ଜଗତ୍ସିଂହପୁର ଅଫିସ, ୩୦ା୯:ଦୁର୍ଗା ପୂଜା ଯେତିକି ପାଖେଇ ଆସୁଛି,ପାର୍ବଣ ପରିବେଶ ସେତିକି ଅନୁଭୂତ ହେଉଛି। ଏଥିମଧ୍ୟରେ ଜଗତ୍ସିଂହପୁର ସହରର ପ୍ରାୟତଃ ପୂଜା ମଣ୍ଡପ ଓ କ୍ଲବ ପକ୍ଷରୁ ମୂର୍ତ୍ତି ନିର୍ମାଣ କାର୍ଯ୍ୟ ଅନ୍ତିମ ପର୍ଯ୍ୟାୟରେ ପହଞ୍ଚତ୍ଛି। ସ୍ଥାନୀୟ ଖେରସ (ଦେବୀ ଛକ)ସ୍ଥିତ ମା’ ଜୟଦୁର୍ଗା ସୁନାପିଲା ପୂଜା କମିଟି ପକ୍ଷରୁ ପୂଜାକୁ ଅଧିକ ଆକର୍ଷଣୀୟ କରିବା ପାଇଁ ଉଦ୍ୟମ ଚାଲିଛି। ବିଗତବର୍ଷଗୁଡିକ ପରି ଚଳିତବର୍ଷ ଆକର୍ଷଣୀୟ ମୂର୍ତ୍ତି ଓ ଆଲୋକ ସାଜସଜ୍ଜା ହେବ। ମୂର୍ତ୍ତି ନିର୍ମାଣ ପାଇଁ ପ୍ରତିବର୍ଷ ପରି କୋଲକାତାରୁ କାରିଗର ଆସିଛନ୍ତି। ଚଳିତବର୍ଷ ମା’ ଦୁର୍ଗାଙ୍କ ୬ ଫୁଟ ଉଚ୍ଚର ମୂର୍ତ୍ତି ସାଙ୍ଗକୁ ମା’ଲକ୍ଷ୍ମୀ, ସରସ୍ବତୀ, ଗଣେଶ ଓ କାର୍ତ୍ତିକଙ୍କ ମୂର୍ତ୍ତି ନିର୍ମାଣ ହେଉଛି । ଗ୍ରାମବାସୀଙ୍କ ସହଯୋଗରେ ଶାନ୍ତି ଓ ଶୃଙ୍ଖଳାର ସହ ରୀତିନୀତି ଅନୁଯାୟୀ ପୂଜାପାଠ କରାଯିବ। ନବମୀ ଦିନ ବେଢ଼ା କାଳିକା ଗ୍ରାମ ପରିକ୍ରମା କରିବେ। ୩ ଦିନ ଭଜନ ସମାରୋହ ଲୋକଙ୍କୁ ଆଧ୍ୟାତ୍ମିକ ପରିବେଶରେ ବାନ୍ଧି ରଖିବ। ଏ ସମ୍ପର୍କରେ କମିଟି ପକ୍ଷରୁ କୁହାଯାଇଛି, ଏହା ଜଗତ୍ସିଂହପୁରର ପୁରାତନ ପୂଜା ମଣ୍ଡପ ମଧ୍ୟରେ ଅନ୍ୟତମ। ୧୮୮୦ରୁ ନିରବଚ୍ଛିନ୍ନ ଭାବେ ମହାସପ୍ତମୀଠାରୁ ଏଠାରେ ମୂର୍ତ୍ତି ପୂଜା ପାଇଥାନ୍ତି । ଅତୀତରେ ମା’ଶଗଡ଼ରେ ମେଳଣ ପଡିଆ ପର୍ଯ୍ୟନ୍ତ ଶୋଭାଯାତ୍ରାରେ ଯାଉଥିଲେ। ପରବର୍ତ୍ତୀ ସମୟରେ ଗାଡ଼ିି ବ୍ୟବହାର ହେଲା। ପୂଜାର ବିଶେଷତ୍ୱ ହେଉଛି ଷୋଡ଼ଶ ଉପଚାର ବିଧି ଅନୁପାଳନପୂର୍ବକ ମା’ଙ୍କ ମୃଣ୍ମୟୀ ମୂର୍ତ୍ତି ପୂଜା କରାଯାଏ। ମୂଳାଷ୍ଟମୀ ଦିନ ଘଟ ସ୍ଥାପନା କରାଯାଏ। ଦଶହରା ସମୟରେ ଦୈନିକ ସୂର୍ଯ୍ୟପୂଜା, ଚଣ୍ଡୀପାଠ ଓ ହୋମ ଆଦି କରାଯାଏ। ନବମୀ ଦିନ ପ୍ରସାଦ ସେବନ ବ୍ୟବସ୍ଥା କରାଯାଏ। ଏନେଇ ଅଷ୍ଟମୀ ଓ ନବମୀ ଦିନ ଜଗତ୍ସିଂହପୁର ସହରର ସମସ୍ତ ପୂଜା କମିଟିଙ୍କୁ ଆମନ୍ତ୍ରଣ କରାଯାଏ। ବିଗତ ବର୍ଷ ପରି ଚଳିତବର୍ଷ ମଧ୍ୟ ଚାରା ବଣ୍ଟନ ସାଙ୍ଗକୁ ପରିବେଶ ସଚେତନତା ଉପରେ ଗୁରୁତ୍ୱ ଦିଆଯାଇ ଚାରା ବଣ୍ଟନ କରିବାର କାର୍ଯ୍ୟକ୍ରମ ରହିଛି ବୋଲି କମିଟି ପକ୍ଷରୁ କୁହାଯାଇଛି। ମା’ଙ୍କ ଭସାଣି ଯାତ୍ରା ଗ୍ରାମ ପରିକ୍ରମା କରିବା ପରେ ମେଳଣ ପଡିଆରେ ମୂର୍ତ୍ତି ବିସର୍ଜନ ହୋଇଥାଏ । ରୀତିନୀତି ଅନୁଯାୟୀ ଶାନ୍ତିଶୃଙ୍ଖଳାର ସହ ଭାଇଚାରା ମଧ୍ୟରେ ପୂଜା କରାଯାଉଥିବାରୁ ଅତୀତରେ ତତ୍କାଳୀନ ଜଗତ୍ସିଂହପୁର ଥାନା ଅଧିକାରୀ ଏବଂ ସ୍ଥାନୀୟ ପ୍ରଶାସକ ଏହି ପୂଜା ମଣ୍ଡପକୁ ସୁନାପିଲା ପୂଜା କମିଟି ନାମରେ ନାମକରଣ କରିଥିଲେ।
