କୋଲକାତା,୨୭।୪ : ପଶ୍ଚିମବଙ୍ଗର ବିଭିନ୍ନ ଜିଲାରେ ରାମ ନବମୀ ଅବସରରେ ଘଟିଥିବା ହିଂସାକୁ ନେଇ କଲିକତା ହାଇକୋର୍ଟ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ବର୍ତ୍ତମାନ ହାଓ୍ବଡା ଏବଂ ଦାଲକୋଲା ସମେତ ବିଭିନ୍ନ ସହରରେ ହିଂସା ଘଟଣାର ତଦନ୍ତକୁ କୋର୍ଟ ଆତଙ୍କବାଦ ବିରୋଧୀ ଏଜେନ୍ସି ଏନଆଇଏକୁ ହସ୍ତାନ୍ତର କରିଛନ୍ତି। ଫଳରେ ରାଜ୍ୟର ମୁଖ୍ୟମନ୍ତ୍ରୀ ମମତା ବାନାର୍ଜୀ ସରକାରଙ୍କୁ ବଡ଼ ଝଟ୍କା ଲାଗିଛି।
ମାର୍ଚ୍ଚ ୩୦ ରେ,, ରାମ ନବମୀ ଅବସରରେ ଶୋଭାଯାତ୍ରା ସମୟରେ ଉତ୍ତର ଦିନାଜପୁର, ଇସଲାମପୁର, ହାୱଡାରେ ସଂଘର୍ଷ ହୋଇଥିଲା। ଏଥିରେ ଜଣେ ଯୁବକଙ୍କର ମୃତ୍ୟୁ ହୋଇଥିଲା। ପରବର୍ତ୍ତୀ ଦିନରେ, ହାୱଡା ଏବଂ ରିସଡା ବ୍ୟତୀତ ଅନ୍ୟାନ୍ୟ ସ୍ଥାନରେ ଶୋଭାଯାତ୍ରା ସମୟରେ ଅଗ୍ନିକାଣ୍ଡ ଏବଂ ହିଂସା ଘଟଣା ଘଟିଥିଲା। ଏହି ଘଟଣାରେ ବଙ୍ଗଳା ପୋଲିସ ୧୧୬ ଜଣଙ୍କୁ ଗିରଫ କରିଥିଲା ଏବଂ ରାଜ୍ୟ ସରକାର ଏହାର ତଦନ୍ତ ସିଆଇଡି ହସ୍ତାନ୍ତର କରିଥିଲେ। କଲିକତା ହାଇକୋର୍ଟ ପଶ୍ଚିମବଙ୍ଗର ମମତା ବାନାର୍ଜୀ ସରକାରଙ୍କୁ ହନୁମାନ ଜୟନ୍ତୀ ପୂର୍ବରୁ ରାଜ୍ୟରେ ଶାନ୍ତି ବଜାୟ ରଖିବା ପାଇଁ କେନ୍ଦ୍ରୀୟ ବାହିନୀ ନିୟୋଜିତ କରିବାକୁ କହିଥିଲେ।
ଏହାକୁ ନେଇ ବିଭିନ୍ନ ରାଜନୈତିକ ଦଳର ଲୋକଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ମଧ୍ୟ ଦେଖାଯାଇଥିଲା।
ବିରୋଧୀ ଦଳର ନେତା ଶୁଭେନ୍ଦୁ ଅଧିକାରୀଙ୍କ ଦ୍ୱାରା ଦାଖଲ ହୋଇଥିବା ଏକ ପିଟିଶନରେ କାର୍ଯ୍ୟକାରୀ ମୁଖ୍ୟ ବିଚାରପତି ଟି.ଏସ ସିଭାଗନନମଙ୍କ ନେତୃତ୍ୱରେ ଏକ ହାଇକୋର୍ଟର ଏକ ବେଞ୍ଚ ପଶ୍ଚିମବଙ୍ଗ ପୋଲିସକୁ ଏହି ମାମଲା ଏନଆଇଏକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେଇଛନ୍ତି। ତାଙ୍କ ଏହି ଜନସ୍ବାର୍ଥ ମାମଲାରେ ଅଧିକାରୀ କହିଛନ୍ତି, ରାମ ନବମୀ ହିଂସାରେ ବୋମା ବିସ୍ଫୋରଣ ଘଟିଛି। ଏହାର ଯାଞ୍ଚ ଏନଆଇଏ ଦ୍ୱାରା କରାଯିବା ଉଚିତ।
ଏହି ଆବେଦନ ଉପରେ କୋର୍ଟ ଦୁଇ ସପ୍ତାହ ମଧ୍ୟରେ କେନ୍ଦ୍ର ସରକାରଙ୍କୁ ଏହି ମାମଲା ସହ ଜଡିତ ସମସ୍ତ ରେକର୍ଡ ଏବଂ ସିସିଟିଭି ଫୁଟେଜ ହସ୍ତାନ୍ତର କରିବାକୁ ବଙ୍ଗଳା ପୋଲିସକୁ ନିର୍ଦ୍ଦେଶ ଦେଇଥିଲେ। ଏଥିସହ କେନ୍ଦ୍ରକୁ ଏହି ଦଲିଲଗୁଡ଼ିକୁ ଏନଆଇଏ ପଠାଇବାକୁ କୁହାଯାଇଛି।
