ପୁରୁଷୋତ୍ତମପୁର,୧୪ା୯ (ସୀମାଞ୍ଚଳ ମିଶ୍ର): ରାଜ୍ୟର ବିଭିନ୍ନ ଶକ୍ତିପୀଠରେ ଆରମ୍ଭ ହୋଇଛି ଷୋଡ଼ଶ ଉପଚାର ପୂଜା । ସେହିପରି ଗଞ୍ଜାମ ଜିଲାର ପୁରୁଷୋତ୍ତମପୁର ଅଞ୍ଚଳରେ ପ୍ରସିଦ୍ଧ ଶକ୍ତିପୀଠ ଇଷ୍ଟଦେବୀ ମା’ ତାରାତାରିଣୀ ଏବଂ ଦକ୍ଷୀଣକାଳୀଙ୍କ ପୀଠରେ ଷୋଡ଼ଶ ଉପଚାର ପୂଜା ରବିବାର ଆରମ୍ଭ ହୋଇଛି। ପବିତ୍ର ମୂଳାଷ୍ଟମୀରୁ ଏହିପୂଜା ଆରମ୍ଭ ହେବାର ପରମ୍ପରା ରହିଆସିଛି। ଏହି ସମୟରେ ମା’ଙ୍କୁ ୧୦୮ ମାଠିଆ ସୁବାସିତ ଜଳରେ ସ୍ନାନ କରିବା ପରେ ମା’ଙ୍କ ଉତ୍ଥାପନ ହୋଇଥାଏ । ପରେ ଆରମ୍ଭ ହୋଇଥାଏ ମା’ଙ୍କ ଷୋଡ଼ଶ ଉପଚାର ପୂଜାର ବିଭିନ୍ନ ରୀତିନୀତି। ମା’ଙ୍କ ସ୍ନାନ ସହ ଷୋଡ଼ଶ ଉପଚାର ପୂଜାକୁ ନେଇ ଅଞ୍ଚଳରେ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି।
ରବିବାର ପୂଜାର ପ୍ରଥମ ଦିନରେ ସେବାୟତ ଓ ତାଙ୍କ ପରିବାର ଲୋକେ ପବିତ୍ର ଋଷିକୂଲ୍ୟା ନଦୀକୁ ଯାଇ ସେଠାରେ ପୂଜାର୍ଚ୍ଚନା କରି ୧୦୮ ମାଠିଆରେ ଜଳ ଧରି ୯୯୯ ପାହାଚ ଚଢ଼ି ରତ୍ନଗିରି ପାହାଡ ଉପରେ ପ୍ରତିଷ୍ଠିତ ମା’ଙ୍କ ମନ୍ଦିରରେ ପହଞ୍ଚି ଥିଲେ। ମାତ୍ର ଏହି ସମୟରେ ବିଦ୍ୟୁତ୍ ନ ଥିବାରୁ ପାହାଚ ଚଢି ପାଣିଧରି ଯାଉଥିବା ସେବାୟତ ଓ ମହିଳାମାନଙ୍କୁ ହଇରାଣ ହେବାକୁ ପଡିଥିଲା। ପାହାଡ ଉପରେ ଥିବା ବଉଳମାଳିଆ ପଥରେ ନିର୍ମିତ ମନ୍ଦିରର ଗମ୍ଭିରା ମଧ୍ୟରେ ବିଜେ କରିଥିବା ମା’ ତାରାତାରିଣୀ ଦୁଇ ଭଉଣୀଙ୍କ ଚଳନ୍ତି ପ୍ରତିମାକୁ ଗୋଟି ପହଣ୍ଡି କରି ସ୍ମାନ ବେଦିକୁ ଆଣି ସ୍ନାନ କରାଯିବା ପରେ ମା’ ଶୟନକୁ ଯାଇଥିଲେ। ସୋମବାର ମାଙ୍କ ଉତ୍ଥାପନା ରହିଛି। ପୁରୋହିତ ପଣ୍ଡିତ ନୀଳମାଧବ ତ୍ରିପାଠୀ ବେଦମନ୍ତ୍ର ସହକାରେ ଚଣ୍ଡିପାଠ କରୁଛନ୍ତି।
ସେବାୟତ ସଂଘ ସଭାପତି ତପନ ରଣା କର୍ତ୍ତା ଦାୟିତ୍ୱରେ ଥିବା ବେଳେ ବାପଜୀ ରଣାଙ୍କ ସମେତ ଅନ୍ୟ ସେବାୟତମାନେ ସହଯୋଗ କରୁଛନ୍ତି । ମୂଳାଷ୍ଟମୀଠାରୁ ମହାଷ୍ଟମୀ ପର୍ଯ୍ୟନ୍ତ ୧୬ ଦିନବ୍ୟାପୀ ତାରାତାରୀଣିଙ୍କ ପୀଠରେ ପ୍ରତ୍ୟହ ଚଣ୍ଡିପାଠ, ହୋମ, ଯଜ୍ଞ ସହ ସ୍ବତନ୍ତ୍ର ପୂଜା ହେବ। ଷୋଡ଼ଶ ଉପଚାର ପୂଜା ସମୟରେ ମା’ଙ୍କୁ ଦର୍ଶନ କଲେ ସମସ୍ତ ଦୁଃଖ ଲାଘବ ହୁଏ ବୋଲି ଶ୍ରଦ୍ଧାଳୁଙ୍କ ବିଶ୍ବାସ ରହିଛି। ଭିଡ଼କୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି। ଶାନ୍ତିଶୃଙ୍ଖଳାର ସହ ଦର୍ଶନ ନିମନ୍ତେ ମନ୍ଦିର ପରିସରରେ ପୋଲିସ ଫୋର୍ସ ମୁତୟନ କରାଯାଇଛି। ଏସ୍ଡିପିଓ ସୁଜିତ ନାୟକ ଏବଂ ଆଇଆଇସି ରାଜେଶ ନାୟକ ଏହାର ତଦାରଖ କରୁଛନ୍ତି। ମାଜିଷ୍ଟ୍ରେଟ ଦାୟିତ୍ୱରେ ପୁରୁଷୋତ୍ତମପୁର ତହସିଲଦାର ବିନୋଦ ବେହେରା ଅଛନ୍ତି।
