ମୁମ୍ବାଇ,୧୬।୧: ବଲିଉଡରେ ହଲଚଲ। ବଲିଉଡ ଷ୍ଟାର ସୈଫ ଅଲ୍ଲୀ ଖାନଙ୍କ ଘର ଉପରେ ଆକ୍ରମଣ ଖବର ଏବେ ପୁରା ବଲିଉଡ ଇଣ୍ଡଷ୍ଟ୍ରିକୁ ତାଜୁବ କରିଦେଇଛି। ବଲିଉଡ ଷ୍ଟାର ସୈଫ ଅଲ୍ଲୀ ଖାନଙ୍କୁ ଛୁରାମାଡ। ତାଙ୍କୁ ଚିକିତ୍ସା ପାଇଁ ଲୀଳାବତୀ ହସ୍ପିଟାଲରେ ଭର୍ତ୍ତି କରାଯାଇଛି। ରାତି ପ୍ରାୟ ସାଢ଼େ ୩ଟାରେ ଅଭିନେତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ତାଙ୍କ ଶରୀରରେ ମୋଟ ଛଅଟି କ୍ଷତ ହୋଇଛି, ଯେଉଁଥିରୁ ଦୁଇଟି ଗଭୀର ଆଘାତ ଲାଗିଛି। ଚୋର କିପରି କଡା ସୁରକ୍ଷା ବଳୟରେ ପ୍ରବେଶ କରି ଏହି କାଣ୍ଡ ଭିଆଇଲା ତାହା ପୋଲିସ ପାଇଁ ମୁଣ୍ଡବିନ୍ଧାର କାରଣ ପାଲଟିଛି। ଘଟଣା ପରେ, ଅଭିନେତାଙ୍କୁ ଲୀଳାବତୀ ହସ୍ପିଟାଲରେ ଭର୍ତ୍ତି କରାଯାଇଥିଲା, ଯେଉଁଠାରେ ତାଙ୍କର ଅସ୍ତ୍ରୋପଚାର କରାଯାଇଥିଲା। ତେବେ ସୈଫଙ୍କ ସର୍ଜରୀ ସଫଳ ହୋଇଛି। ଏହାପରେ ଅଭିନେତାଙ୍କ ପ୍ରଥମ ପ୍ରତିକ୍ରିୟା ସାମ୍ନାକୁ ଆସିଛି।
ଘଟଣା ନେଇ ସୈଫ ଅଲ୍ଲୀ ଖାନ ମୁହଁ ଖୋଲିଛନ୍ତି। ତାଙ୍କର ସର୍ଜରୀ ପରେ ସେ ଗଣମାଧ୍ୟମକୁ ପ୍ରତମ ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି, ମୋତେ ଆକ୍ରମଣ ହୋଇଛି। ଏହି ଘଟଣାରେ କେହି ଉତ୍ତେଜିତ ନ ହୋଇ ଶାନ୍ତ ରୁହନ୍ତୁ। ହସ୍ପିଟାଲରେ ମୋର ଚିକିତ୍ସା ଚାଲିଛି। ଏବେ ମୁଁ ସମ୍ପୂର୍ଣ୍ଣ ବିପଦମୁକ୍ତ।
କୁହାଯାଉଛି ଯେ ଚୋର କିପରି ଘରେ ପ୍ରବେଶ କଲା ତାହା ପୋଲିସ ସ୍ପଷ୍ଟ କରିଛି। ଏହି ସମ୍ପୂର୍ଣ୍ଣ ମାମଲାରେ ତିନି ଜଣଙ୍କୁ ଅଟକ ରଖାଯାଇଛି। ଏହି ତିନିଜଣ ଲୋକ ଘରେ କାମ କରନ୍ତି। ପୋଲିସ ସୂତ୍ରରୁ ସୂଚନା ମିଳିଛି ଯେ, ଆକ୍ରମଣକାରୀ ପୂର୍ବରୁ ଏହି ଘରେ କାମ କରିଥାଇପାରନ୍ତି ଏବଂ ତାଙ୍କୁ ଚାକିରିରୁ ବାହାର କରିଯାଇ ଥାଇପାରେ। ଯାହା ପରେ ସେ ପ୍ରତିଶୋଧ ନେବାର ଭାବନା ସହିତ ଘରେ ପ୍ରବେଶ କରିଥାଇପାରନ୍ତି।
