ଇସଲାମାବାଦ,୨୫।୧ : ପାକିସ୍ତାନର ନିର୍ବାଚନ ଆୟୋଗ ଏପ୍ରିଲରେ ପଞ୍ଜାବ ଏବଂ ଖାଇବର ପସ୍ତୁନଖ୍ବା ପ୍ରଦେଶରେ ବିଧାନସଭା ନିର୍ବାଚନ କରିବାକୁ ପ୍ରସ୍ତାବ ଦେଇଛନ୍ତି। ଏହି ପ୍ରଦେଶଗୁଡିକ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ଦଳ ଦ୍ୱାରା ଶାସିତ ହୋଇଥିଲେ ମଧ୍ୟ ଦେଶରେ ତୁରନ୍ତ ସାଧାରଣ ନିର୍ବାଚନ ଦାବି କରିବା ନେଇ ପିଟିଆଇ ପ୍ରାଦେଶିକ ସଭାଗୁଡ଼ିକୁ ବିଲୋପ କରି ଦେଇଥିଲା। ତେବେ ପାକ ସରକାର ନୋଇବାକୁ ମନା କରିଦେଇଥିଲେ। ଚଳିତ ବର୍ଷ ଅଗଷ୍ଟ ପରେ ନିର୍ବାଚନ ଠିକ ସମୟରେ କରିବାକୁ ଜିଦ ଧରିଥିଲେ।
ବୁଧବାର ପାକିସ୍ତାନ ନିର୍ବାଚନ ଆୟୋଗ ପ୍ରସ୍ତାବ ଦେଇଛନ୍ତି ଯେ ଏପ୍ରିଲ ୯ ରୁ ୧୩ ମଧ୍ୟରେ ପଞ୍ଜାବରେ ଏବଂ ଏପ୍ରିଲ ୧୫ ରୁ ୧୭ ମଧ୍ୟରେ ଖାଇବର ପସ୍ତୁନଖ୍ବାରେ ବିଧାନସଭା ନିର୍ବାଚନ ହେବା ଉଚିତ।
ବିଧାନସଭା ଭଙ୍ଗ ହେବା ପରେ ଦୁଇ ପ୍ରଦେଶରେ କାର୍ଯ୍ୟନିର୍ବାହୀ ସରକାର ନିଯୁକ୍ତ ହୋଇଥିଲେ। ନିୟମ ଅନୁଯାୟୀ, ବିଧାନସଭା ଭଙ୍ଗ ହେବାର ୯୦ ଦିନ ମଧ୍ୟରେ ନିର୍ବାଚନ ହେବା ଆବଶ୍ୟକ। ତେଣୁ ପାକିସ୍ତାନର ନିର୍ବାଚନ ଆୟୋଗ ପ୍ରାଦେଶିକ ନିର୍ବାଚନର ତାରିଖ ଘୋଷଣା କରିଛନ୍ତି। ୨୨ ଜାନୁଆରୀରେ ପଞ୍ଜାବର କାର୍ଯ୍ୟନିର୍ବାହୀ ମୁଖ୍ୟ ଭାବରେ ସୟଦ ମୋହସିନ ରଜା ନାକଭି ଶପଥ ଗ୍ରହଣ କରିଥିବାବେଳେ ମହମ୍ମଦ ଆଜାମ ଖାନ ୨୧ ଜାନୁଆରୀରେ ଖାଇବର ପସ୍ତୁନଖ୍ବାରେ ମୁଖ୍ୟ କାର୍ଯ୍ୟନିର୍ବାହୀ ଭାବରେ ଶପଥ ଗ୍ରହଣ କରିଛନ୍ତି।
ସୂଚନାଯୋଗ୍ୟ, ଖାଇବର ପସ୍ତୁନଖ୍ବାରେ ବିଧାନସଭା ୧୪ ଜାନୁଆରୀରେ ଏବଂ ପଞ୍ଜାବ ବିଧାନସଭା ୧୮ ଜାନୁଆରୀରେ ବିଲୋପ କରାଯାଇଥିଲା। ନିର୍ବାଚନ ଆୟୋଗ ଦୁଇ ପ୍ରଦେଶର ରାଜ୍ୟପାଳଙ୍କ ମୁଖ୍ୟ ସଚିବମାନଙ୍କୁ ଚିଠି ଲେଖି ପାକିସ୍ତାନର ସମ୍ବିଧାନର ଧାରା ୨୨୪କୁ ଉଲ୍ଲେଖ କରିଛନ୍ତି, ଯାହା ବିଧାନସଭା ଭଙ୍ଗ ହେବାର ୯୦ ଦିନ ମଧ୍ୟରେ ନିର୍ବାଚନ କରିବାକୁ ବ୍ୟବସ୍ଥା ସମ୍ପର୍କରେ ସୂଚିତ କରିଛି। ତେବେ ସମ୍ପୃକ୍ତ ରାଜ୍ୟପାଳଙ୍କ ଦ୍ୱାରା ଚୂଡ଼ାନ୍ତ ନିର୍ବାଚନ ତାରିଖ ଘୋଷଣା କରାଯିବ।
