ମୁମ୍ବାଇ: ବଲିଉଡର ଦୁଇ ସବୁଠାରୁ ବଡ଼ ସୁପରଷ୍ଟାର ଶାହରୁଖ ଖାନ ଏବଂ ସଲମାନ ଖାନଙ୍କୁ ନେଇ ଦେଶ ତଥା ବିଦେଶରେ ପ୍ରବଳ କ୍ରେଜ୍ ରହିଛି। ଦଶନ୍ଧି ଦଶନ୍ଧି ଧରି ଏହି ଦୁଇ ଷ୍ଟାର ଅନେକ ବ୍ଲକବଷ୍ଟର ଫିଲ୍ମ ଭେଟି ଦେଇ ଦର୍ଶକଙ୍କ ହୃଦୟରେ ରାଜ୍ କରୁଛନ୍ତି। ନିଜର ଦମଦାର ଆକ୍ଟିଂ ସହିତ ଉଭୟେ ଅତ୍ୟନ୍ତ ବିଳାସପୂର୍ଣ୍ଣ ଜୀବନଶୈଳୀ (Luxury Lifestyle) ମଧ୍ୟ ଅତିବାହିତ କରନ୍ତି। କିନ୍ତୁ ଆପଣ ଜାଣନ୍ତି କି, ବଲିଉଡର ‘କିଙ୍ଗ ଖାନ’ ଏବଂ ବି-ଟାଉନର ‘ଭାଇଜାନ’ଙ୍କ ମଧ୍ୟରୁ କିଏ ସବୁଠାରୁ ଅଧିକ ଧନୀ? ଆସନ୍ତୁ ନଜର ପକାଇବା ଏହି ଦୁଇ ମେଗାଷ୍ଟାରଙ୍କ ମୋଟ ସମ୍ପତ୍ତି ଉପରେ…
ରିପୋର୍ଟ ଅନୁଯାୟୀ, ମନୋରଞ୍ଜନ ଦୁନିଆର ସବୁଠାରୁ ଧନୀ ଷ୍ଟାର ଭାବେ ଶାହରୁଖ ଖାନ ନିଜର ଦବଦବା ବଜାୟ ରଖିଛନ୍ତି। ‘ହୁରୁନ ଇଣ୍ଡିଆ ରିଚ ଲିଷ୍ଟ ୨୦୨୬’ ଏବଂ ‘ହୁରୁନ ଗ୍ଲୋବାଲ ରିଚ ଲିଷ୍ଟ ୨୦୨୬’ ମୁତାବକ, ଶାହରୁଖ ଖାନଙ୍କ ମୋଟ ନେଟୱର୍ଥ (Net Worth) ପ୍ରାୟ ୧.୩ ବିଲିୟନ ଡଲାର (ଭାରତୀୟ ମୁଦ୍ରାରେ ପ୍ରାୟ ୧୦ ହଜାର ୮୦୦ କୋଟି ଟଙ୍କା)। ଶୂନରୁ ଆରମ୍ଭ କରି ଆଜି ସେ ଏହି ବିଶାଳ ସାମ୍ରାଜ୍ୟ ଠିଆ କରିଛନ୍ତି।
ଶାହରୁଖଙ୍କ ନିଜସ୍ବ ଫିଲ୍ମ ପ୍ରଡକ୍ସନ କମ୍ପାନୀ ‘ରେଡ ଚିଲିଜ ଏଣ୍ଟରଟେନମେଣ୍ଟ’ ଏବଂ VFX କମ୍ପାନୀରୁ ସେ ମୋଟା ଅଙ୍କର ଆୟ କରନ୍ତି।
ସେ ଆଇପିଏଲ ଦଳ ‘କୋଲକାତା ନାଇଟ ରାଇଡର୍ସ’ (KKR)ର ସହ-ମାଲିକ ଅଟନ୍ତି।
