ବେଗୁନିଆପଡ଼ା,୭।୨(ଡି.ଏନ୍.ଏ.): ରାଜ୍ୟର ବିଭିନ୍ନ ହସ୍ପିଟାଲରେ ଆବଶ୍ୟକ ଡାକ୍ତର ନ ଥିବାରୁ ରୋଗୀ ସେବା ବାଧାପ୍ରାପ୍ତ ହେଉଛି। ଏଭଳିସ୍ଥିତିରେ ଗଞ୍ଜାମ ଜିଲା କୋଦଳା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ୪ ଦିନ ହେଲା ଡାକ୍ତର ସମସ୍ୟା ଦେଖିବାକୁ ମିଳିଛି। ଫଳରେ ରୋଗୀ ସେବା ଠପ୍ ହୋଇପଡିଛି।
ହସ୍ପିଟାଲ ଆଇପିଏଚ୍ ଷ୍ଟାଣ୍ଡାର୍ଡ-୧ ମାନ୍ୟତା ପାଇଥିବା ବେଳେ ଏଠାରେ ୪ ଜଣ ସ୍ପେଶାଲିଷ୍ଟ ଡାକ୍ତରଙ୍କୁ ମିଶାଇ ୧୦ରୁ ଊଦ୍ଧର୍ବ ଡାକ୍ତର ରହିବା କଥା। ବର୍ତ୍ତମାନ ହସ୍ପିଟାଲରେ ଥିବା ଜଣେ ଡାକ୍ତର ଛୁଟିରେ ଥିବାରୁ ରୋଗୀ ସେବା ବ୍ୟାହତ ହୋଇଛି। ଅନ୍ୟପକ୍ଷେ ମଙ୍ଗଳବାର ଜଣେ ଡାକ୍ତରଙ୍କୁ ୪ ଦିନ ପାଇଁ ଡେପୁଟେସନରେ ଅଣାଯାଇଥିବା ବେଳେ ଆଉ ଜଣେ ଡାକ୍ତର ଆସିବେ ବୋଲି ଜିଲା ସ୍ବାସ୍ଥ୍ୟ ଅଧିକାରୀ କହିଛନ୍ତି । କେବଳ ଡାକ୍ତର ନୂହେଁ, ହସ୍ପିଟାଲରେ ଅନ୍ୟାନ୍ୟ ଷ୍ଟାଫ ମଧ୍ୟ ଆବଶ୍ୟକତାଠାରୁ କମ୍ ଅଛନ୍ତି। ଫଳରେ ମେଡିକାଲରେ ରୋଗୀ ସେବା ବାଧାପ୍ରାପ୍ତ ହେଉଛି। ସାମାନ୍ୟ ରୋଗର ଚିକିତ୍ସା ପାଇଁ ହସ୍ପିଟାଲକୁ ଆସୁଥିବା ରୋଗୀଙ୍କୁ ମଧ୍ୟ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଉଛି।
ହସ୍ପିଟାଲର ଅବ୍ୟବସ୍ଥା ନେଇ ଗତ ବର୍ଷ ମେ’ ମାସରେ କୋଦଳା ଏନ୍ଏସି ଅଧ୍ୟକ୍ଷ ସୂର୍ଯ୍ୟ ନାରାୟଣ ନାୟକ, ଉପାଧ୍ୟକ୍ଷାଙ୍କ ପ୍ରତିନିଧି ରଜନୀ ସେଠୀ, କୋଦଳା ଭାଜପା ଯୁବମୋର୍ଚ୍ଚା ଅଧ୍ୟକ୍ଷ ଭଗବାନ ସ୍ବାଇଁ, ରବୀନ୍ଦ୍ର ପରିଡା ପ୍ରମୁଖ ଜିଲା ସ୍ବାସ୍ଥ୍ୟ ଅଧିକାରୀଙ୍କୁ ଭେଟି ସମସ୍ୟାର ତୁରନ୍ତ ସମାଧାନ ନେଇ ଦାବି ଜଣାଇଥିଲେ। ଏଥି ସହିତ ଗଞ୍ଜାମ ଜିଲାପାଳ, ସ୍ବାସ୍ଥ୍ୟ ସଚିବ, ସ୍ବାସ୍ଥ୍ୟମନ୍ତ୍ରୀଙ୍କୁ ମଧ୍ୟ ଚିଠି ଲେଖି ଅବଗତ କରାଇଥିଲେ। ପରେ ହସ୍ପିଟାଲରେ ୨ଜଣ ଡାକ୍ତରଙ୍କୁ ନିଯୁକ୍ତି ଦିଆଯାଇଥିଲା। ହେଲେ ପରବର୍ତ୍ତୀ ସମୟରେ ଡାକ୍ତର ଅନ୍ୟତ୍ର ଚାଲି ଯାଇଥିଲେ। ଏପରିକି ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ ଦାସ କୋଦଳା ଗସ୍ତ କରି ସହରାଞ୍ଚଳ ସ୍ବାସ୍ଥ୍ୟ କେନ୍ଦ୍ରର ଉଦ୍ଘାଟନ କରିଥିଲେ। ରାଜ୍ୟ କାୟାକଳ୍ପ ଟିମ୍ ସ୍ବଚ୍ଛତା ଓ ଭିତ୍ତିଭୂମି ପାଇଁ ହସ୍ପିଟାଲକୁ ପୁରସ୍କୃତ କରିଥିଲେ। ହସ୍ପିଟାଲରେ ମୁଖ୍ୟତଃ ଡାକ୍ତର ନିଯୁକ୍ତି ଅତି ଆବଶ୍ୟକ ହେଉଥିବା ବେଳେ ତାହା ସମ୍ଭବ ହୋଇପାରୁନାହିଁ। ଆଗାମୀ ଦିନରେ ଏ ସମ୍ପର୍କରେ ପଦକ୍ଷେପ ନିଆ ନ ଗଲେ ଆନ୍ଦୋଳନ ଉଗ୍ରରୂପ ନେବ ବୋଲି ସ୍ଥାନୀୟ ଅଞ୍ଚଳବାସୀ ପ୍ରକାଶ କରିଛନ୍ତି।
