ଦିଗପହଣ୍ଡି,୨୫।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି – ଆସିକା ଢଉଗାଁ ୩୨୬ ନଂ ଜାତୀୟ ରାଜପଥ ଆଙ୍କୋରଡ଼ା ଗ୍ରାମ ଛକ ନିକଟରେ ଗୁରୁବାର ପୂର୍ବାହ୍ନରେ ସ୍କୁଟି – ବାଇକ ମଧ୍ୟରେ ମୁହାଁମୁହିଁ ଧକ୍କା ହୋଇଛି।ଫଳରେ ୩ ଜଣ ଗୁରୁତର ଆହତ ହୋଇଥିଲେ। ସେମାନଙ୍କ ମଧ୍ୟରୁ ୨ ଜଣ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିବା ଜଣାପଡିଛି।ମୃତକ ଦ୍ବୟ ହେଲେ ସାନଖେମୁଣ୍ଡି ବ୍ଲକ ପାଟପୁରର କାଳିଆ ସ୍ବାଇଁ(୨୨) ଏବଂ ସାନଖେମୁଣ୍ଡି ବ୍ଲକ ଲକ୍ଷ୍ମୀପୁର ଗ୍ରାମର ଭୋଳା ସେଠୀ(୨୩)।ଗୁରୁତର ଆହାତ ଜଣକ ହେଲେ ସାନଖେମୁଣ୍ଡି ବ୍ଲକ କଇଠବେଢ଼ା ଗ୍ରାମର ସାଗର ସେଠୀ(୧୮)। ପାଟପୁର ଗ୍ରାମର ପରିବା ବ୍ୟବସାୟୀ କାଳିଆ ଦିଗପହଣ୍ଡିରେ କାମସାରି ବଜାଜ ଚେତକ ସ୍କୁଟି (ନଂ. ଓଡ଼ି୦୭ଏସି-୨୨୮୯) ଯୋଗେ ଗାଁକୁ ଫେରୁଥିବା ବେଳେ ଭୋଳା ଏବଂ ସାଗର ବଜାଜ ପଲ୍ସର ବାଇକ (ନଂ. ଓଡ଼ି୦୭ଏୱାଇ-୪୮୪୭) ଯୋଗେ ପାଟପୁରରୁ ଦିଗପହଣ୍ଡି ଅଭିମୁଖେ ଆସୁଥିଲେ। ହେଲେ ଏକ ପିକଅପ ଭ୍ୟାନକୁ ଓଭରଟେକ୍ କରିବା ସମୟରେ ଦ୍ରୁତଗତିରେ ଯାଉଥିବା ଅନ୍ୟମନସ୍କ ସ୍କୁଟି ଚାଳକ କାଳିଆ ପଲ୍ସର ବାଇକକୁ ଧକ୍କା ଦେଇଥିଲେ ବୋଲି କିଛି ପ୍ରତ୍ୟକ୍ଷଦର୍ଶୀ କହିଛନ୍ତି ।ସମସ୍ତେ ରାସ୍ତା ଉପରେ କଚାଡି ହୋଇ ପଡ଼ିବାରୁ ଗୁରୁତର ଆହାତ ହୋଇଥିଲେ। ଖବରପାଇ ଦିଗପହଣ୍ଡି ଅଗ୍ନିଶମବାହିନୀ ପୋଲିସ ସହାୟତାରେ ସେମାନଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।ସେଠାରେ ଚିକିତ୍ସାଧୀନ ଅବସ୍ଥାରେ କାଳିଆ ଏବଂ ଭୋଳାଙ୍କ ମୃତ୍ୟୁ ଘଟିଥିଲା। ମୃତାହତଙ୍କ ପରିବାର ଲୋକଙ୍କ କାନ୍ଦ ବୋବାଳିରେ ସ୍ବାସ୍ଥ୍ୟକେନ୍ଦ୍ର ପରିସର ଫାଟି ପଡିଥିଲା। ଗୁରୁତର ଆହାତ ସାଗରଙ୍କୁ ପ୍ରାଥମିକ ଚିକିତ୍ସା ପରେ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।ଦିଗପହଣ୍ଡି ପୋଲିସ ଟିମ ଘଟଣାସ୍ଥଳରେ ସରଜମିନ ତଦନ୍ତ କରି ଦୁର୍ଘଟଣାଗସ୍ତ ବାଇକ ଓ ସ୍କୁଟିକୁ ଜବତ କରି ଥାନାକୁ ନେଇଛି। ଏନେଇ ଏତଲା ହେବାପରେ ପୋଲିସ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ୨ ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ବଡ଼ ଡାକ୍ତରଖାନାକୁ ପଠାଇଛି। ଏହି ୩୨୬ ନଂ ଜାତୀୟ ରାଜପଥରେ ବାରମ୍ବାର ଦୁର୍ଘଟଣା ଘଟି ଏକାଧିକ ବ୍ୟକ୍ତି ମୃତ୍ୟୁବରଣ କରିବା ସହ ଗୁରୁତର ଆହତ ହୋଉଛନ୍ତି।ରାସ୍ତା ନିର୍ମାଣ କାର୍ଯ୍ୟ ଅଧାପନ୍ତରିଆ ଅବସ୍ଥାରେ ପଡ଼ିରହିଛି।ରାସ୍ତା ଉପରେ ସ୍ପିଡ ବ୍ରେକର ନଥିବା କାରଣରୁ ବାରମ୍ବାର ଦୁର୍ଘଟଣା ଘଟୁଥିବା ଜଣାପଡ଼ିଛି।
Odisha’s No.1 Odia Daily
