ଛତ୍ରପୁର, ୧୩।୮(ଦିଲ୍ଲୀପ ସାମଲ/ଦ୍ୱାରିକା ପଟ୍ଟନାୟକ): ଗଞ୍ଜାମ ଜିଲାର ଛତ୍ରପୁର ନିକଟସ୍ଥ ଆର୍ଯ୍ୟପଲ୍ଲୀ ଅଞ୍ଚଳରେ ସମୁଦ୍ର କ୍ରମଶଃ କୂଳ ଲଙ୍ଘି ଗାଁ ଆଡକୁ ମାଡ଼ି ଆସୁଥିବାରୁ ଅଞ୍ଚଳବାସୀଙ୍କ ମଧ୍ୟରେ ଭୟ ଓ ଆଶଙ୍କା ବଢ଼ିଛି। ଆର୍ଯ୍ୟପଲ୍ଲୀ ଗାଁ ଓ ବିଦ୍ୟାଳୟଠାରୁ ମାତ୍ର ପ୍ରାୟ ୧୦ରୁ ୧୫ ମିଟର ଦୂରରେ ସମୁଦ୍ର ରହିଥିବାରୁ ଆଗାମୀ ଦିନରେ ଗାଁ ଓ ଜନଜୀବନ ପ୍ରତି ବଡ଼ ବିପଦ ସୃଷ୍ଟି ହେବା ନେଇ ଚିନ୍ତା ପ୍ରକାଶ ପାଇଛି।
ଏହି ସମସ୍ୟାର ସ୍ଥାୟୀ ସମାଧାନ ଦାବିରେ ଛତ୍ରପୁର ପ୍ରେସ କ୍ଲବ ପରିସରରେ ପିସିସି ସଭ୍ୟ ତଥା ବରିଷ୍ଠ ଆଇନଜୀବୀ ଡଃ ଶମ୍ବୁ ପାଣିଗ୍ରାହୀ ସାମ୍ବାଦିକ ସମ୍ମିଳନୀ କରିଛନ୍ତି। କିଛି ଦିନ ପୂର୍ବେ ସେ ଆର୍ଯ୍ୟପଲ୍ଲୀ ଗସ୍ତ କରି ସ୍ଥିତି ଅନୁଧ୍ୟାନ କରିବା ସହ ଗ୍ରାମବାସୀଙ୍କ ସହ ଆଲୋଚନା କରିଥିଲେ।
ଡଃ ପାଣିଗ୍ରାହୀ କହିଛନ୍ତି, ଆର୍ଯ୍ୟପଲ୍ଲୀ ସମୁଦ୍ରରେ ଲୀନ ହେବା ପୂର୍ବରୁ ବଞ୍ଚାଇବା ଆବଶ୍ୟକ। ବର୍ତ୍ତମାନ ସାନ ଆର୍ଯ୍ୟପଲ୍ଲୀ, ବଡ଼ ଆର୍ଯ୍ୟପଲ୍ଲୀ ଓ କେ. ଆର୍ଯ୍ୟପଲ୍ଲୀ ଅଞ୍ଚଳ ସମୁଦ୍ର କ୍ଷୟର ଗୁରୁତର ପ୍ରଭାବରେ ରହିଛି। ଏହି ଅଞ୍ଚଳର ରାସ୍ତାଘାଟ, ଶ୍ମଶାନ ଓ ବିଭିନ୍ନ ସେଡ ଆଦି ସମୁଦ୍ର ଗର୍ଭରେ ଲୀନ ହୋଇଥିବା ନେଇ ସେ ଦାବି କରିଛନ୍ତି।
ସମସ୍ୟାର ତୁରନ୍ତ ସମାଧାନ ପାଇଁ ସେ ମୁଖ୍ୟମନ୍ତ୍ରୀ, ପ୍ରଧାନମନ୍ତ୍ରୀ, ରାଜ୍ୟପାଳ, କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ, ରାଜସ୍ବ ମନ୍ତ୍ରୀ, ଆରଡିସି ଓ ଗଞ୍ଜାମ ଜିଲାପାଳଙ୍କ ସମେତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଚିଠି ଲେଖି ତୁରନ୍ତ ହସ୍ତକ୍ଷେପ ଦାବି କରିଥିବା ସୂଚନା ଦେଇଛନ୍ତି।
