ଏବେ ସମ୍ବିତଙ୍କ ଖୁସିି କହିଲେ ନ ସରେ। ସେ ବା କେମିତି ଖୁସି ନ ହେବେ କହୁନାହାନ୍ତି ? ପ୍ରଥମ କଥା ହେଲା, ତାଙ୍କ ଅଭିନୀତ ତଥା ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ସନାତନୀ’ ଚଳିତ ମାସ ୭ ତାରିଖରେ ରିଲିଜ ହୋଇଛି। ଅନ୍ୟପକ୍ଷରେ ଏବେ ତାଙ୍କ ହାତରେ ଆଉ ଏକ ସିନେମା। ଅର୍ଥାତ୍, ‘ସନାତନୀ’ର ପ୍ରଯୋଜନା କରିଥିବା ଓଲିଉଡ୍ର ବିଶିଷ୍ଟ ପ୍ରଯୋଜକ ବିଜୟ କାନ୍ଦୋଇ ତାଙ୍କର ଆଗାମୀ ଫିଲ୍ମ ‘ଚୋରାବାଲି’ ପାଇଁ ସମ୍ବିତଙ୍କୁ ସାଇନ୍ କରାଇଛନ୍ତି। ଏହାର କାହାଣୀ ରହସ୍ୟ ରୋମାଞ୍ଚ ଉପରେ ଆଧାରିତ। ସବୁଠାରୁ ଖାସ୍ କଥା ହେଲା, ଉକ୍ତ ଫିଲ୍ମକୁ ସେ ତାଙ୍କର ଜନ୍ମଦିନରେ ହିଁ ସାଇନ୍ କରିଛନ୍ତି। ଏ ନେଇ ସମ୍ବିତ କହନ୍ତି, ‘ଏହି ନୂଆ ସିନେମା ମୋ ଆକ୍ଟିଂ କ୍ୟାରିୟର ପାଇଁ ଟର୍ନିଂ ପଏଣ୍ଟ ହେବ ବୋଲି ଆଶା ରଖିଛି। ସସପେନ୍ସ ଥ୍ରୀଲର୍ କାହାଣୀକୁ ଆଧାର କରି ଏହାକୁ ନିର୍ମାଣ କରାଯିବ। ଫିଲ୍ମଟି ଦର୍ଶକଙ୍କୁ ଶତ ପ୍ରତିଶତ ଏଣ୍ଟରଟେନମେଣ୍ଟ ଦେବ ବୋଲି ମୋର ଦୃଢ଼ ବିଶ୍ୱାସ। ଏହି ବ୍ୟାନରରେ ମୋତେ ବ୍ୟାକ୍-ଟୁ-ବ୍ୟାକ୍ ଅଭିନୟ କରିବାର ସୁଯୋଗ ମିଳିଛି। ଏ ନେଇ ମୁଁ ବିଜୟ ସାର୍ଙ୍କୁ ଯେତେ ଧନ୍ୟବାଦ ଦେବି ତାହା କମ୍ ହେବ।“ ଏହି ଫିଲ୍ମର ନିର୍ଦ୍ଦେଶନା ଦେବେ ନବାଗତ ସ୍ମୃତି ଆର.। ବିଦିଶା କ୍ରାଫ୍ଟ ବ୍ୟାନରରେ ଏହାର କାହାଣୀ, ଚିତ୍ରନାଟ୍ୟ ଏବଂ ସଂଳାପ ରଚନା କରିଛନ୍ତି ମାନସ ପଢ଼ିହାରୀ। ଫିଲ୍ମର ଅବଶିଷ୍ଟ କାଷ୍ଟିଂ ଖୁବ୍ ଶୀଘ୍ର ଘୋଷଣା କରାଯିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ସୂଚନା ଦିଆଯାଇଛି।
