ରାୟଗଡ଼ା ଅଫିସ,୨ା୯: କର୍ତ୍ତବ୍ୟରେ ଅବହେଳା ବିରୋଧରେ ରାୟଗଡ଼ା ଜିଲାପାଳ ସ୍ବଧାଦେବ ସିଂ ଶୁକ୍ରବାର ଦୃଢ଼ କାର୍ଯ୍ୟାନୁଷ୍ଠାନ ନେଇଛନ୍ତି। କାଶୀପୁର ତହସିଲଦାରଙ୍କ ସମେତ ତହସିଲ କାର୍ଯ୍ୟାଳୟର ୩୦ କର୍ମଚାରୀଙ୍କ ମାସକର ଦରମା ବନ୍ଦ କରିଛନ୍ତି।
ସୂଚନାଯୋଗ୍ୟ, ଜିଲାର ବିଭିନ୍ନ ତହସିଲ କାର୍ଯ୍ୟାଳୟରେ ଅନେକ ସମୟରେ କର୍ମଚାରୀଙ୍କ ଅନୁପସ୍ଥିତି, ଠିକ୍ ସମୟରେ ଲୋକଙ୍କୁ ସେବା ପ୍ରଦାନ କରାଯାଉ ନ ଥିବାରୁ ଲୋକେ ନିରାଶ ହୋଇ ଫେରିବା ଏବଂ ସରକାରୀ ଯୋଜନାଗୁଡ଼ିକ କାର୍ଯ୍ୟକାରୀ ହେବାରେ ବିଳମ୍ବ ଘଟୁଥିବା ନେଇ ଜିଲାପାଳଙ୍କ ନିକଟରେ ଅଭିଯୋଗ ପହଞ୍ଚିଥିଲା। ବିଶେଷକରି କାଶୀପୁର ତହସିଲ କାର୍ଯ୍ୟାଳୟରେ ଲୋକେ ସେବା ନ ପାଇ ଅଧିକ ହଇରାଣ ହେଉଥିବା ଜିଲାପାଳଙ୍କ ନଜରକୁ ଆସିଥିଲା। ଶୁକ୍ରବାର ଜିଲାପାଳ ରାଜସ୍ବ ବିଭାଗ ଅଧିକାରୀଙ୍କୁ ନେଇ ସମୀକ୍ଷା ବୈଠକ କରିଥିବାବେଳେ ଏ ନେଇ ଅସନ୍ତୋଷ ପ୍ରକାଶ କରିଥିଲେ। ବୈଠକ ପରେ ଜିଲାପାଳ କାଶୀପୁର ତହସିଲଦାର ଏବଂ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ଜିଲାର ଅନ୍ୟ ସମସ୍ତ ତହସିଲଦାରଙ୍କୁ ତାଗିଦକରି ତୁରନ୍ତ ରାଜସ୍ବ ମାମଲାଗୁଡ଼ିକର ଫଇସଲା କରିବାକୁ କହିଥିଲେ। ପ୍ରତ୍ୟେକ ବ୍ଲକରେ ହେବାକୁ ଥିବା ମିନି ଷ୍ଟାଡିୟମ ପାଇଁ ତୁରନ୍ତ ୫ ଏକର ଜାଗା ଚିହ୍ନଟ, ବସ୍ଷ୍ଟାଣ୍ଡ ପାଇଁ ଜାଗା ପ୍ରଦାନ, ମିଶନ ଶକ୍ତି ଗୃହ ପାଇଁ ରାୟଗଡ଼ା ତହସିଲ ପକ୍ଷରୁ ଶୀଘ୍ର ଜାଗା ଚିହ୍ନଟ କରିବାକୁ ତହସିଲଦାରମାନଙ୍କୁ ନିର୍ଦ୍ଦେଶ ଦିଆଯାଇଛି। ବୈଠକରେ ଅତିରିକ୍ତ ଜିଲାପାଳ ସୋମନାଥ ପ୍ରଦାନ, ଗୁଣପୁର ଉପଜିଲାପାଳ ସୋମନାଥ ଦଳବେହେରା, ରାୟଗଡ଼ା ଉପଜିଲାପାଳ ଭୀମସେନ ଶବରଙ୍କ ସମେତ ଜିଲାର ସମସ୍ତ ତହସିଲଦାର ଉପସ୍ଥିତ ଥିଲେ। ତେବେ କାଶୀପୁର ତହସିଲଦାର ଓ କର୍ମଚାରୀଙ୍କ ଦରମା ବନ୍ଦ ବିଷୟରେ ଜିଲାପାଳଙ୍କୁ ପଚାରିବାରୁ ସେ କହିଛନ୍ତି, ଏହା ପ୍ରଶାସନିକ ସ୍ତରର ନିଷ୍ପତ୍ତି। ତେଣୁ ଏ ବିଷୟରେ କୌଣସି ସୂଚନା ଦେଇପାରିବେ ନାହିଁ ବୋଲି ସେ କହିଛନ୍ତି।
