ନୂଆଦିଲ୍ଲୀ,୧୦।୯: ଦୀର୍ଘ ୪ ବର୍ଷ ହେଲା ଟି୨୦ ଫର୍ମାଟରେ ଖେଳି ନ ଥିବା ରବିଚନ୍ଦ୍ରନ ଅଶ୍ୱିନଙ୍କୁ ସିଧାସଳଖ ବିଶ୍ୱକପ୍ ଦଳରେ ସ୍ଥାନ ମିଳିବା ଭାରତୀୟ ପ୍ରଶଂସକଙ୍କୁ ଚକିତ କରି ଦେଇଛି। ତେବେ ତାଙ୍କ ଚୟନ ପଛରେ ରହିଛି ଉପ ଅଧିନାୟକ ରୋହିତ ଶର୍ମାଙ୍କ ହାତ।
ବିଶ୍ୱକପ୍ ଲାଗି ଦଳ ଚୟନ ବୈଠକ ପୂର୍ବରୁ ବୋର୍ଡ ଓ ଚୟନକର୍ତ୍ତା ଉପ ଅଧିନାୟକ ରୋହିତଙ୍କ ମତାମତ ମାଗିଥିଲେ। ଅଶ୍ୱିନଙ୍କୁ ଦଳରେ ସାମିଲ କରିବା ଲାଗି ମତ ଦେଇଥିଲେ ଭାରତୀୟ ଓପନର। ଏ ସମ୍ପର୍କରେ ବୈଠକରେ ଆଲୋଚନା ହୋଇଥିଲେ। ସେଥିରେ ଅଶ୍ୱିନଙ୍କୁ ସମର୍ଥନ କରିଥିଲେ ଅଧିନାୟକ ବିରାଟ କୋହଲି।
କୋହଲି ପୂର୍ବରୁ କହିଥିଲେ, ଓ୍ବାଶିଂଟନ ସୁନ୍ଦରଙ୍କ ପ୍ରଦର୍ଶନ ଅବନତି ଘଟିଲେ ଅଶ୍ୱିନଙ୍କ ଲାଗି ବାଟ ଫିଟିବ। ଏବେ ଆଙ୍ଗୁଠି ଜନିତ ଆହତ ସମସ୍ୟା କାରଣରୁ ସୁନ୍ଦର ବିଶ୍ୱକପ୍ରୁ ବାଦ୍ ପଡ଼ିଛନ୍ତି। ରୋହିତ ଓ କୋହଲିଙ୍କ ମତରେ ଗତ ଦୁଇ ବର୍ଷ ହେଲା ଆଇପିଏଲରେ ଅଶ୍ୱିନଙ୍କୁ ଖେଳିବା ବ୍ୟାଟ୍ସମ୍ୟାନଙ୍କ ପକ୍ଷେ ମୁସ୍କିଲ ହୋଇପଡ଼ିଛି। ଆଉ ୟୁଏଇର ଧିମା ପିଚ୍କୁ ଦୃଷ୍ଟିରେ ତାଙ୍କୁ ଚୟନ କରାଯାଇଛି।
