିଏମ୍ସି ସ୍ବାସ୍ଥ୍ୟ ଅଧିକାରୀଙ୍କୁ ଜିଲା ମୁଖ୍ୟ ଚିକିତ୍ସାଧିକାରୀ ଡା. ସତ୍ୟବ୍ରତ ଛୋଟରାୟ ଶୁକ୍ରବାର ନିର୍ଦ୍ଦେଶ ଦେଇଥିଲେ। ଫଳରେ ସ୍ବାସ୍ଥ୍ୟ ଅଧିକାରୀ ମୃତକଙ୍କ ଘରକୁ ଯାଇ ତଦନ୍ତ କରିବା ପରେ ଛୋଟରାୟଙ୍କୁ ରିପୋର୍ଟ ପ୍ରଦାନ କରିଛନ୍ତି। ସରକାରୀ ନିୟମ ପାଳନ କରି ନ ଥିବାରୁ ସିଏମ୍ସି ସ୍ବାସ୍ଥ୍ୟ ଅଧିକାରୀ ମହାପାତ୍ର ଉକ୍ତ ଘରୋଇ ଚିକିତ୍ସାଳୟକୁ କାରଣ ଦର୍ଶାଅ ନୋଟିସ ଜାରି କରିଛନ୍ତି। ଏଥିସହ ଉକ୍ତ ଚିକିତ୍ସାଳୟ କର୍ତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ସୁପାରିସ କରିଛନ୍ତି। ଅପରପକ୍ଷରେ ସିଏମ୍ସି ପକ୍ଷରୁ ଭଗତପୁର ଅଞ୍ଚଳକୁ ବିଶୋଧନ କରାଯିବା ପାଇଁ ସ୍ଥିର ହୋଇଥିବା ଜଣାଯାଇଛି।
