ଇସଲାମାବାଦ,୪।୪ : ଦୁଇ ପ୍ରଦେଶରେ ନିର୍ବାଚନ ତାରିଖ ନେଇ ସୁପ୍ରିମକୋର୍ଟଙ୍କ ନିଷ୍ପତ୍ତି ପୂର୍ବରୁ ଶେହବାଜ ସରିଫ ସରକାର ସୁପ୍ରିମକୋର୍ଟ ଉପରେ ପ୍ରହାର କରିଛନ୍ତି। ସରିଫ ସରକାର ଏବଂ ଶାସକ ମିଳିତ ମେଣ୍ଟ ପାକିସ୍ତାନ ଡେମୋକ୍ରାଟିକ ମୁଭମେଣ୍ଟ (ପିଡିଏମ) ଗତ କିଛି ସପ୍ତାହ ଧରି ସିଧାସଳଖ ସୁପ୍ରିମକୋର୍ଟଙ୍କୁ ଟାର୍ଗେଟ କରିବାରେ ଲାଗିଛି। ବିଶେଷକରି ପ୍ରଧାନ ବିଚାରପତି ଉମର ଆଟା ବନ୍ଦିଆଲ ଶେହବାଜଙ୍କ ଟାର୍ଗେଟରେ ଅଛନ୍ତି।
ସୋମବାର ସୁପ୍ରିମକୋର୍ଟ କହିଥିଲେ, ପଞ୍ଜାବ ଏବଂ ଖାଇବର ପାସ୍ତୁନଖ୍ବାଠାରେ ପ୍ରାଦେଶିକ ବିଧାନସଭା ନିର୍ବାଚନ ତାରିଖକୁ ନେଇ ଚାଲିଥିବା ବିବାଦ ଉପରେ କୋର୍ଟ ମଙ୍ଗଳବାର ରାୟ ପ୍ରଦାନ କରିବେ।
ସୋମବାର ରାତିରେ ସରିଫ ସରକାର ସୁପ୍ରିମକୋର୍ଟର ରେଜିଷ୍ଟ୍ରାରଙ୍କୁ ତାଙ୍କ ପଦରୁ ହଟାଇବାକୁ ନିଷ୍ପତ୍ତି ନେଇଛନ୍ତି। ନିକଟରେ ସୁପ୍ରିମକୋର୍ଟର ବିଚାରପତିଙ୍କ ମଧ୍ୟରେ ବିଭାଜନ ସୃଷ୍ଟି କରିବାର ରଣନୀତି ଗ୍ରହଣ କରିଛି ପିଡିଏମ। ଏହା ଅଧୀନରେ ସରକାର ବିଚାରପତି କାଜି ଫାଏଜ ଇସାଙ୍କ ସପକ୍ଷରେ ଛିଡା ହୋଇଛନ୍ତି। ନିର୍ବାଚନ ତାରିଖ ମାମଲାରେ ଜଷ୍ଟିସ ବନ୍ଦିଆଲଙ୍କ ନିଜସ୍ବ ଉଦ୍ୟମରେ ହସ୍ତକ୍ଷେପ କରିବାକୁ ନିଷ୍ପତ୍ତି ନେଇଥିବା ପ୍ରଶ୍ନ ଉପରେ ଇସା ପ୍ରଶ୍ନ କରିଛନ୍ତି। ବର୍ତ୍ତମାନ ସରକାର କହିଛନ୍ତି ଯେ ରେଜିଷ୍ଟ୍ରାର ଇଶ୍ରାତ ଅଲି ଜଷ୍ଟିସ ଇସାଙ୍କ ଆଦେଶ ପାଳନ କରିନାହାଁନ୍ତି। ଏହି କାରଣରୁ ତାଙ୍କୁ ତାଙ୍କ ପଦରୁ ହଟାଯାଉଛି।
ନିର୍ବାଚନ ତାରିଖର ଶୁଣାଣି ସମୟରେ ଜଷ୍ଟିସ ବନ୍ଦିଆଲ ଅନେକ କଡ଼ା ମନ୍ତବ୍ୟ ଦେଇଛନ୍ତି। ସୋମବାର ପ୍ରଧାନମନ୍ତ୍ରୀ ଶେହବାଜ ସରିଫ ସେହି ମନ୍ତବ୍ୟକୁ ସର୍ବସାଧାରଣରେ ସମାଲୋଚନା କରିଛନ୍ତି। ପ୍ରଧାନ ବିଚାରପତି କହିଥିଲେ ଯଦି ଆପଣ ଆଜି ସଂସଦକୁ ଯାଆନ୍ତି, ତେବେ ଏପରି ଲୋକ ସେଠାରେ ସଂସଦକୁ ସମ୍ବୋଧିତ କରୁଥିବା ଦେଖିବାକୁ ମିଳିବ, ଯେଉଁମାନେ ଗତକାଲି ପର୍ଯ୍ୟନ୍ତ ଜେଲରେ ଥିଲେ ଏବଂ ଯେଉଁମାନେ ଦେଶଦ୍ରୋହୀ ଘୋଷିତ ହୋଇଥିଲେ। ବର୍ତ୍ତମାନ ସେମାନେ ସେଠାରେ କବଜା କରିଛନ୍ତି। ସେମାନେ ଜନ ପ୍ରତିନିଧୀ ହୋଇଥିବାରୁ ତାଙ୍କୁ ସମ୍ମାନ ଦିଆଯାଉଛି।
