ପ୍ରୀତିପୁର,୨୪।୯(ସୁଶାନ୍ତ ବେହୁରିଆ): ସରକାର ଗମନାଗମନ କ୍ଷେତ୍ରରେ ଉନ୍ନତି ଆଣିବା ନିମନ୍ତେ ପ୍ରତ୍ୟେକ ବର୍ଷ ବିପୁଳ ଟଙ୍କା ଖର୍ଚ୍ଚ କରୁଛନ୍ତି। ହେଲେ ଉପଯୁକ୍ତ ତଦାରଖ ଓ ଠିକାଦାର ପ୍ରୀତି ଯୋଗୁ ବହୁ ରାସ୍ତା କାର୍ଯ୍ୟରେ ଅନିୟମିତତା ଦେଖାଦେବା ସହିତ କାର୍ଯ୍ୟରେ ସ୍ଥାୟିତ୍ୱ ପ୍ରତି ଆଶଙ୍କା ସୃଷ୍ଟି ହେଉଛି। ଯାହାର ଏକ ଉଦାହରଣ ବିଞ୍ଝାରପୁର ଗ୍ରାମ୍ୟ ଉନ୍ନୟନ ଉପଖଣ୍ଡ ଅଧୀନ ବିଞ୍ଝାରପୁର ସେକ୍ସନର କେରୁଣାଠାରୁ କୋତପୁର ଭାୟା ମାନସିଂହ ପାଟଣା, ଧୋବକୋଇଲି, ଚାଉଳିଆ ଓ ଦକ୍ଷିଣବନ୍ଧ ରାସ୍ତା କାର୍ଯ୍ୟରେ ଦେଖାଯାଇଛି। ଏହି ରାସ୍ତା ନିର୍ମାଣ ହେଲେ ଦଶରଥପୁର ବ୍ଲକର ଅସନପୁର, କନିକାପଡ଼ା, ପାଲଟପୁର, ଥାଲକୁଡ଼ି ଓ ଖାନନଗର ପଞ୍ଚାୟତର ୨୦ହଜାରରୁ ଊର୍ଦ୍ଧ୍ୱ ଲୋକ ଉପକୃତ ହେବେ। ଏହି ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ରାସ୍ତା ନିର୍ମାଣ ଅଟକଳର ମୂଲ୍ୟ ୩ କୋଟି ୯୦ ଲକ୍ଷ ୫୮ ହଜାର ଓ ଏହାର ୫ ବର୍ଷ ରକ୍ଷଣାବେକ୍ଷଣ ଅଟକଳ ମୂଲ୍ୟ ୨୭ ଲକ୍ଷ ୩୦ ହଜାର ଟଙ୍କା ରହିଛି। ୧୯ା୧୦ା୨୦୨୨ରୁ ଏହାର ନିର୍ମାଣ କାର୍ଯ୍ୟ ଆରମ୍ଭ ହୋଇ ୧୮ା୭ା୨୦୨୩ରେ ସମାପ୍ତ ହେବାକୁ ଚୁକ୍ତି ହୋଇଥିଲା। ହେଲେ ଅବଧିର ୨ ମାସ ଅତିକ୍ରାନ୍ତ ପରେ ସୁଦ୍ଧା ରାସ୍ତା କାର୍ଯ୍ୟ ୨୫ ପ୍ରତିଶତ ସମାପ୍ତ ହୋଇନାହିଁ। ରାସ୍ତାର ମଧ୍ୟ ଭାଗ ୩.୭୫ ମିଟର ପ୍ରସ୍ଥ ଥିବାବେଳେ ଉଭୟ ପାର୍ଶ୍ୱ ଆପ୍ରୋଚକୁ ମିଶାଇ ଏହା ୬ ମିଟର ରାସ୍ତାରେ ପରିଣତ ହେବ। ମୋଟ୍ ରାସ୍ତାରୁ ୨ କି.ମି. ୬୫୪ ମିଟର ରାସ୍ତା ପିଚୁ ଓ ୪ କି.