ନନ୍ଦାହାଣ୍ଡି/ପାପଡ଼ାହାଣ୍ଡି,୧୭।୭ (ପ୍ରତୀପ କୁମାର ଦାଶ/ ସ୍ବପ୍ନଜିତ ପଟ୍ଟନାୟକ): ନବରଙ୍ଗପୁର ଜିଲାରେ ଭାଲୁ ଆତଙ୍କ ଦେଖାଦେଇଛି। ବିଭିନ୍ନ କାରଣରୁ ଭାଲୁ ଏବେ ଜଙ୍ଗଲଛାଡ଼ି ଜନବସତି ମୁହାଁ ହେଉଛନ୍ତି। ସୋମବାର ବିଳମ୍ବିତ ରାତିରେ ପାପଡ଼ାହାଣ୍ଡି ଥାନାରେ ପଶି ଆତଙ୍କିତ କରିଥିବାବେଳେ ମଙ୍ଗଳବାର ନନ୍ଦାହାଣ୍ଡି ବ୍ଲକ ଦହଣା ସରକାରୀ ସ୍କୁଲରେ ଭାଲୁ ପଶିଥିଲା। ଫଳରେ ବିଦ୍ୟାଳୟ ବନ୍ଦ କରିବାକୁ ପଡ଼ିଛି। ପିଲାମାନେ ପାଠପଢ଼ାରୁ ବଞ୍ଚିତ ହୋଇଛନ୍ତି। ସ୍କୁଲରେ ପାଚରି ନ ଥିବାରୁ ବାରମ୍ବାର ଭାଲୁ ପଶୁଥିବା ଅଭିଯୋଗ ହେଉଛି। ତେଣୁ ତୁରନ୍ତ ପାଚେରି ନିର୍ମାଣ କରାଯାଉ ବୋଲି ଅଭିଭାବକ ଦାବି କରିଛନ୍ତି। ଦହଣା ସରକାରୀ ପ୍ରାଥମିକ ବିଦ୍ୟାଳୟ ପ୍ରଧାନ ଶିକ୍ଷକ ଶଙ୍ଖେସ ତ୍ରିପାଠୀ ମଙ୍ଗଳବାର ସ୍କୁଲ ଖୋଲିବାବେଳେ ସେଠାରେ ଏକ ଭାଲୁ ଶୋଇଥିବା ଦେଖିଥିଲେ। ସେ ଘଟଣା ସମ୍ପର୍କରେ ଏବିଇଓ ହରିହର ବେହେରା ଏବଂ ବନ ବିଭାଗକୁ ଜଣାଇଥିଲେ। ଏବିଇଓଙ୍କ ନିର୍ଦ୍ଦେଶକ୍ରମେ କ୍ଲାସ ସସ୍ପେଣ୍ଡ କରାଯାଇ ପିଲାଙ୍କୁ ଘରକୁ ପଠାଯାଇଥିଲା। ଏହା ମଧ୍ୟରେ ବନପାଳ ରିତେଶ ସୁନା ବନରକ୍ଷୀମାନଙ୍କ ସହ ସ୍କୁଲ ପାଖରେ ପହଞ୍ଚତ୍ ଥିଲେ। ନବରଙ୍ଗପୁର ବିଧାୟକ ଗୌରୀଶଙ୍କର ମାଝୀ ସେଠାରେ ପହଞ୍ଚତ୍ ବନପାଳଙ୍କ ସହ ଭାଲୁକୁ ଧରିବା ନେଇ ଆଲୋଚନା କରିଥିଲେ। ଭାଲୁ ନିକଟସ୍ଥ ଏକ ବାଡ଼ ଭିତରେ ଶୋଇଥିବା ଜଣାପଡ଼ିବା ପରେ ବନପାଳ ରାପିଡ୍ ରେସ୍ପନ୍ସ ଟିମ୍କୁ ଜଣାଇଥିଲେ। ଏ. ମନୋଜ କୁମାର ରାପିଡ୍ ରେସ୍ପନ୍ସ ଟିମ୍ ସହିତ ପହଞ୍ଚତ୍ ଭାଲୁକୁ ଆୟତ୍ତ କରିବାବେଳେ ଭାଲୁଟି ଏକ ଗଛ ଉପରକୁ ଚଢ଼ି ଯାଇଥିଲା। ଅନ୍ୟ ଉପାୟ ନ ପାଇ ଭାଲୁକୁ ଟ୍ରାଙ୍କୁଲାଇଜ କରାଯାଇଥିଲା। ପରେ ଗଛ ଉପରୁ ଭାଲୁକୁ ଉଦ୍ଧାର କରାଯାଇ ସ୍ବାସ୍ଥ୍ୟାବସ୍ଥା ଯାଞ୍ଚ ପରେ ନବରଙ୍ଗପୁର ନିଆଯାଇଛି। ଭାଲୁର ସ୍ବାସ୍ଥ୍ୟାବସ୍ଥା ଠିକ୍ ହେବା ପରେ ତାକୁ ଏକ ନିରାପଦ ସ୍ଥାନକୁ ସ୍ଥାନାନ୍ତର କରାଯିବ ବୋଲି ବନ ବିଭାଗ ଅଧିକାରୀ ସୂଚନା ଦେଇଛନ୍ତି। ପାଚେରି ନ ଥିବାରୁ ସ୍କୁଲ ଭିତରେ ବାରମ୍ବାର ଭାଲୁ ପଶୁଛି ବୋଲି ପ୍ରଧାନ ଶିକ୍ଷକ କହିଛନ୍ତି। ସ୍କୁଲ ପିଲାଙ୍କ ସୁରକ୍ଷାକୁ ଗୁରୁତ୍ୱ ଦେଇ ତୁରନ୍ତ ପାଚେରି ତିଆରି ବ୍ୟବସ୍ଥା କରାଯିବ ବୋଲି ବିଡିଓ କ୍ଷୀରୋଦ ଚନ୍ଦ୍ର ସାହୁ କହିଛନ୍ତି।
ନବରଙ୍ଗପୁର ଜିଲା ପାପଡ଼ାହାଣ୍ଡି ଥାନା ପରିସରରେ ସୋମବାର ବିଳମ୍ବିତ ରାତିରେ ଏକ ଭାଲୁ ଥାନା ପରିସରରେ ଦୀର୍ଘ ୪ ଘଣ୍ଟା ରହି କର୍ମଚାରୀମାନଙ୍କୁ ନାକେଦମ କରିଥିଲା। ଥାନା କର୍ମଚାରୀ ଭାଲୁକୁ ଦେଖି ଭୟଭୀତ ଅବସ୍ଥାରେ କବାଟ ବନ୍ଦ କରି ରହିଥିଲେ। ସୂଚନାନୁଯାୟୀ, ରାତ୍ର ପ୍ରାୟ ୧୦ଟାରେ ଏକ ଭାଲୁ ଝରିପୋକ ଖାଇବା ପାଇଁ ଥାନା ଭିତରେ ପଶିଯାଇଥିଲା। କର୍ମଚାରୀମାନେ ଭାଲୁକୁ ଦେଖି କବାଟ ବନ୍ଦ କରିଦେଇଥିଲେ। ସେମାନେ ଛାତ ଉପରେ ରହି ଭାଲୁଟିର ଗତିବିଧି ଉପରେ ନଜର ରଖିଥିଲେ। ପ୍ରାୟ ୪ ରୁ ୫ ଥର ଭାଲୁ ଥାନା ଭିତରେ ପଶିଥିଲା। କର୍ମଚାରୀମାନେ ପାଟି କରିବାରୁ ସେ ଚାଲିଯାଇ ପୁଣି ଥରେ ଫେରିଆସୁଥିଲା। ଶେଷରେ ଥାନାର ପ୍ରବେଶ ଦ୍ୱାର ବନ୍ଦ କରିବାରୁ ଭାଲୁଟି ତହସିଲ କାର୍ଯ୍ୟାଳୟ ଭିତରେ ପଶିଥିଲା। ତହସିଲ କାର୍ଯ୍ୟାଳୟ କାନ୍ଥ ଡେଇଁ ପୁଣି ଥାନା ଭିତରେ ପଶି ଝରିପୋକ ଖାଇ ରାତି ପ୍ରାୟ ୨ଟାରେ ଜଙ୍ଗଲ ଆଡ଼କୁ ଯାଇଥିଲା ବୋଲି ଜଣାପାଡ଼ିଛି।
