ନୂଆଦିଲ୍ଲୀ, ୨୨ା୯: ପାକିସ୍ତାନର ତାଲିବାନ୍ ପ୍ରେମ ଯୋଗୁ ଆସନ୍ତା ୨୫ରେ ହେବାକୁ ଥିବା ସାଉଥ୍ ଏସିଆନ ଆସୋସିଏଶନ ଫର୍ ରିଜିଓନାଲ କୋଅପରେଶନ(ସାର୍କ) ବହିର୍ବ୍ୟାପାର ମନ୍ତ୍ରୀଙ୍କ ବୈଠକ ବାତିଲ ହୋଇଛି। ଏହି ବୈଠକରେ ତାଲିବାନ୍ ପ୍ରତିନିଧିଙ୍କୁ ସାମିଲ କରିବାକୁ ପାକିସ୍ତାନ ଜିଦ୍ ଧରିଥିଲା। ଏହାକୁ ନେଇ ମତଭେଦ ହେବାରୁ ନ୍ୟୁୟର୍କରେ ହେବାକୁ ଥିବା ଏହି ବୈଠକକୁ ରଦ୍ଦ କରାଯାଇଛି। ସଦସ୍ୟ ଦେଶଗୁଡ଼ିକର ସହମତି ଅଭାବରୁ ସାର୍କ ମିଟିଂ ଅନୁଷ୍ଠିତ ହେବ ନାହିଁ ବୋଲି ନେପାଳ ବହିର୍ବ୍ୟାପାର ମନ୍ତ୍ରୀ ସୂଚନା ଦେଇଛନ୍ତି। ରିପୋର୍ଟ ଅନୁସାରେ ଅଧିକାଂଶ ଦେଶ ତାଲିବାନ୍କୁ ସାମିଲ କରାଯିବାକୁ ପାକିସ୍ତାନର ପ୍ରସ୍ତାବ ଉପରେ ଆଲୋଚନା ପାଇଁ ମନା କରିଦେଇଥିଲେ। ଏଥିସହ ଆଫଗାନିସ୍ତାନର କ୍ଷମତାଚ୍ୟୁତ ରାଷ୍ଟ୍ରପତି ଅଶ୍ରଫ ଗନି ସରକାରଙ୍କ କୌଣସି ପ୍ରତିନିଧିଙ୍କୁ କୌଣସି ମୂଲ୍ୟରେ ସାର୍କ ବୈଦେଶିକ ମନ୍ତ୍ରୀ ବୈଠକରେ ଯୋଗ ଦେବାକୁ ଅନୁମତି ଦିଆ ନ ଯିବାକୁ ପାକିସ୍ତାନ ଜୋର ଦେଇଥିଲା। ସାର୍କର ଅଧିକାଂଶ ସଦସ୍ୟ ଦେଶ ଏହାର ମଧ୍ୟ ବିରୋଧ କରିଥିଲେ। ଆଫଗାନିସ୍ତାନରେ ପାକିସ୍ତାନ ସମର୍ଥତ୍ତ ହକ୍କାନି ନେଟଓ୍ବର୍କର ଅମିର ଖାନ୍ ମୁତ୍ତାକି କାମଚଳା ବହିର୍ବ୍ୟାପାର ମନ୍ତ୍ରୀ ହୋଇଥିବାରୁ ତାଙ୍କୁ ସାର୍କ ବୈଠକରେ ସାମିଲ କରିବାକୁ ପାକିସ୍ତାନ ଚାହୁଁଥିଲା। ଦକ୍ଷିଣ ଏସିଆର ୮ ଦେଶ ଭାରତ, ବାଂଲାଦେଶ, ଭୁଟାନ, ନେପାଳ, ମାଳଦ୍ୱୀପ, ଶ୍ରୀଲଙ୍କା, ପାକିସ୍ତାନ ଏବଂ ଆଫଗାନିସ୍ତାନକୁ ନେଇ ସାର୍କ ଗଠିତ। ଆଫଗାନିସ୍ତାନରେ ଏହାର ସବୁଠୁ ନୂଆ ସଦସ୍ୟ। କରୋନା ସଂକ୍ରମଣ ଯୋଗୁ ଗତ ବର୍ଷ ଭର୍ଚୁଆଲ ମାଧ୍ୟମରେ ସାର୍କ ବହିର୍ବ୍ୟାପାର ମନ୍ତ୍ରୀଙ୍କ ବୈଠକ ଅନୁଷ୍ଠିତ ହୋଇଥିଲା।
