ବୈଶିଙ୍ଗା,୨୮ା୧୦(ଡି.ଏନ.ଏ.): ପରିଚାଳନାଗତ ତ୍ରୁଟିରୁ ମୟୂରଭଞ୍ଜ ଜିଲା ବୈଶିଙ୍ଗା ଓ ବେତନଟୀ ଅଞ୍ଚଳରେ ବାଲି ଖାଦାନ ବନ୍ଦ ରହିଛି। ଫଳରେ ବିଭିନ୍ନ ପଞ୍ଚାୟତରେ ଉନ୍ନତିିମୂଳକ କାର୍ଯ୍ୟ ଠପ୍ ହୋଇଯାଇଛି। ଶତାଧିକ ପ୍ରଧାନମନ୍ତ୍ରୀ ଆବାସ, କଙ୍କ୍ରିଟ ରାସ୍ତା, ସରକାରୀ କୋଠାବାଡ଼ି ସମେତ ଘର ନିର୍ମାଣ କାର୍ଯ୍ୟ ଅଧାପନ୍ତରିଆ ଅବସ୍ଥାରେ ପଡ଼ିରହଛି। ଆବାସ ଯୋଜନାରେ ଗୃହ ନିର୍ମାଣ ପାଇଁ ହିତାଧିକାରୀଙ୍କୁ ସରକାରଙ୍କ ପକ୍ଷରୁ ଆର୍ଥିକ ସହାୟତା ଯୋଗାଇ ଦିଆ ଯାଇଥାଏ। ମାତ୍ର ବାଲି ମିଳୁ ନ ଥିବାରୁ ବେତନଟୀ ବ୍ଲକ ଅଧୀନ ୨୪ଟି ପଞ୍ଚାୟତରେ ବିଜୁ ପକ୍କା ଘର ଓ ପ୍ରଧାନମନ୍ତ୍ରୀ ଆବାସ ଯୋଜନା ମନ୍ଥର ଗତିରେ ଚାଲିଛି।
ଚୋରାରେ ବାଲି ଆଣିଲେ ଏକ ଟ୍ରାକ୍ଟର ପ୍ରତି ୩୦୦୦ ଟଙ୍କା ଏବଂ ଡମ୍ପର ପିଛା ୧୮୦୦୦ ଟଙ୍କା ପଡୁଥିବା ବେଳେ ରାଜସ୍ବ ବିଭାଗ ହାବୁଡ଼ରେ ପଡ଼ିଲେ ବାଲିର ଜରିମାନା ଗାଡ଼ିର ମୂଲ୍ୟଠାରୁ ମଧ୍ୟ ଅଧିକ ହୋଇ ଯାଉଥିବା ଦେଖିବାକୁ ମିଳୁଛି। ଫଳରେ ହିତାଧିକାରୀ ନିଜର ପୁରୁଣା ଘରକୁ ଭାଙ୍ଗି ନୂଆ ଘରେ ରହିବା ସପ୍ନ ଦିନ କେଇଟାରେ ଦିବା ସ୍ବପ୍ନରେ ପରିଣତ ହେଉଛି। ତେଣୁ ସରକାରୀ ଘର ବା ରାସ୍ତା ନିର୍ମାଣ ପାଇଁ ଯେଉଁ ବାଲି ଆବଶ୍ୟକ ତାହାପାଇଁ ସରକାରୀ ନୀତି କୋହଳ ହେବାର ଆବଶ୍ୟକତା ରହିଛି। ଏହା ବ୍ୟତୀତ ବାଲି ଉଠାଣରେ ନିୟୋଜିତ ଦିନ ମଜୁରିଆମାନେ ମଧ୍ୟ କାମ ନ ପାଇ ହତାଶ ହୋଇ ପଡ଼ିଥିବା ଲକ୍ଷ୍ୟ କରାଯାଉଛି। ପ୍ରତିବର୍ଷ ପ୍ରତି ପଞ୍ଚାୟତରେ ପାରିତ ହୋଇଥିବା ପ୍ରକଳ୍ପ ଗୁଡ଼ିକର ନିର୍ମାଣ ଶେଷ ନ ହେବା ଯୋଗୁ ବିଭାଗୀୟ ବିନିଯୋଗ ପ୍ରମାଣପତ୍ର ଦିଆଯାଇ ପାରୁନାହିଁ। ଫଳରେ ପରବର୍ତ୍ତୀ ପର୍ଯ୍ୟାୟ ସରକାରୀ ଅନୁଦାନ ମଧ୍ୟ ଆସିପାରୁନାହିଁ। ଏ ସମ୍ପର୍କରେ ବେତନଟୀ ବିଡିିଓ ଛବିରାଣୀ ସାହୁଙ୍କୁ ପଚାରିବାରୁ ସେ ଏହି ସମସ୍ୟା ସମ୍ପର୍କରେ ଅବଗତ ଅଛନ୍ତି ଏବଂ ବିଭିନ୍ନ ଉନ୍ନୟନ ମୂଳକ କାର୍ଯ୍ୟରେ ଅଚଳାବସ୍ଥା ଦେଖା ଦେଉଥିଲେ ମଧ୍ୟ ବାଲି ଖାଦାନ ନିଲାମ ପ୍ରକ୍ରିୟା ରାଜସ୍ବ ବିଭାଗର ହୋଇଥିବା ଯୋଗୁ ତାଙ୍କର କିଛି କରିବାର ନାହିଁ ବୋଲି କହିଛନ୍ତି। ଅନ୍ୟ ପକ୍ଷରେ ବେତନଟୀ ତହସିଲଦାର ଅନୀତା ନାୟକଙ୍କ ମତାମତ ନେବାରୁ ସେ କୁହନ୍ତି, ବାଲି ଖାଦାନ ନିଲାମ ପ୍ରକ୍ରିୟା ଚାଲିଛି। ମାତ୍ର ପୂର୍ବରୁ ଦୁଇ ଦୁଇ ଥର ଏଥିପାଇଁ ତାରିଖ ଧାର୍ଯ୍ୟ କରାଯାଇଥିବା ବେଳେ କୌଣସି ଜଣେ ହେଲେ ନିଲାମ ପ୍ରକ୍ରିୟାରେ ସାମିଲ ହେବା ପାଇଁ ଆବେଦନ କରି ନାହାନ୍ତି। ଏ ସଂକ୍ରାନ୍ତରେ ସେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଛନ୍ତି। ତେବେ ସରକାରଙ୍କ ପକ୍ଷରୁ ବାଲିର ରୟାଲଟି ମୂଲ୍ୟ ଚଳିତ ବର୍ଷ ଅତ୍ୟଧିକ ବୃଦ୍ଧି କରାଯାଇ କ୍ୟୁବିକ ମିଟର ପ୍ରତି ୮୨୦ ଟଙ୍କା ଧାର୍ଯ୍ୟ କରାଯାଇଥିବା କାରଣରୁ ବାଲି ଘାଟ ନିଲାମ ପ୍ରକ୍ରିୟାରେ ସାମିଲ ହେବାକୁ କେହି ଆଗ୍ରହ ପ୍ରକାଶ କରୁ ନ ଥିବା ସୂଚନା ମିଳିଛି। ତେଣୁ ରାଜସ୍ବ ବିଭାଗ ଏଥିପ୍ରତି ଗୁରୁତ୍ୱ ଦେବା ଜରୁରୀ ହୋଇ ପଡ଼ିଛି।