ଫିଲ୍ମ ଫିସ ଏବଂ ପ୍ରଫିଟ ସେୟାରିଂ ବ୍ୟତୀତ ବଡ଼ ବଡ଼ ବ୍ରାଣ୍ଡର ବିଜ୍ଞାପନରୁ ସେ କୋଟି କୋଟି ଟଙ୍କା କମାନ୍ତି। ମୁମ୍ବାଇରେ ତାଙ୍କର ପ୍ରାୟ ୨୦୦ କୋଟିରୁ ଅଧିକ ମୂଲ୍ୟର ଆଲିସାନ ବଙ୍ଗଳା ‘ମନ୍ନତ’ ରହିଛି। ଏହା ସହିତ ଦୁବାଇ ଏବଂ ଲଣ୍ଡନରେ ମଧ୍ୟ ତାଙ୍କର ଦାମୀ ସମ୍ପତ୍ତି ରହିଛି।
ଅନ୍ୟପଟେ ବଲିଉଡର ସବୁଠାରୁ ସଫଳ ଏବଂ ଚର୍ଚ୍ଚିତ ଷ୍ଟାର ସଲମାନ ଖାନ ମଧ୍ୟ କମାଇବାରେ ପଛରେ ନାହାନ୍ତି। ବ୍ଲକବଷ୍ଟର ଫିଲ୍ମ ଏବଂ ଦୀର୍ଘ ବର୍ଷ ଧରି ରିଆଲିଟି ଶୋ ‘ବିଗ ବସ’ ଜରିଆରେ ସେ ପ୍ରଚୁର ସମ୍ପତ୍ତି ଅର୍ଜନ କରିଛନ୍ତି। ରିପୋର୍ଟ ମୁତାବକ, ୨୦୨୬ ସୁଦ୍ଧା ସଲମାନ ଖାନଙ୍କ ମୋଟ ନେଟୱର୍ଥ ପ୍ରାୟ ୩,୨୨୫ କୋଟି ଟଙ୍କା ବୋଲି ଆକଳନ କରାଯାଇଛି।
ସଲମାନ ଗୋଟିଏ ଫିଲ୍ମ ପାଇଁ ୧୦୦ କୋଟିରୁ ଅଧିକ ଫିସ ନେବା ସହ ପ୍ରଫିଟ ସେୟାରିଂ ମଧ୍ୟ ନିଅନ୍ତି। ତେବେ ଟେଲିଭିଜନ ତାଙ୍କ ପାଇଁ ସୁନା ଖଣି ସଦୃଶ। ‘ବିଗ ବସ’ର ଗୋଟିଏ ସିଜନରୁ ସେ ପ୍ରାୟ ୧୫୦ ରୁ ୨୫୦ କୋଟି ଟଙ୍କା ପର୍ଯ୍ୟନ୍ତ ଆୟ କରନ୍ତି। ବ୍ରାଣ୍ଡ ବିଜ୍ଞାପନ ପାଇଁ ସେ ପ୍ରତି ଡିଲ ପିଛା ୭ ରୁ ୧୦ କୋଟି ଟଙ୍କା ଚାର୍ଜ କରନ୍ତି। ଏହାସହ ତାଙ୍କର ନିଜସ୍ବ ବ୍ରାଣ୍ଡ ‘ବିଙ୍ଗ ହ୍ୟୁମାନ’ (Being Human) ଏବଂ ‘ସଲମାନ ଖାନ ଫିଲ୍ମସ’ ପ୍ରଡକ୍ସନରୁ ମଧ୍ୟ ମୋଟା ଅଙ୍କର ଲାଭ ମିଳିଥାଏ।
ମୁମ୍ବାଇର ବାନ୍ଦ୍ରାସ୍ଥିତ ତାଙ୍କ ବାସଭବନ ‘ଗାଲାକ୍ସି ଆପାର୍ଟମେଣ୍ଟ’ର ମୂଲ୍ୟ ୧୦୦ କୋଟିରୁ ଅଧିକ ହେବ। ଏହା ସହିତ ପନଭେଲରେ ତାଙ୍କର ୮୦-୧୦୦ କୋଟି ମୂଲ୍ୟର ଏକ ବିଶାଳ ଫାର୍ମହାଉସ ଏବଂ ମହାରାଷ୍ଟ୍ରର ବିଭିନ୍ନ ସ୍ଥାନରେ ଅନେକ ସମ୍ପତ୍ତି ରହିଛି।
