ପୁରୀ ଅଫିସ,୨୭ା୮: ପୁରୀ ଜିଲା ଉପକୂଳବର୍ତ୍ତୀ ଅଞ୍ଚଳର ସୁରକ୍ଷା ପ୍ରାଚୀର ଭାବେ ପ୍ରାକୃତିକ ବାଲିସ୍ତୂପ କାମ କରୁଥିଲା। ବର୍ଷା, ପବନ ଅବା ସମୁଦ୍ର ଲୁଣାପାଣି ମାଡ଼ିି ଆସିବାରୁ ଏହା ପ୍ରତିହତ କରି ପାରୁଥିଲା। ହେଲେ ଆଜି ଆଉ ସେଭଳି ଚିତ୍ର ନାହିିଁ। ବାଲିମାଫିଆଙ୍କ ଲୋଲୁପ ଦୃଷ୍ଟିରେ ପ୍ରାକୃତିକ ବାଲିସ୍ତୂପ ନଷ୍ଟ ହୋଇଗଲାଣି। ଗୋଟିଏ ପଟେ ବାଲି ଚୋରା ଚାଲାଣ କରି ମାଫିଆମାନେ ମାଲାମାଲ୍ ହେଉଥିବାବେଳେ ଅନ୍ୟପଟେ ଅନେକ ସମୟରେ ଜନବସତିକୁ ସମୁଦ୍ର ଜୁଆର ମାଡ଼ିି ଆସିବା ଭଳି ସ୍ଥିତି ସୃଷ୍ଟି ହେଉଛି। ଏହାସତ୍ତ୍ୱେ ମାଫିଆଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଫଳରେ ରାତିଅଧିଆ ସରକାରୀ ଜମିରୁ ବାଲି ଲୁଟ୍ ବଢିଚାଲିଛି। ସରକାର ମଧ୍ୟ ବିପୁଳ ପରିମାଣର ରାଜସ୍ବ ହରାଉଛନ୍ତି।
ପୁରୀ ଜିଲାରେ ବେଆଇନ ବାଲି ଚାଲାଣ ଉପରେ ରୋକ୍ ଲାଗି ପାରୁନାହିଁ। ଅନେକ ସମୟରେ ଅଭିଯୋଗ ପରେ ଧରପଗଡ଼ ହେଉଥିଲେ ବି ପରବର୍ତ୍ତୀ ସମୟରେ ପ୍ରଶାସନ ନିଷ୍କ୍ରିୟତାର ସୁଯୋଗ ଉଠାଉଛନ୍ତି ମୁନାଫାଖୋର ବାଲି ବ୍ୟବସାୟୀ। ବିଶେଷକରି ପୁରୀ ସହରରେ ଏହି ବେଆଇନ କାରବାର ବଢିଚାଲିଛି। ଗତ ଶନିବାର ପୁରୀ ମ୍ୟୁନିସିପାଲିଟିର ଡମ୍ପିଂୟାର୍ଡ ନିକଟ ଏକ ସରକାରୀ ଜମିରୁ ବାଲି ଚୋରା ଚାଲାଣ ହେଉଥିଲା। ଏକ ଟ୍ରାକ୍ଟରରେ ବାଲି ଲୋଡ୍ କରାଯାଉଥିବା ଖବର ପାଇ ବଳିଆପଣ୍ଡା ପୋଲିସ ସେଠାରେ ଚଢାଉ କରିଥିଲା। ୨ଜଣ ଖସିଯାଇଥିବା ବେଳେ ୩ଜଣଙ୍କୁ ଗିରଫ କରାଯିବା ସହ ବାଲି ଭର୍ତ୍ତିି ଏକ ଟ୍ରାକ୍ଟର ଜବତ କରାଯାଇଥିଲା। ଏଭଳି ଭାବେ ପ୍ରତିଦିନ ବିଭିନ୍ନ ସ୍ଥାନରୁ ବାଲି ଚୋରାଚାଲାଣ ହେଉଛି। ଗତବର୍ଷ ପୁରୀ ବଳିଆପଣ୍ଡା ଅଞ୍ଚଳରେ ଏକ ବଡ଼ ବାଲିମାଫିଆ ର଼୍ୟାକେଟକୁ ଧରିଥିଲା ପୋଲିସ। ସମୁଦ୍ର ବେଳାଭୂମି କଡ଼ ବଳିଆପଣ୍ଡା ଓ ସିପସରୁବାଲି ଅଞ୍ଚଳରେ ବାଲିସ୍ତୂପ ଥିବାରୁ ମାଫିଆଙ୍କ ନଜର ଏହି ଅଞ୍ଚଳ ଉପରେ ପଡ଼ିଥିଲା। ବାଲି ଚାଲାଣ ଯୋଗୁ ଏହି ଅଞ୍ଚଳର ଅନେକ ଜାଗାରେ ବଡ଼ ବଡ଼ ଖାଲ ସୃଷ୍ଟି ହୋଇଛି। ଗତବର୍ଷ ଫେବୃୟାରୀ ୨୨ତାରିଖ ରାତିରେ ବଳିଆପଣ୍ଡା ପାଖ ବେଳାଭୂମି କଡ଼ରୁ ଦୁଇଟି ଜେସିବି ସାହାଯ୍ୟରେ ବାଲି ଖୋଳାଯାଇ ଚୋରା ଚାଲାଣ କରାଯାଇଥିଲା। ପ୍ରାୟ ୧୫ଟି ହାଇୱା, ଡମ୍ପର ଏବଂ ଟ୍ରକ୍ ବାଲି ନେବା ପାଇଁ ଠିଆ ହୋଇଥିବା ପ୍ରଶାସନ ପାଖରେ ଖବର ପହଞ୍ଚିଥିଲା। ରାତିଅଧିଆ ଚଢାଉ କରାଯାଇ ୧୭ଟି ଗାଡ଼ି ଜବତ ସହ ୯ ଡ୍ରାଇଭରଙ୍କୁ ଗିରଫ କରାଯାଇଥିଲା। ଏହାପରେ କିଛିଦିନ ଏହି ବେଆଇନ କାରବାର ଧିମେଇ ଯାଇଥିଲା। ମାତ୍ର ଏବେ ପୁଣି ମାଫିଆ ସକ୍ରିୟ ହୋଇ ଉଠିଛନ୍ତି। ତେବେ ଏ ନେଇ ପୁରୀ ସଦର ତହସିଲଦାର ରବୀନ୍ଦ୍ର ପ୍ରଧାନଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳିପାରି ନାହିଁ।
