ଦୋହା, ୨୬।୧୧: ଚଳିତ ଫିଫା ବିଶ୍ୱକପରେ ପ୍ରଥମ ଦଳଭାବେ ଆୟୋଜକ କାତାର ଏଲିମିନେଟ ହୋଇଛି। ଅଲ ଥୁମାମା ଷ୍ଟାଡିୟମରେ ଶୁକ୍ରବାର ଅନୁଷ୍ଠିତ ମ୍ୟାଚରେ ଏହି ଦଳ ସେନେଗାଲ ନିକଟରୁ ପରାଜିତ ହୋଇଛି। ୨ ମ୍ୟାଚରୁ କାତାରର ଏହା ଦ୍ୱିତୀୟ ପରାଜୟ। ପୂର୍ବ ମ୍ୟାଚରେ ଏହି ଦଳ ଇକ୍ୱେଡରଠାରୁ ୦-୨ ଗୋଲରେ ହାରି ଯାଇଥିଲା। ଅନ୍ୟପକ୍ଷରେ କାତାରକୁ ୩-୧ ଗୋଲରେ ହରାଇ ସେନେଗାଲ ପ୍ରଥମ ବିଜୟ ସ୍ବାଦ ଚାଖିଛି। ପ୍ରଥମ ଆଫ୍ରିକୀୟ ଦଳଭାବେ ସେନେଗାଲ ଏହି ବିଶ୍ୱକପରେ ବିଜୟୀ ହେବାରେ ସକ୍ଷମ ହୋଇଛି। ନିଜର ପ୍ରଥମ ମ୍ୟାଚରେ ଦଳ ନେଦରଲାଣ୍ଡ୍ସଠାରୁ ୦-୨ ଗୋଲରେ ହାରି ଯାଇଥିଲା। ଅନ୍ୟ ମ୍ୟାଚ ଗୁଡ଼ିକ ପରି ଏଠାରେ ମଧ୍ୟ ଆରମ୍ଭରେ ଉଭୟ ଦଳ ଭଲ ପ୍ରଦର୍ଶନ କରିଥିଲେ। ମାତ୍ର ଖେଳ ଆଗେଇବା ସହିତ ସେନେଗାଲ ପ୍ରାଧାନ୍ୟ ବିସ୍ତାର କରିଥିଲା। ୪୧ତମ ମିନିଟରେ ବୌଲାୟେ ଡିଆ ଏକ ଗୋଲ ଦେଇ ପ୍ରଥମାର୍ଦ୍ଧ ଶେଷ ବେଳକୁ ସେନେଗାଲକୁ ୧-୦ରେ ଅଗ୍ରଣୀ କରିଥିଲେ। ଦ୍ୱିତୀୟାର୍ଦ୍ଧ ଆରମ୍ଭରୁ ସେନେଗାଲ ଆକ୍ରମଣ କରି ଫାଇଦାରେ ରହିଥିଲା। ୪୮ତମ ମିନିଟରେ ଫାମାରା ଡିଏଧିଉ ଗୋଲ ଦେଇ ସେନେଗାଲର ଅଗ୍ରଣୀ ବ୍ୟବଧାନକୁ ୨-୦ରେ ପହଞ୍ଚାଇଥିଲେ। ୭୮ତମ ମିନିଟରେ କାତାରର ମହମ୍ମଦ ମୁନତାରି ଗୋଟିଏ ଗୋଲ ପରିଶୋଧ କରିଥିଲେ ହେଁ ସେନେଗାଲର ବାମ୍ବା ଡିଙ୍ଗ୮୪ତମ ମିନିଟରେ ଗୋଲ ଦେଇ ଦଳର ବିଜୟ ଏକପ୍ରକାର ନିଶ୍ଚିତ କରି ଦେଇଥିଲେ। ଏହାପରେ ଆଉ ଗୋଲ ହୋଇ ନ ଥିଲା। କାତାର ୨୯ ତାରିଖରେ ଏହାର ଶେଷ ଗ୍ରୁପ୍ ମ୍ୟାଚରେ ଶକ୍ତିଶାଳୀ ନେଦରଲାଣ୍ଡ୍ସକୁ ଭେଟିବ। ସେହିଦିନ ଇକ୍ୱେଡର ଓ ସେନେଗାଲ ମଧ୍ୟରେ ମୁକାବିଲା ହେବ।
