ନୂଆଦିଲ୍ଲୀ,୨୮।୮(ପି.ଟି.): ଶନିବାର ଜାତୀୟ କ୍ରୀଡ଼ା ଦିବସରେ ଅର୍ଜୁନ ପୁରସ୍କାର ପାଇବାକୁ ଯାଉଥିବା ଭାରତୀୟ ବ୍ୟାଡମିଣ୍ଟନ ତାରକା ସାତ୍ତ୍ୱିକସାଇରାଜ ରଙ୍କିରେଡ୍ଡୀ କୋଭିଡ୍-୧୯ ଟେଷ୍ଟରେ ପଜିଟିଭ୍ ବୋଲି ଜଣାପଡିଛି। ଏବେ ସେ ପାଖାପାଖି ଗୋଟିଏ ସପ୍ତାହ ହୋମ୍ କ୍ୱାରାଣ୍ଟାଇନ୍ରେ ରହିବେ। ତେବେ ୨୦ ବର୍ଷୀୟା ଏହି ପୁରୁଷ ଡବଲ୍ସ ଖେଳାଳିଙ୍କଠାରେ କୌଣସି ଲକ୍ଷଣ ଦେଖିବାକୁ ମଳିନାହିଁ।
ଦୁର୍ଭାଗ୍ୟଜନକ ଭାବେ ଏହା ସତ ଯେ, କରୋନା ଭାଇରସ୍ ଦ୍ୱାରା ସଂକ୍ରମିତ ହୋଇଛି। ଆଣ୍ଟିଜେନ୍ ଟେଷ୍ଟ କରିବା ପାଇଁ ଯାଇଥିଲି। ଏବେ ୫ ଦିନ ହେବ କ୍ୱାରାଣ୍ଟାଇନ୍ରେ ଅଛି। ଆରଟି- ପିସିଆର ଟେଷ୍ଟ କରିଥିଲି ଓ ଏହା ପଜିଟିଭ୍ ବୋଲି ଜଣାପଡିଥିଲା ବୋଲି ସାତ୍ତ୍ୱିକ କହିଛନ୍ତି। କୋଭିଡ୍-୧୯ର କୌଣସି ଲକ୍ଷଣ ନ ଥିଲେ ମଧ୍ୟ ଔଷଧ ଖାଉଛି। ମାତାପିତା, ବନ୍ଧୁ କେହି ଏହି ଭାଇରସ୍ ଦ୍ୱାରା ସଂକ୍ରମିତ ହୋଇନାହାନ୍ତି। ତେବେ କିଭଳି ସଂକ୍ରମିତ ହେଲି ତାହା ଜାଣିନାହିଁ ବୋଲି ସେ କହିଛନ୍ତି। ଆଗାମୀ ୩ ଦିନରେ ଆଉଏକ ପରୀକ୍ଷାର ସମ୍ମୁଖୀନ ହେବି। ମୋତେ ଜ୍ୱର ନାହିଁି କି କଫ ନାହିଁ। ଦେହ ମଧ୍ୟ ବିନ୍ଧାବିନ୍ଧି ହେଉନାହିଁ। ପଜିଟିଭ୍ ହେବା ପରେ ଅଲଗା କୋଠରିରେ ରହୁଛି। ଅବଶ୍ୟ ମୋତେ ବହୁତ ଲୋକେ ସାହାଯ୍ୟ କରିଛନ୍ତି। ମୋ ମାତାପିତା କିନ୍ତୁ ନେଗେଟିଭ ବୋଲି ଜଣାପଡିଛି ଓ ଏହା ମୋ ପାଇଁ ଏକ ଖୁସି ଖବର।
ସାତ୍ତ୍ୱିକ ଓ ତାଙ୍କ ଡବଲ୍ସ ପାର୍ଟନର ଚିରାଗ ସେଟ୍ଟୀ ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ରୌପ୍ୟ ପଦକ ହାସଲ କରିଥିଲେ। ଗତବର୍ଷ ମଧ୍ୟ ଏହି ଯୋଡି ଥାଇଲାଣ୍ଡ ଓପନ୍ ସୁପର ୫୦୦ ଟୁର୍ନାମେଣ୍ଟରେ ଟାଇଟଲ ହାସଲ କରିଥିଲେ। ଅର୍ଜୁନ ପୁରସ୍ପାର ପାଇଁ ତାଙ୍କ ନାମ ଏଥର ସୁପାରିସ୍ କରାଯାଇଛି। ଏହି ପୁରସ୍କାର ଅଲିମ୍ପିକ୍ସରେ ଭଲ ପ୍ରଦର୍ଶନ କରିବା ପାଇଁ ଉତ୍ସାହିତ କରିବ। ଅର୍ଜୁନ ପୁରସ୍କାର ଜିତିବା ମୋ ପାଇଁ ଗର୍ବର ବିଷୟ ଓ ଏହା ମୋ ପାଇଁ ପ୍ରଥମ ପୁରସ୍କାର ସାବ୍ୟସ୍ତ ହେବ ବୋଲି ସାତ୍ତ୍ୱିକ କହିଛନ୍ତି।