ମି. ୫୯୨ ମିଟର ରାସ୍ତାର ଫେବର ବ୍ଲକ ବିଛାଯିବ। ବର୍ତ୍ତମାନ କେରୁଣା ଗ୍ରାମରେ ମେଟାଲିଂ କାର୍ଯ୍ୟ ଚାଲୁରହିଥିବାବେଳେ ରାସ୍ତା କାର୍ଯ୍ୟରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ହୋଇଛି। ରାସ୍ତାରେ ସର୍ବନିମ୍ନ ୪ ଇଞ୍ଚର ମେଟାଲ ବିଛାଯିବାର ନିୟମ ରହିଥିବାବେଳେ ଏଠାରେ ମାତ୍ର ୩ ଇଞ୍ଚରୁ କମ ମୋଟେଇର ମେଟାଲ ବିଛା ଯାଉଥିବା ଦେଖାଯାଇଛି।
ମେଟାଲିଂ କାର୍ଯ୍ୟରେ ମେଟାଲ ପରିମାଣ କମ୍ ଓ ଡଷ୍ଟର ପରିମାଣ ଅଧିକ ରହୁଛି। ସେହିପରି ଦାମୋଦରପୁର ଗ୍ରାମରେ ଫେବର ବ୍ଲକ କାର୍ଯ୍ୟ ଚାଲିଥିବାବେଳେ ଏହା ତଳେ ଖୁବ କମ ପରିମାଣରେ ବାଲି ବିଛା ଯିବା ଯୋଗୁ ରାସ୍ତା ଖାଲ ଢିପ ଦେଖାଯାଉଛି। ଫଳରେ ସାମାନ୍ୟ ବର୍ଷାରେ ବର୍ଷାଜଳ ଓ ମାଟି କାଦୁଅ ଆସି ରାସ୍ତାରେ ଜମାହେଉଛି। ରାସ୍ତା କାର୍ଯ୍ୟରେ ନିମ୍ନମାନର ସିମେଣ୍ଟ, ଗୋଡି ସହ ମାଟି/କାଦୁଅ ମିଶା ବାଲି ବ୍ୟବହାର କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ବିଭାଗୀୟ ଅଧିକାରୀଙ୍କ ଅଗୋଚରରେ ଠିକାଦାର ନିମ୍ନମାନର କାର୍ଯ୍ୟ କରୁଛନ୍ତି। ସେ ସ୍ଥାନୀୟ ଜନସାଧାରଣଙ୍କ ଅଭିଯୋଗକୁ ଭୃକ୍ଷେପ କରୁ ନ ଥିବାରୁ ଅସନ୍ତୋଷ ପ୍ରକାଶ ପାଇଛି। ତେଣୁ ଉକ୍ତ ରାସ୍ତା ନିର୍ମାଣ କାର୍ଯ୍ୟରେ ହେଉଥିବା ଅନିୟମିତତାର ତଦନ୍ତ କରି ଦାୟୀ ଠିକାଦାର ଓ ଅଧିକାରୀଙ୍କ ପ୍ରତି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅଞ୍ଚଳବାସୀଙ୍କ ପକ୍ଷରୁ ଜିଲାପାଳଙ୍କ ନିକଟରେ ଦାବି ହୋଇଛି। ଏ ସମ୍ପର୍କରେ ଗ୍ରାମ ଉନ୍ନୟନ ବିଭାଗ ବିଞ୍ଝାରପୁର ସେକ୍ସନ ଦାୟିତ୍ୱରେ ଥିବା ଯନ୍ତ୍ରୀ ଅଶୋକ କୁମାର ଜେନାଙ୍କୁ ପଚାରିବାରେ ସେ କହିଛନ୍ତି, ଏହା ଉପରେ ତଦାରଖ କରିବେ। ବିଭାଗୀୟ ଅଧୀକ୍ଷଣ ଯନ୍ତ୍ରୀ ଜ୍ୟୋତିରଞ୍ଜନ ନାୟକଙ୍କୁ ପଚାରିବାରେ ସେ କହିଛନ୍ତି, ସମ୍ପୃକ୍ତ ଠିକାଦାରଙ୍କ ବିରୋଧରେ କାରଣ ଦର୍ଶାଅ ନୋଟିସ ଜାରି କରାଯିବ।
