ଓ୍ବାଶିଂଟନ,୧୩।୫: କରୋନା ମହାମାରୀ ସଂକ୍ରମଣ ଯୋଗୁ ପୃଥିବୀବ୍ୟାପୀ ସ୍ଥିତି ସଙ୍କଟ ଜନକ ହୋଇଛି। କରୋନା ଆକ୍ରାନ୍ତ ସୁସ୍ଥ ହେଲା ପରେ ମଧ୍ୟ ଶରୀରରେ ବହୁ ସମସ୍ୟା ଦେଖାଦେଉଛି। କେତେକଙ୍କଠାରେ ସ୍ମରଣ ଶକ୍ତି ହ୍ରାସ ପାଇବା ସମସ୍ୟା ସୃଷ୍ଟି ହେଉଛି। ସେହିପରି କରୋନା ସଂକ୍ରମଣ ପରେ ସୁସ୍ଥ ହୋଇଥିବା ପୁରୁଷଙ୍କ ଗୁପ୍ତାଙ୍ଗରେ ସମସ୍ୟା ଦେଖାଦେଉଥିବା ନେଇ ଏକ ଗବେଷଣା ରିପୋର୍ଟ ପ୍ରକାଶ ପାଇଛି। ଆମେରିକାର ମିଆମି ବିଶ୍ୱବିଦ୍ୟାଳୟ ପକ୍ଷରୁ ପ୍ରକାଶିତ ହୋଇଥିବା ଏକ ଗବେଷଣା ରିପୋର୍ଟରେ ଏହା ଉଲ୍ଲେଖ କରାଯାଇଛି। କରୋନା ଭୂତାଣୁ ପୁରୁଷଙ୍କ ଗୁପ୍ତାଙ୍ଗକୁ ସଂକ୍ରମିତ କରୁଛି। ଏପ୍ରକାର ସମସ୍ୟାକୁ ଇରେକ୍ଟାଇଲ୍ ଡିସଫଙ୍କଶନ୍ କୁହାଯାଉଛି। କରୋନା ଭୂତାଣୁ ଗୁପ୍ତାଙ୍ଗର ଇରେକ୍ଟାଇଲ୍ କୋଷିକାକୁ ନଷ୍ଟ କରିବା ଆରମ୍ଭ କରୁଛି। ଫଳରେ ଏହି ସମସ୍ୟା ସୃଷ୍ଟି ହେଉଛି। ଏହାଯୋଗୁ ପୁରୁଷମାନେ ଶାରୀରିକ ସମ୍ପର୍କ ରକ୍ଷା କରିବାକୁ ଅକ୍ଷମ ହେଉଛନ୍ତିି। ଗବେଷକ କରୋନାରୁ ସୁସ୍ଥ ହୋଇଥିବା ପୁରୁଷଙ୍କ ଗୁପ୍ତାଙ୍ଗ ସ୍କାନ୍ କରି ଏହା ଜାଣିପାରିଛନ୍ତି। କରୋନାରୁ ସୁସ୍ଥ ହେବାର ୬ ମାସ ପରେ ସେମାନଙ୍କର ସ୍କାନିଂ କରାଯାଇଥିଲା। ଇରେକ୍ଟାଇଲ୍ କୋଷିକାରେ କରୋନା ଭୂତାଣୁ ରହିଥିବା ଗବେଷକ ଜାଣିପାରିଥିଲେ। ଏହା ଯୋଗୁ ପୁରୁଷଙ୍କ ଯୌନ କ୍ଷମତା ହ୍ରାସ ପାଉଥିବା ବୈଜ୍ଞାନିକ ଡ.ରଞ୍ଜିତ୍ ରାମାସାମୀ ସୂଚନା ଦେଇଛନ୍ତି। ସେହିପରି ରୋମ୍ ବିଶ୍ୱବିଦ୍ୟାଳୟ ପକ୍ଷରୁ କରୋନାରୁ ସୁସ୍ଥ ହୋଇଥିବା ୧୦୦ ଜଣ ପୁରୁଷଙ୍କ ସନ୍ତାନ ଉତ୍ପାଦନ କ୍ଷମତା ଯାଞ୍ଚ୍ କରିଥିଲେ। ସେମାନଙ୍କ ମଧ୍ୟରୁ ୨୮ ପ୍ରତିଶତ ପୁରୁଷଙ୍କଠାରେ ଇରେକ୍ଟାଇଲ୍ ଡିସଫଙ୍କଶନ୍ ସମସ୍ୟା ଦେଖାଯାଇଥିଲା। କରୋନା ଭୂତାଣୁ ଏଣ୍ଡୋଥିଲିୟମ୍କୁ କ୍ଷତି ପହଞ୍ଚାଇଥାଏ ବୋଲି ଗବେଷକ କହିଛନ୍ତି। ସେହିପରି ଶାରୀରିକ ସମ୍ପର୍କ ରକ୍ଷା ଲାଗି ମନରେ ଆବେଗ ସୃଷ୍ଟି କରୁଥିବା ଓଷ୍ଟ୍ରୋଜେନ୍ ଏବଂ ଟେଷ୍ଟୋଷ୍ଟେରୋନ୍ ହରମୋନ୍ର କ୍ଷରଣକୁ କରୋନା ଭୂତାଣୁ ପ୍ରଭାବିତ କରୁଛି। ଫଳରେ ପୁରୁଷଙ୍କ ଯୌନ ଆବେଗ କମୁଥିବା ଗବେଷକ ପ୍ରକାଶ କରିଛନ୍ତି। ଏହି ଦୁଇ ହରମୋନ୍ ହାର୍ଟର ସ୍ବାଭାବିକ କାର୍ଯ୍ୟକୁ ମଧ୍ୟ ପ୍ରଭାବିତ କରିଥାନ୍ତି। ତେଣୁ ଏସବୁ ହରମୋନ୍ କ୍ଷରଣରେ ଅନିୟମିତତା ଦେଖାଦେଲେ ହାର୍ଟ ଆଟାକ୍ ଆଶଙ୍କା ବଢ଼ିଯାଇଥାଏ ବୋଲି ନ୍ୟୁୟର୍କ ସ୍ଥିତ ଇକାନ୍ ସ୍କୁଲ୍ ଅଫ୍ ମେଡ଼ିସିନ୍ର ପ୍ରଫେସର ଶାନ୍ନା ଖାନ୍ କହିଛନ୍ତି।
