ଗାଜିଆବାଦ୍,୨୫।୪: କରୋନା ମହାମାରୀ ସଂକ୍ରମଣ ଯୋଗୁ ଦେଶରେ କୋକୁଆ ଭୟ ଦେଖାଦେଇଛି। କରୋନା ଆକ୍ରାନ୍ତଙ୍କ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି। ମୃତକଙ୍କ ଅନ୍ତିମ ସଂସ୍କାର କରିବା ଏକ କଷ୍ଟକର ବ୍ୟାପାର ପାଲଟିଛି। ଉତ୍ତରପ୍ରଦେଶ ଗାଜିଆବାଦ୍ରେ ଶ୍ମଶାନ ନିକଟରେ ଥିବା ରାସ୍ତା କଡ଼ରେ ଧାଡ଼ିଧାଡ଼ି ମୃତଦେହ ପଡ଼ି ରହିଛି। ଅନ୍ତିମ ସଂସ୍କାର ପାଇଁ ମୃତକଙ୍କ ପରିବାର ସଦସ୍ୟମାନେ ନିଜ ପାଳିକୁ ଅପେକ୍ଷା କରି ରହିଛନ୍ତି। ସକାଳ ୮ଟାରୁ ଲାଇନ୍ ଲଗାଇଲେ ରାତ୍ର ୧୦ଟା ବେଳକୁ ପାଳି ପଡ଼ିବାର ଆଶା ରହୁଛି ବୋଲି ଲୋକେ କହୁଛନ୍ତି। ଗାଜିଆବାଦ୍ର ହିଣ୍ଡନ ଶ୍ମଶାନରେ ସ୍ଥିତି ସଙ୍କଟ ଜନକ ରହିଛି। ଦିନରାତି ସଂସ୍କାର କାର୍ଯ୍ୟ ଜାରି ରହିଛି। ମୃତକଙ୍କ ସଂଖ୍ୟା ବଢୁଥିବାରୁ ପ୍ରଶାସନର ମଧ୍ୟ ଅକଲଗୁଡୁମ୍ ହୋଇଯାଇଛି। କିଭଳି ସ୍ଥିତିକୁ ନିୟନ୍ତ୍ରଣ କରାଯିବ ସେ ବୁଦ୍ଧି ମୁଣ୍ଡରେ ଜୁଟୁ ନାହିଁ। ଟଙ୍କା ଖର୍ଚ୍ଚ କରିବା ସହିତ ହସ୍ପିଟାଲରେ କରୋନା ଆକ୍ରାନ୍ତଙ୍କ ଚିକିତ୍ସା ପାଇଁ ସୁପାରିଶ୍ ମଧ୍ୟ କରିବାକୁ ପଡୁଛି। ତେବେ ବି ଚିକିତ୍ସା ଦ୍ୱାରା ଆକ୍ରାନ୍ତଙ୍କ ଜୀବନ ବଞ୍ଚୁନାହିଁ। ଏନେଇ ଲୋକଙ୍କ ଆଖିରେ ଲୁହ ଭରିବା ସହିତ ଛାତିରେ କୋହ ବୃଦ୍ଧି ପାଇବାରେ ଲାଗିଛି। ମାତ୍ର କରୋନା ମହାମାରୀ ଥମିବାର ନାଁ ଧରୁନି।