ସେ ଦାବି କରିଛନ୍ତି ଯେ, ଆର୍ଯ୍ୟପଲ୍ଲୀ ସମେତ ପ୍ରଭାବିତ ଅଞ୍ଚଳର ତୁରନ୍ତ ବୈଜ୍ଞାନିକ ସର୍ବେକ୍ଷଣ, ଏକ ଉଚ୍ଚସ୍ତରୀୟ ବୈଷୟିକ ଟିମ ଦ୍ୱାରା ସ୍ଥିତି ଯାଞ୍ଚ, ଦୀର୍ଘକାଳୀନ ଉପକୂଳ ସୁରକ୍ଷା ବ୍ୟବସ୍ଥା ଏବଂ ଜରୁରୀକାଳୀନ ସୁରକ୍ଷା ପଦକ୍ଷେପ ଗ୍ରହଣ କରାଯାଉ। ଏଥିସହ ପ୍ରଭାବିତ ମତ୍ସ୍ୟଜୀବୀ ଓ ଅଞ୍ଚଳବାସୀଙ୍କ ପାଇଁ ସ୍ବତନ୍ତ୍ର ଆର୍ଥିକ ଓ ଜୀବିକା ପ୍ୟାକେଜ, ଜୀବିକା ପୁନରୁଦ୍ଧାର, ଉପଯୁକ୍ତ କ୍ଷତିପୂରଣ ଏବଂ ଆବଶ୍ୟକ ହେଲେ ପୁନର୍ବାସ ବ୍ୟବସ୍ଥା କରାଯିବାକୁ ସେ ଦାବି କରିଛନ୍ତି।
ଏହାସହ ଗୋପାଳପୁର ପୋର୍ଟ ଓ ଆଇଆରଇଏଲ ଭଳି ସଂସ୍ଥାଗୁଡ଼ିକ ଅଞ୍ଚଳରେ ସେମାନଙ୍କ ସାମାଜିକ ଦାୟିତ୍ୱ ଅଧୀନରେ ଉପକୂଳ ସୁରକ୍ଷା ଓ ପ୍ରଭାବିତ ଲୋକଙ୍କ ଜୀବିକା ସୁରକ୍ଷା ପାଇଁ ସହଯୋଗ କରିବାକୁ ସେ ଆହ୍ବାନ ଦେଇଛନ୍ତି।
ନିର୍ଦ୍ଧାରିତ ସମୟସୀମା ମଧ୍ୟରେ ସରକାର କିମ୍ବା ପ୍ରଶାସନ ପକ୍ଷରୁ ଠୋସ ପଦକ୍ଷେପ ନିଆନଗଲେ, ପ୍ରଭାବିତ ଅଞ୍ଚଳବାସୀ ଓ ମତ୍ସ୍ୟଜୀବୀଙ୍କୁ ସାଥୀ କରି ଡିଆରଡିଏ ନିକଟସ୍ଥ ଜାତୀୟ ରାଜପଥରେ ଶାନ୍ତିପୂର୍ଣ୍ଣ ରାସ୍ତା ଅବରୋଧ କରାଯିବ ବୋଲି ଡଃ ପାଣିଗ୍ରାହୀ ଚେତାବନୀ ଦେଇଛନ୍ତି।
ଆବଶ୍ୟକ ପଡ଼ିଲେ ହାଇକୋର୍ଟରେ ଜନସ୍ବାର୍ଥ ମାମଲା (ପିଆଇଏଲ) ଦାଖଲ କରାଯିବ ବୋଲି ମଧ୍ୟ ସେ ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ଛାତ୍ରନେତା ମହେଶ କୁମାର ଗୌଡ ଛାତ୍ର ନେତା, ସୁକାନ୍ତ ଦାସ, ଜି.ପାପା ରାଓ, ନିରାକାର ସାହୁ ଓ ହୃଷିକେଶ ବେହେରା ପ୍ରମୁଖ ଉପସ୍ଥିତ ଥିଲେ l
Dharitri – Odisha’s No.1 Odia Daily
