ନୂଆଦିଲ୍ଲୀ,୨୭।୧୧ : ସମ୍ପତ୍ତି ଟାଇଟଲ ହସ୍ତାନ୍ତର ସମ୍ପର୍କରେ ସୁପ୍ରିମକୋର୍ଟ ଏକ ବଡ ନିଷ୍ପତ୍ତି ଦେଇଛନ୍ତି। ଏକ ମାମଲାର ଶୁଣାଣି ବେଳେ କୋର୍ଟ କହିଛନ୍ତି ସମ୍ପତ୍ତିର ଟାଇଟଲ ସ୍ଥାନାନ୍ତର କରିବା ପାଇଁ ଏକ ପଞ୍ଜୀକୃତ ଡକ୍ୟୁମେଣ୍ଟ ରହିବା ଆବଶ୍ୟକ। କୋର୍ଟଙ୍କ ଅନୁଯାୟୀ, କେବଳ ସେଲ୍ ଏଗ୍ରିମେଣ୍ଟ ଅବା ପାଓ୍ବାର ଅଫ ଆଟର୍ନିକୁ ଟାଇଟଲ ସ୍ଥାନାନ୍ତର ପାଇଁ ଯଥେଷ୍ଟ ବିବେଚନା କରାଯାଇପାରିବ ନାହିଁ। ସୁପ୍ରିମକୋର୍ଟ କହିଛନ୍ତି ରେଜିଷ୍ଟ୍ରେଶନ ଆକ୍ଟ ୧୯୦୮ ଅନୁଯାୟୀ, ଦଲିଲଗୁଡ଼ିକ ପଞ୍ଜୀକୃତ ହେଲେ ହିଁ ଜଣେ ସମ୍ପତ୍ତିର ମାଲିକ ହୋଇପାରିବେ।
ଯେଉଁ ମାମଲାରେ କୋର୍ଟ ଏହାର ରାୟ ଦେଇଛନ୍ତି, ଆବେଦନକାରୀ କହିଥିଲେ ସେ ସମ୍ପତ୍ତିର ମାଲିକ ଅଟନ୍ତି ଏବଂ ସମ୍ପତ୍ତି ତାଙ୍କୁ ତାଙ୍କ ଭାଇଙ୍କ ଦ୍ୱାରା ଉପହାର ସ୍ବରୂପ ପ୍ରଦାନ କରାଯାଇଥିଲା। ସେ କହିଛନ୍ତି ଏହି ସମ୍ପତ୍ତି ଭାଇଙ୍କର ଏବଂ ସମ୍ପତ୍ତି ମଧ୍ୟ ତାଙ୍କର ଦଖଲ ରହିଛି। ପ୍ରତିପକ୍ଷ ଏହି ସମ୍ପତ୍ତି ଦାବି କରି ଏହାର ସପକ୍ଷରେ ସେଲ୍ ଏଗ୍ରିମେଣ୍ଟ ଏବଂ ପାଓ୍ବାର ଅଫ ଆଟର୍ନି ସହିତ ଆଫିଡେଭିଟ ରହିଥିବା କହିଥିଲେ।
ପ୍ରତିପକ୍ଷର ଜବାବରେ ଆବେଦନକାରୀ କହିଥିଲେ ଯେଉଁ ଆଧାରରେ ଅଭିଯୁକ୍ତ ଦାବି କରିଛନ୍ତି ତାହା ବୈଧ ନୁହେଁ। ପଞ୍ଜୀକୃତ ଦଲିଲ ବିନା ଅସ୍ଥାବର ସମ୍ପତ୍ତିର ମାଲିକାନା ହୋଇପାରିବ ନାହିଁ ବୋଲି ସେ କହିଛନ୍ତି। ସୁପ୍ରିମକୋର୍ଟ ଏହା ସହ ସହମତ ହୋଇ କହିଛନ୍ତି ପଞ୍ଜୀକୃତ ଦଲିଲ ବିନା ଅସ୍ଥାବର ସମ୍ପତ୍ତିର ମାଲିକାନା ସ୍ଥାନାନ୍ତର ହୋଇପାରିବ ନାହିଁ, ତେଣୁ ପ୍ରତିପକ୍ଷଙ୍କ ଦାବିକୁ ପ୍ରତ୍ୟାଖ୍ୟାନ କରାଯାଇଛି। କୋର୍ଟ ମଧ୍ୟ ଆବେଦନକାରୀଙ୍କ ଆବେଦନକୁ ଗ୍ରହଣ କରିଛନ୍ତି।
ସୂଚନାଯୋଗ୍ୟ, ପାୱାର୍ ଅଫ ଆଟର୍ନି ହେଉଛି ଏକ ଆଇନଗତ ପ୍ରାଧିକରଣ ଯାହା ସମ୍ପତ୍ତିର ମାଲିକ ଦ୍ୱାରା ଅନ୍ୟ ଜଣକୁ ଦିଆଯାଏ । ପାୱାର୍ ଅଫ ଆଟର୍ନି ପାଇବା ଦ୍ୱାରା, ସେହି ବ୍ୟକ୍ତି ସେହି ସମ୍ପତ୍ତି କ୍ରୟ କିମ୍ବା ବିକ୍ରୟ ସମ୍ବନ୍ଧୀୟ ନିଷ୍ପତ୍ତି ନେଇପାରିବେ। କିନ୍ତୁ ଏହା ସମ୍ପତ୍ତିର ମାଲିକାନାର ପ୍ରଦାନ କରି ନ ଥାଏ। ସେଲ୍ ଏଗ୍ରିମେଣ୍ଟ ହେଉଛି ଏକ ଡକ୍ୟୁମେଣ୍ଟ ଯେଉଁଥିରେ ସମ୍ପତ୍ତି ସହିତ ଜଡିତ ସମସ୍ତ ବିବରଣୀ କ୍ରେତା ଏବଂ ବିକ୍ରେତା ମଧ୍ୟରେ ସ୍ଥିର ହୋଇଥାଏ। ଏଥିରେ ସମ୍ପତ୍ତିର ମୂଲ୍ୟ ଏବଂ ପୂର୍ଣ୍ଣ ଦେୟ ସମ୍ବନ୍ଧୀୟ ସମସ୍ତ ତଥ୍ୟ ରେକର୍ଡ କରାଯାଇଥାଏ। ମାତ୍ର ଏହା ମାଲିକାନା ପ୍ରଦାନ କରି ନ ଥାଏ।
