ଜମ୍ମୁ,୨ ।୯: ପାକିସ୍ତାନ ସମର୍ଥକ ତଥା ବିଚ୍ଛିନ୍ନତାବାଦୀ ନେତା ସୈୟଦ ଅଲି ଶାହ ଗିଲାନିଙ୍କ ମୃତଦେହକୁ ତାଙ୍କ ଇଚ୍ଛା ଅନୁଯାୟୀ ଘର ନିକଟରେ ଥିବା ଏକ ମସଜିଦର କବରସ୍ଥାନରେ କବର ଦିଆଯାଇଛି । ତାଙ୍କ ପୁଅ ନଇମ କହିଛନ୍ତି ଯେ ଗିଲାନିଙ୍କ ମୃତଦେହକୁ ସେ ଶ୍ରୀନଗର ସହରର ଇଦଗାହରେ କବର ଦେବାକୁ ଚାହିଁଥିଲେ । ଅନ୍ତିମ ସଂସ୍କାରରେ ବନ୍ଧୁ ପରିଜନ ଉପସ୍ଥିତ ଥିଲେ । ଅଧିକାରୀଙ୍କ ସୂଚନା ଅନୁଯାୟୀ କଡା ସୁରକ୍ଷା ବ୍ୟବସ୍ଥା ମଧ୍ୟରେ ଗିଲାନିଙ୍କ ମୃତଦେହକୁ ମସଜିଦର କବର ସ୍ଥାନରେ କବର ଦିଆଯାଇଛି । କୌଣସି ପ୍ରକାର ବିଶୃଙ୍ଖଳା ନ ଘଟିବା ପାଇଁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବା ସହ ସଂସ୍କାର ସମୟରେ ଲୋକ ଭିଡ ନ ହେବା ପାଇଁ ମଧ୍ୟ ସମସ୍ତ ପ୍ରକାର ପଦକ୍ଷେପ ନିଆଯାଇଥିଲା । ତେବେ ଭୁଲ ଖବର ପ୍ରଚାର ବନ୍ଦ କରିବା ପାଇଁ ମଧ୍ୟ ମୋବାଇଲ ସେବାକୁ ବନ୍ଦ କରି ଦିଆଯାଇଥିଲା । ଆଜିପି କଶ୍ମୀର ବିଜୟ କୁମାର କହିଥିଲେ ସମ୍ପୂର୍ଣ୍ଣ ଘାଟିରେ ପ୍ରତିବନ୍ଧକ ଲଗାଇବା ସହ ମୋବାଇଲ ଇଣ୍ଟରନେଟ ସେବାକୁ ବନ୍ଦ କରି ଦିଆଯାଇଥିଲା ।
