ମୁମ୍ବାଇ,୧୨ ।୯: ଉତ୍ତର ପ୍ରଦେଶରେ ଆସନ୍ତା ବର୍ଷ ଅର୍ଥାତ୍ ୨୦୨୨ରେ ଅନୁଷ୍ଠିତ ହେବାକୁ ଯାଉଛି ବିଧାନସଭା ନିର୍ବାଚନ । ଏହାକୁ ନେଇ ଭାରତୀୟ ଜନତା ପାର୍ଟି(ଭାଜପା) ଦ୍ୱିତୀୟ ଥର ଲାଗି ଶାସନ କ୍ଷମତା ହାତେଇ ବାକୁ ଲାଗି ପଡିଛି । ଅନ୍ୟପଟେ ସମାଜବାଦୀ ପାର୍ଟି, ବହୁଜନ ସମାଜ ପାର୍ଟି ଓ କଂଗ୍ରେସ ତୃଣମୂଳ ସ୍ତରରେ ନିଜ ନିଜ ଦଳକୁ ମଜଭୁତ କରିବାରେ ଲାଗିିପଡିଛନ୍ତି । ଇତିମଧ୍ୟରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଟକ୍କର ଦେବାକୁ ଯାଉଛନ୍ତି । ଉଦ୍ଧବ ଠାକରେଙ୍କ ଶିବସେନା ଏଥର ଉତ୍ତର ପ୍ରଦେଶ ବିଧାନସଭାରେ ସମସ୍ତ ୪୦୩ ଆସନ ପାଇଁ ପ୍ରାର୍ଥୀ ଦେବ ବୋଲି ଘୋଷଣା କରିଛି । ଯାହା ଯୋଗୀ ଆଦିତ୍ୟନାଥ ତଥା ଭାଜପା ପାଇଁ ଚିନ୍ତାର କାରଣ ପାଲଟି ଯାଇଛି ବୋଲି କୁହାଯାଉଛି । ଆଲୋଚନା ହେଉଛି କି ଉତ୍ତର ପ୍ରଦେଶରେ ଶିବସେନା ଆସିବାର ଅର୍ଥ ହେଉଛି ଭାଜପାକୁ କ୍ଷତି ପହଞ୍ଚାଇବା । କାରଣ ଉଭୟ ଦଳର ବିଚାରଧାରା ସମାନ । ଦୁଇଦଳ ହିନ୍ଦୁତ୍ୱର ରାଜନୀତି କରିବେ । ଉତ୍ତର ପ୍ରଦେଶରେ ଭାଜପା ଶାସନ କାଳରେ ଆଇନ ବ୍ୟବସ୍ଥା ସମ୍ପୂର୍ଣ୍ଣ ଭାବେ ଭୂଷୁଡି ପଡିଥିବା ବେଳେ ଏଠାରେ ନାରୀମାନେ ଆଦୌ ସୁରକ୍ଷିତ ନୁହେଁ ବୋଲି ଶିବସେନା କହିଛି । ଏପର୍ଯ୍ୟନ୍ତ କୌଣସି ଦଳ ସହ ଶିବସେନା ମେଣ୍ଟ କରି ନ ଥିଲେ ବି ମେଣ୍ଟର ସଙ୍କେତ ଦେଇଥିବା ଜଣାପଡିଛି ।
