ମସ୍କୋ/ଓ୍ବାଶିଂଟନ,୭।୧୨ : ୟୁକ୍ରେନ କ୍ରମାଗତ ଦ୍ୱିତୀୟ ଥର ପାଇଁ ରୁଷିଆରେ ପ୍ରବେଶ କରି ଏହାର ଅନ୍ୟ ଏକ ବାୟୁସେନା ବେସକୁ ଧ୍ୱଂସ କରିଛି। ଡ୍ରୋନ ଆକ୍ରମଣରେ ବାୟୁସେନା ବେସରୁ ଧୂଆଁ ଏବଂ ନିଆଁର ଚିତ୍ର ମଧ୍ୟ ସାମ୍ନାକୁ ଆସିଛି। ନିଜ ଉପରେ ଲଗାତାର ଆକ୍ରମଣରେ କ୍ରୋଧିତ ହୋଇ ରୁଷିଆ ଏଥିପାଇଁ ଆମେରିକାକୁ ଦାୟୀ କରିଛି।
ରୁଷିଆ କହିଛି ଯେ ୟୁକ୍ରେନକୁ ଆମେରିକା ସାମରିକ ସହାୟତା ପଠାଉଛି ଏବଂ ଏଭଳି ଆକ୍ରମଣ ପାଇଁ ଉସୁକାଉଥିବା ଅଭିଯୋଗ କରିଛି। ରୁଷିଆର ଅଭିଯୋଗ ପରେ ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ ସ୍ପଷ୍ଟୀକରଣ ଦେଇଛନ୍ତି। ବ୍ଲିଙ୍କେନ କହିଛନ୍ତି ଯେ ଆମ ବିରୋଧରେ ଆସିଥିବା ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ। ଆମେ ୟୁକ୍ରେନକୁ ଆକ୍ରମଣ କରିବାକୁ ଉସୁକାଇ ନାହୁଁ।
ବାସ୍ତବରେ ଡ୍ରୋନ ଆକ୍ରମଣ ପରେ ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ତାଙ୍କ ସୁରକ୍ଷା ପରିଷଦ ବୈଠକ ଡାକିଥିଲେ। ଏହି ବୈଠକରେ ଦେଶର ନିରାପତ୍ତାରେ ବିଷୟରେ ଆଲୋଚନା ହୋଇଥିଲା। ବୈଠକରେ ସାମରିକ ଅଧିକାରୀମାନେ ଏହି ଆକ୍ରମଣ ପାଇଁ ଆମେରିକାକୁ ସିଧାସଳଖ ଦାୟୀ କରିଥିଲେ। କାରଣ ଆମେରିକା ଏପର୍ଯ୍ୟନ୍ତ ଏହି ଆକ୍ରମଣକୁ ନିନ୍ଦା କରିନାହିଁ। କେବଳ ଏତିକି ନୁହେଁ, ଏଥର ୟୁକ୍ରେନ ମଧ୍ୟ ଆକ୍ରମଣ କରିଥିବାକୁ ସ୍ବୀକାର କରୁନାହିଁ। ତେଣୁ ସନ୍ଦେହ ବଢ଼ିବାରେ ଲାଗିଛି।
