ମୁମ୍ବାଇ, ୨୮।୧: ବର୍ଡର-ଗାଭାସ୍କର ଟ୍ରଫି (BGT) ୨୦୨୪-୨୫ ସମୟରେ ଭାରତର ଟେଷ୍ଟ ଅଧିନାୟକ ରୋହିତ ଶର୍ମାଙ୍କ ଅଷ୍ଟ୍ରେଲିଆ ଗସ୍ତ ଏକ ଚ୍ୟାଲେଞ୍ଜିଂ ଥିଲା। ସେ ବ୍ୟାଟ୍ ଏବଂ ତାଙ୍କ ନେତୃତ୍ୱ ନେବାର ଦକ୍ଷତା ଉପରେ ପ୍ରଶ୍ନ ଘେରକୁ ଆସିଥିଲେ। ପିତୃତ୍ୱ ଛୁଟି ଯୋଗୁଁ ପ୍ରଥମ ଟେଷ୍ଟ ଖେଳିବାରୁ ବଞ୍ଚିତ ହେବା ପରେ ଦ୍ୱିତୀୟ ଟେଷ୍ଟ ପାଇଁ ଦଳରେ ଯୋଗ ଦେବା ସତ୍ତ୍ୱେ, ଶର୍ମାଙ୍କ ପ୍ରଦର୍ଶନ ଦୁର୍ବଳ ହୋଇଗଲା, ଏବଂ ଜସପ୍ରିତ ବୁମରାହଙ୍କ ନେତୃତ୍ୱରେ ପର୍ଥରେ ବିଜୟ ହାସଲ କରିବା ସତ୍ତ୍ୱେ ଭାରତର ସିରିଜ ପ୍ରଦର୍ଶନ ନିମ୍ନଗାମୀ ହୋଇଗଲା।
ରୋହିତ ତିନୋଟି ଟେଷ୍ଟ ମ୍ୟାଚ୍ ରେ ମାତ୍ର ୩୧ ରନ୍ କରିପାରିଥିଲେ, ଯାହାର ହାର ମାତ୍ର ୬.୦୦ ଥିଲା। ଏହି ଦୁର୍ବଳ ପ୍ରଦର୍ଶନ ପୂର୍ବତନ କ୍ରିକେଟର ସୁନୀଲ ଗାଭାସ୍କରଙ୍କୁ ବ୍ୟାଟର ଏବଂ ଅଧିନାୟକ ଭାବରେ ଶର୍ମାଙ୍କ ଆଭିମୁଖ୍ୟକୁ ସମାଲୋଚନା କରିବାକୁ ବାଧ୍ୟ କରିଥିଲା। ଗାଭାସ୍କର ସିଡନୀ ଟେଷ୍ଟରେ ଶର୍ମାଙ୍କ ଅନୁପସ୍ଥିତି ବିଷୟରେ ମଧ୍ୟ ଚିନ୍ତା ପ୍ରକାଶ କରିଥିଲେ, ଲାଲ-ବଲ୍ କ୍ରିକେଟରେ ତାଙ୍କ ଭବିଷ୍ୟତ ଉପରେ ସନ୍ଦେହ ପ୍ରକାଶ କରିଥିଲେ। ସେ ଏପରି ମଧ୍ୟ ପରାମର୍ଶ ଦେଇଥିଲେ ଯେ ଦଳର ଉନ୍ନତି ପାଇଁ ଅନ୍ୟ କେହି ଅଧିନାୟକତ୍ୱ ନେବାର ସମୟ ଆସିପାରେ।
ଏକ ରିପୋର୍ଟ ଅନୁଯାୟୀ, ଏହି ସମାଲୋଚନାକୁ ଗ୍ରହଣ କରି ପାରିନାହାନ୍ତି ରୋହିତ ଶର୍ମା। ଏଥିରେ ପ୍ରତିକ୍ରିୟା ପ୍ରକାଶ କରି ସେ ଗାଭାସ୍କରଙ୍କ ବିରୁଦ୍ଧରେ ଏକ ଆନୁଷ୍ଠାନିକ ଅଭିଯୋଗ ଦାଖଲ କରିବାକୁ ଭାରତୀୟ କ୍ରିକେଟ୍ ନିୟନ୍ତ୍ରଣ ବୋର୍ଡ (BCCI) ନିକଟରେ ଯୋଗାଯୋଗ କରିଥିବା ଜଣାପଡ଼ିଛି। ଶର୍ମା ଏହା ମଧ୍ୟ ଉଲ୍ଲେଖ କରିଛନ୍ତି ଯେ ବାହ୍ୟ ପରିସ୍ଥିତି ତାଙ୍କ ପ୍ରଦର୍ଶନକୁ ପ୍ରଭାବିତ କରିଥିଲା, ଯାହାର ପ୍ରଭାବ ଗସ୍ତ ସମୟରେ ତାଙ୍କ ପ୍ରଦର୍ଶନକୁ ଦୁର୍ବଳ କରିଥିଲା।
ଏହି ଘଟଣାର ଏକ ନିକଟତମ ସୂତ୍ର ପ୍ରକାଶ କରିଛି, “ରୋହିତ ଅନୁଭବ କରିଥିଲେ ଯେ ସୁନୀଲ ଗାଭାସ୍କର ତାଙ୍କୁ ଏପରି ଭାବରେ ସମାଲୋଚନା କରିବା ଆବଶ୍ୟକ ନୁହେଁ, ଏବଂ ସେଥିପାଇଁ ସେ ଗାଭାସ୍କରଙ୍କ ବିଷୟରେ BCCIକୁ ଅଭିଯୋଗ କରିଥିଲେ। ଏସବୁ ସମାଲୋଚନା ଏତେ ଚାପ ସୃଷ୍ଟି କରିଥିଲା ଯେ ସେ BCCIକୁ ସବୁକିଛି କହିବାକୁ ବାଧ୍ୟ ହୋଇଥିଲେ।”
ସେପଟେ ମୁମ୍ବାଇର ରଣଜୀ ଟ୍ରଫି ୨୦୨୪-୨୫ ଅଭିଯାନରେ ଶର୍ମାଙ୍କ ନିରାଶାଜନକ ପ୍ରଦର୍ଶନ ପରେ ଏହି ଖବର ଆସିଛି, ଯେଉଁଠାରେ ସେ ଜମ୍ମୁ ଏବଂ କାଶ୍ମୀର ବିପକ୍ଷରେ ଏକ ମ୍ୟାଚ୍ ରେ ମଧ୍ୟ ଦୁର୍ବଳ ପ୍ରଦର୍ଶନ କରିରଥିଲେ। ଯାହା ତାଙ୍କ ଫର୍ମ ଉପରେ ଆହୁରି ପ୍ରଶ୍ନ ଉଠାଇଥିଲା। ସମାଲୋଚନା ସତ୍ତ୍ୱେ, ଶର୍ମା ଟ୍ରାକକୁ ଫେରିବାକୁ ଦୃଢ଼ ସଂକଳ୍ପବଦ୍ଧ ଏବଂ ତାଙ୍କର ବ୍ୟାଟିଂ ଲୟ ଫେରି ପାଇବା ପାଇଁ ଚଳିତ ଘରୋଇ ରଣଜୀ ସିଜନକୁ ଏକ ସୁଯୋଗ ଭାବେ ବ୍ୟବହାର କରୁଛନ୍ତି।
