ନୂଆଦିଲ୍ଲୀ,୨।୧୨: ୫ରାଜ୍ୟର ବିଧାନସଭା ଫଳାଫଳକୁ ନେଇ ସାମ୍ନାକୁ ଆସିସାରିଛି ଏକଜିଟ୍ ପୋଲ୍। ତାଜା ସ୍ଥିତି ଦର୍ଶାଉଛି ଯେ, ଭାଜପା ୨ଟି, କଂଗ୍ରେସ ଗୋଟିଏ ରାଜ୍ୟ ହାତେଇବ। ଯେତେବେଳେ କି କଂଗ୍ରେସ ତେଲଙ୍ଗାନାରେ ଭଲ ପ୍ରଦର୍ଶନ କରିଛି ଏବଂ ସେଠାରେ ସରକାର ଗଢିବା ନେଇ ଅନୁମାନ କରାଯାଉଛି। କିନ୍ତୁ ମିଜୋରାମରେ ଝୁଲା ବିଧାନସଭା ରହିବ ବୋଲି ଅନୁମାନ କରାଯାଉଛି। ଏପଟେ ଦେଶର ବଡ ବେଟିଂ ବଜାର ଫାଲୋଡି ନିର୍ବାଚନ ଫଳାଫଳକୁ ନେଇ ସରଗରମ ଲାଗି ରହିଛି। ବଜାରରେ ଭାଜପା ଫେଭରେଟ ହୋଇଛି। ଏପରିକି ବେଟିଂ ବଜାର ଅନୁଯାୟୀ, ଭାଜପା ପାଖାପାଖି ୩ଟି ରାଜ୍ୟରେ ବହୁମତ ନେବ ବୋଲି ଅନୁମାନ କରାଯାଉଛି। ଏପରିକି ରାଜସ୍ଥାନରେ ମଧ୍ୟ ଭାଜପା ପୂର୍ଣ୍ଣ ବହୁମତ ମିଳିବ ବୋଲି ବେଟିଂ ବଜାରରେ ଚର୍ଚ୍ଚା ଲାଗି ରହିଛି। ତେବେ ସବୁ ନ୍ୟୁଜ ସଂସ୍ଥା ଠାରୁ ଫାଲୋଡି ବେଟିଂ ବଜାରର ଗଣିତ ଏବଂ ବିଜୟ-ହାରର ସମୀକରଣ କିଛି ଅଲଗା ଟ୍ବିଷ୍ଟ ଦେଇଥାଏ ଅର୍ଥାତ୍ ଅନ୍ୟମାନଙ୍କ ଠାରୁ ଟିକେ ଆଗୁଆ ରହିଥାଏ। ଫଳାଫଳ ଉପରେ ଏହା ଅଧିକ ପ୍ରଭାବ ପକାଇଥାଏ।
ରାଜସ୍ଥାନର ସବୁଠୁ ବଡ ବେଟିଂ ବଜାର ଫାଲୋଡି ରାଜ୍ୟରେ ଭାଜପାର ବଡ ବିଜୟ ହେବ ବୋଲି କହିଛି। ଏକ ଜାତୀୟ ଗଣମାଧ୍ୟମକୁ ବେଟିଂ କରୁଥିବା ଲୋକମାନେ କହିଛନ୍ତି, ବେଟିଂ ବେଳେ ସମସ୍ତଙ୍କର ପସନ୍ଦ ଭାଜପା ରହିଛି। ରାଜସ୍ଥାନରେ ଭାଜପା ୧୧୫ରୁ ଅଧିକ ସିଟ୍ ଜିତିବ ବୋଲି ଆକଳନ କରାଯାଇଛି। ଅନ୍ୟପଟେ କଂଗ୍ରେସକୁ ୭୦ସିଟ୍ ମିଳିପାରେ ବୋଲି କୁହାଯାଉଛି। ସେହିପରି ମଧ୍ୟପ୍ରଦେଶରେ ୧୧୫-୧୧୭ ଓ କଂଗ୍ରେସ ୧୧୪-୧୧୬ ଆସନ ଜିତିପାରେ। ଛତିଶଗଡରେ ଭାଜପା ୫୦-୫୨ ଓ କଂଗ୍ରେସ ୩୭-୩୯ଆସନ ରହିପାରେ ବୋଲି କୁହାଯାଉଛି। ତେବେ ଏହି ୩ଟି ରାଜ୍ୟରେ କଡ୍ଡା ଟକ୍କର ହୋଇଥିଲେ ବି ଭାଜପା କ୍ଷମତାସୀନ ହେବ ବୋଲି ଅନୁମାନ କରାଯାଉଛି। କିନ୍ତୁ ତେଲଙ୍ଗାନାରେ କଂଗ୍ରେସ ମେଣ୍ଟ ସରକାର ଗଢି ସରକାର ଗଢିବ ବୋଲି ଆଶା କରାଯାଉଛି। ସେହିପରି ମିଜୋରାମ ମଧ୍ୟ କଂଗ୍ରେସ ହାତେଇବାର ଆଶା ଅଛି ବୋଲି ବେଟିଂରେ ଜଣା ପଡିଛି।
ତେବେ ସବୁଠାରୁ ତାଜୁବ କରିଦେବା ଖବର ହେଉଛି ଭାଜପାକୁ ଯଦି ରାଜସ୍ଥାନରେ ପୂର୍ଣ୍ଣ ବହୁମତ ଠାରୁ ଅଧିକ ସିଟ୍ ମିଳେ ତେବେ ଓମ ବିର୍ଲା ମୁଖ୍ୟମନ୍ତ୍ରୀ ହୋଇପାରନ୍ତି। ଆଉ ଯଦି ବହୁମତ ପାଖାପାଖି ଅର୍ଥାତ ୧୦୫-୧୧୦ ସିଟ୍ ମିଳେ ତେବେ ବସୁନ୍ଧରା ରାଜଙ୍କୁ ସିଏମ କରାଯାଇପାରେ ବୋଲି ବେଟିଂ ବଜାରରେ ଚର୍ଚ୍ଚା ରହିଛି।
