ବେଙ୍ଗାଲୁରୁ,୨୯।୫ (ଆଇଏଏନ୍ଏସ୍): ହିଜାବ ବିବାଦ ପୁଣିଥରେ ଉପକୂଳ କର୍ନାଟକରେ ମୁଣ୍ଡ ଟେକିଛି। ଏଥିସହିତ ମଲାଲି ମନ୍ଦିର-ମସ୍ଜିଦ ବିବାଦକୁ ନେଇ ଉତ୍ତର କନ୍ନଡ, ଦକ୍ଷିଣ କନ୍ନଡ ଏବଂ ଉଡୁପିରେ ସାମ୍ପ୍ରଦାୟିକ ଉତ୍ତେଜନା ଦେଖାଦେଇଛି। ଭାଜପାର ଗଡ଼ କୁହାଯାଉଥିବା କର୍ନାଟକର ଉପକୂଳ ଅଞ୍ଚଳ ସାମ୍ପ୍ରଦାୟିକତା ଦୃଷ୍ଟିରୁ ସମ୍ବେଦନଶୀଳ। ପୂର୍ବରୁ ଏଠାରେ ଅନେକ ଥର ସାମ୍ପ୍ରଦାୟିକ ଉତ୍ତେଜନା ଓ ସଂଘର୍ଷ ସୃଷ୍ଟି ହୋଇଛି। ଉକ୍ତ ଅଞ୍ଚଳରୁ ଆରମ୍ଭ ହୋଇଥିବା ହିଜାବ ବିବାଦ ଏବେ ଅନ୍ତର୍ଜାତୀୟ ସ୍ତରରେ ପହଞ୍ଚତ୍ଛି।
ହିଜାବ ବିବାଦ ଏକପ୍ରକାର ସମାଧାନ ହୋଇଯାଇଥିବା ଭଳି ଜଣାପଡ଼ୁଥିଲେ ମଧ୍ୟ ପୁଣିଥରେ ଉପକୂଳ ଅଞ୍ଚଳରେ ଏହାକୁ ନେଇ ସାମ୍ପ୍ରଦାୟିକ ଉତ୍ତେଜନା ସୃଷ୍ଟି ହୋଇଛି। କର୍ନାଟକରେ ଗ୍ରୀଷ୍ମ ଛୁଟି ପରେ ସ୍କୁଲ୍ କଲେଜରେ ପାଠପଢ଼ା ଆରମ୍ଭ ହୋଇଥିବାବେଳେ ଶ୍ରେଣୀଗୃହରେ ହିଜାବ ପିନ୍ଧିବାକୁ ବିରୋଧ କରି ହିନ୍ଦୁ ଛାତ୍ରୀଛାତ୍ରମାନେ ପୁଣିଥରେ ଆନ୍ଦୋଳନ ଆରମ୍ଭ କରିଦେଇଛନ୍ତି। ରାଜ୍ୟର ଭାଜପା ସରକାର କ୍ୟାମ୍ପସରେ କେବଳ ୟୁନିଫର୍ମକୁ ଅନୁମତି ଦେବା ଉପରେ ଗୁରୁତ୍ୱ ଦେଉଛି। ମାଙ୍ଗାଲୁରୁର ୟୁନିଭର୍ସିଟି କଲେଜରେ ଆନ୍ଦୋଳନ ପରେ ଭାଜପା ବିଧାୟକ ବେଦବ୍ୟାସ କାମାତ୍ କଲେଜ ଉନ୍ନୟନ ଓ ପରିଚାଳନା କମିଟି ସଦସ୍ୟ ଓ ଛାତ୍ରୀଛାତ୍ରଙ୍କ ସହ ବୈଠକ କରିଛନ୍ତି।
ସେପଟେ ମଲାଲି ମସ୍ଜିଦ ବିବାଦ ଜୋର୍ ଧରିଥିବାବେଳେ ସେଠାରୁ ହିନ୍ଦୁ କର୍ମୀମାନଙ୍କୁ ମୁଠାଏ ମାଟି ନେବାକୁ ଦିଆଯିବ ନାହିଁ ବୋଲି ସୋସିଆଲ ଡେମୋକ୍ରାଟିକ୍ ପାର୍ଟି ଅଫ୍ ଇଣ୍ଡିଆ (ଏସ୍ଡିପିଆଇ) ପକ୍ଷରୁ କୁହାଯାଇଛି। ମସ୍ଜିଦ ଦଖଲ କରିବା ସ୍ବପ୍ନ ନ ଦେଖିବାକୁ ଏସ୍ଡିପିଆଇ ରାଜ୍ୟ ସଭାପତି ଅବଦୁଲ ମାଜିଦ ମିସୁରୁ ଶନିବାର କହିଛନ୍ତି। ବଲାରିରେ ୨୦୦ ବର୍ଷର ପୁରୁଣଶ ସୁଗାଲମ୍ମା ମନ୍ଦିର ଭଙ୍ଗାଯାଇଥିବା ସମ୍ପର୍କରେ ସୁନିଶ୍ଚିତ କରାଇବା ଲାଗି ହିନ୍ଦୁ କର୍ମୀ ଓ ସଂଘ ପରିବାର ସଦସ୍ୟ ପାରମ୍ପରିକ ‘ତମ୍ବୁଲା ପ୍ରଶ୍ନ’ ଉପାୟ ଅବଲମ୍ବନ କରିବେ ବୋଲି କହିଥିଲାବେଳେ ମାଜିଦ ସେମାନଙ୍କୁ ଚ୍ୟାଲେଞ୍ଜ କରିଛନ୍ତି। ଅନ୍ୟପକ୍ଷରେ ପ୍ରଶାସନ ମଲାଲି ମସ୍ଜିଦ ପରିସରର ସ୍ଥିତାବସ୍ଥା ବଜାୟ ରଖିଛନ୍ତି। ନିକଟରେ ହୋଇଥିବା ଖନନରୁ ମସ୍ଜିଦ ପରିସରରେ ମନ୍ଦିର ଢାଞ୍ଚା ମିଳିଥିଲା। ଫଳରେ ସେଠାରେ ମନ୍ଦିର ଥିବା ନେଇ ହିନ୍ଦୁ କର୍ମୀମାନେ ଦାବି ଉଠାଇଥିଲେ। ଏହି ପ୍ରସଙ୍ଗରେ ସ୍ଥିତାବସ୍ଥା ବଜାୟ ରଖିବା ଲାଗି ଅଦାଲତ ନିର୍ଦ୍ଦେଶ ଦେଇଛନ୍ତି।
