ଚୌଦ୍ୱାର,୩୦।୧୦(ଡି.ଏନ୍.ଏ.): ଚଳିତବର୍ଷ କରୋନା କଟକଣା ଯୋଗୁ ଚୌଦ୍ୱାରର ପ୍ରସିଦ୍ଧ ରୂପଯାତ୍ରା ଉତ୍ସବକୁ କମିଶନରେଟ୍ ପୋଲିସ ପକ୍ଷରୁ ବାତିଲ କରାଯାଇଛି। ଏ ନେଇ ଚୌଦ୍ୱାର ଥାନାରେ ଆୟୋଜିତ ପ୍ରସ୍ତୁତି ବୈଠକରେ ନିଷ୍ପତ୍ତି ହୋଇଛି। ଚୌଦ୍ୱାର ଥାନା ଆଇଆଇସି ବିରଞ୍ଚି ନାରାୟଣ ପତିଙ୍କ ପୌରୋହିତ୍ୟରେ ଆୟୋଜିତ ବୈଠକରେ ଡିସିପି ପ୍ରତୀକ ସିଂ, ଜୋନ୍-୧ ଏସିପି ଅମରେନ୍ଦ୍ର ପଣ୍ଡା, ଯାତ୍ରା କମିଟି ସଭାପତି ସୁବୋଧ ନାୟକ, କାର୍ଯ୍ୟକାରୀ ସଭାପତି ପ୍ରଦୀପ ନାୟକଙ୍କ ସମେତ ସଦସ୍ୟମାନେ ଉପସ୍ଥିତ ଥିଲେ। ଚୌଦ୍ୱାର ସହରାଞ୍ଚଳର ୪୦ଟି ମଣ୍ଡପରେ ୪ଫୁଟ୍ର ମୂର୍ତ୍ତି ନିର୍ମାଣ କରାଯିବ। ମଣ୍ଡପ ନିକଟ, ରାସ୍ତା ଓ ଯାତ୍ରା ପଡ଼ିଆରେ ଗହଳିକୁ ନିଷେଧ କରାଯାଇଛି। ପରମ୍ପରା ଦୃଷ୍ଟିରୁ ଆସନ୍ତା ୨ ଓ ୩ ତାରିଖରେ ଭସାଣି ଅନୁଷ୍ଠିତ ହେବ। ଭସାଣି ବେଳେ ପ୍ରତି ମେଢରେ ୭ଜଣ କର୍ମକର୍ତ୍ତା ରହିବେ। ମେଢଗୁଡ଼ିକୁ ବିସର୍ଜନ ପାଇଁ ଛୋଟ ଗାଡ଼ିରେ ନିଆଯିବ ଓ ଭସାଣିବେଳେ କେବଳ ଘଣ୍ଟ ବଜା ଯିବ ବୋଲି ବୈଠକରେ ସ୍ଥିର ହୋଇଛି। ମୂର୍ତ୍ତିଗୁଡ଼ିକ ପୌରପାଳିକା ପକ୍ଷରୁ ଖୋଳା ଯାଇଥିବା ଅସ୍ଥାୟୀ ପୋଖରୀରେ ବିସର୍ଜନ କରାଯିବ। ମେଳା ପଡ଼ିଆରେ ଦୋକାନ ବଜାର, ଦୋଳି ନ ପଡିବା ସାଙ୍ଗକୁ ଜନସମାଗମକୁ ସମ୍ପୂର୍ଣ୍ଣ ଭାବେ ନିଷିଦ୍ଧ କରାଯାଇଛି। ପୂଜାଦିନ ଠାରୁ ବିସର୍ଜନ ପର୍ଯ୍ୟନ୍ତ ଏହି କଟକଣା ବଳବତ୍ତର ରହିବ।
