ପାରଳାଖେମୁଣ୍ଡି, ୩୦।୫ (ଗିରିଧାରୀ ପରିଛା): ଗଜପତି ଜିଲା ସଦର ମହକୁମା ପାରଳାଖେମୁଣ୍ଡି ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟରୁ ଏକ ଚିନ୍ତାଜନକ ଖବର ସାମ୍ନାକୁ ଆସିଛି। ମେଡିକାଲକୁ ଚିକିତ୍ସା ପାଇଁ ଆସିଥିବା ଜଣେ ମହିଳା ରୋଗୀ ରହୁଥିବା ସ୍ୱତନ୍ତ୍ର କେଭିନ୍ର ଛାତରୁ ହଠାତ୍ ସିଲିଂ ଭାଙ୍ଗି ତଳେ ପଡ଼ିଯାଇଛି। ତେବେ ଏହି ଦୁର୍ଘଟଣାରେ ମହିଳା ରୋଗୀଜଣକ ଅଳ୍ପକେ ବଡ଼ ବିପଦରୁ ବର୍ତ୍ତି ଯାଇଛନ୍ତି।
ମିଳିଥିବା ସୂଚନା ଅନୁଯାୟୀ, ପାରଳାଖେମୁଣ୍ଡି ସାମୁଟିଆ ସାହି ଅଞ୍ଚଳର ଭବଶ୍ରୀ ହଳଦର ନାମକ ଜଣେ ମହିଳା ଆଜି ସକାଳେ ନିଜର ଅପରେସନ (ଶଲ୍ୟ ଚିକିତ୍ସା) ପାଇଁ ମୁଖ୍ୟ ଚିକିତ୍ସାଳୟକୁ ଆସିଥିଲେ। ଚିକିତ୍ସାଳୟ ସ୍ୱତନ୍ତ୍ର କେଭିନ୍ – ୬୩,ମଧ୍ୟାହ୍ନ ପ୍ରାୟ ୧୨ଟାରେ ମହିଳାଙ୍କର ଡ୍ରେସିଙ୍ଗ୍ କାର୍ଯ୍ୟ ଶେଷ ହେବା ପରେ ତାଙ୍କୁ ମେଡିକାଲର ୬୩ ନମ୍ବର ସ୍ୱତନ୍ତ୍ର କେଭିନ୍ରେ ରଖାଯାଇଥିଲା। ସେ କେଭିନ୍ ଭିତରେ ଥିବା ସମୟରେ ହଠାତ୍ ଛାତର ସିଲିଂଟି ତାଙ୍କ ଉପରକୁ ଖସି ପଡ଼ିଥିଲା। ତେବେ ସୌଭାଗ୍ୟବଶତଃ ମହିଳା ରୋଗୀଙ୍କର କୌଣସି ପ୍ରାଣହାନି ବା ଗୁରୁତର ଆଘାତ ଲାଗିନାହିଁ ଏବଂ ସେ ସୁରକ୍ଷିତ ଅଛନ୍ତି।
ଜିଲ୍ଲାର ସବୁଠାରୁ ବଡ଼ ସରକାରୀ ଚିକିତ୍ସାଳୟର ସ୍ୱତନ୍ତ୍ର କେଭିନ୍ ଭିତରେ ଏଭଳି ଘଟଣା ଘଟିବା ମେଡିକାଲର ରକ୍ଷଣାବେକ୍ଷଣ ଓ ରୋଗୀ ସୁରକ୍ଷା ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଯେଉଁଠି ରୋଗୀ ଭଲ ହେବାକୁ ଆସୁଛନ୍ତି, ସେଠାରେ ଏଭଳି ବିପଜ୍ଜନକ ସ୍ଥିତିକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏହି ସମ୍ବେଦନଶୀଳ ଘଟଣା ପରେ ମେଡିକାଲ କର୍ତ୍ତୃପକ୍ଷ ତୁରନ୍ତ ଏହାର ଯାଞ୍ଚ କରି ସମସ୍ତ କେଭିନ୍ ଓ ୱାର୍ଡର ସ୍ଥିତି ସୁଧାରିବା ପାଇଁ ଦାବି ହେଉଛି।
