କୋରାପୁଟ, ୧୪।୪(ଅମିତାଭ ବେହେରା ): ଭାରତୀୟ ଜନତା ପାର୍ଟି ଅନୁସୂଚିତ ଜାତି ମୋର୍ଚ୍ଚାର ଜିଲା ସଭାପତି ଭାବେ ସାହେବ ଖିଲଙ୍କୁ ନିଯୁକ୍ତ କରିଛି। ଅନୁସୂଚିତ ଜାତି ମୋର୍ଚ୍ଚାର ସଭାପତି ଭାବେ ଚୟନ କରାଯାଇଥିବାରୁ ସେ କୋରାପୁଟ ବିଧାୟକ ରଘୁରାମ ମାଛ ଓ ଭାଜପା ରାଜ୍ୟ ସଭାପତି ମନମୋହନ ସାମଲଙ୍କ ସମେତ ସମସ୍ତ ଭାଜପା ନେତା ଓ କର୍ମୀଙ୍କୁ ଧନ୍ୟବାଦ ଜଣାଇଛନ୍ତି। ସାହେବ ଖିଲ ଭାଜପାରେ ବହୁ ବର୍ଷ ଧରି ଶୃଙ୍ଖଳିତ କର୍ମୀ ଭାବେ କାର୍ଯ୍ୟ କରି ଆସୁଛନ୍ତି। ସାଧାରଣ ନିର୍ବାଚନରେ ତାଙ୍କର ଭୂମିକା ଅନେକ ରହିଥିଲା। ଦଳକୁ ଆଗକୁ ନେବା ପାଇଁ ସେ ସବୁବେଳେ ତତ୍ପରତା ଦେଖାଇ ଆସିଛନ୍ତି। ଗାଁ ଗାଁରେ ଲାଗି ରହିଥିବା ସମସ୍ୟାକୁ ଦଳୀୟ ନେତା ଓ ପ୍ରଶାସନଙ୍କ ପାଖରେ ଉପସ୍ଥାପନା କରି ସମସ୍ୟାର ସମାଧାନ କରୁଛନ୍ତି। ଆଗକୁ ଦଳକୁ ମଜବୁତ କରିବା ସହିତ ଲୋକମାନଙ୍କ ସମସ୍ୟା ସମାଧାନ କରିବା ଦିଗରେ ଚେଷ୍ଟା ଜାରି ରଖିବି ବୋଲି ସାହେବ ଖିଲ କହିଛନ୍ତି।
